| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
3. නිස්සග්ගියනිද්දෙසො
3. Nissaggiyaniddeso
17.
17.
විකප්පනමධිට්ඨාන-මකත්වා කාලචීවරං;
Vikappanamadhiṭṭhāna-makatvā kālacīvaraṃ;
දසාහමතිමාපෙති, තස්ස නිස්සග්ගියං සියා.
Dasāhamatimāpeti, tassa nissaggiyaṃ siyā.
18.
18.
භික්ඛුසම්මුතියාඤ්ඤත්ර, තිචීවරමධිට්ඨිතං;
Bhikkhusammutiyāññatra, ticīvaramadhiṭṭhitaṃ;
එකාහමතිමාපෙති, නිස්සග්ගි සමයං විනා.
Ekāhamatimāpeti, nissaggi samayaṃ vinā.
19.
19.
අඤ්ඤාතිකා භික්ඛුනියා, පුරාණචීවරං පන;
Aññātikā bhikkhuniyā, purāṇacīvaraṃ pana;
ධොවාපෙති රජාපෙති, ආකොටාපෙති තං සියා.
Dhovāpeti rajāpeti, ākoṭāpeti taṃ siyā.
20.
20.
අඤ්ඤාතිකා භික්ඛුනියා, හත්ථතො කිඤ්චි මූලකං;
Aññātikā bhikkhuniyā, hatthato kiñci mūlakaṃ;
අදත්වා චීවරාදානෙ, නිස්සග්ගියමුදීරිතං.
Adatvā cīvarādāne, nissaggiyamudīritaṃ.
21.
21.
අප්පවාරිතමඤ්ඤාතිං, විඤ්ඤාපෙන්තස්ස චීවරං;
Appavāritamaññātiṃ, viññāpentassa cīvaraṃ;
අඤ්ඤත්ර සමයා තස්ස, නිස්සග්ගියමුදීරිතං.
Aññatra samayā tassa, nissaggiyamudīritaṃ.
22.
22.
රජතං ජාතරූපං වා, මාසකං වා කහාපණං;
Rajataṃ jātarūpaṃ vā, māsakaṃ vā kahāpaṇaṃ;
ගණ්හෙය්ය වා ගණ්හාපෙය්ය, නිස්සග්ගි සාදියෙය්ය වා.
Gaṇheyya vā gaṇhāpeyya, nissaggi sādiyeyya vā.
23.
23.
පරිවත්තෙය්ය නිස්සග්ගි, රජතාදි චතුබ්බිධං;
Parivatteyya nissaggi, rajatādi catubbidhaṃ;
කප්පියං කප්පියෙනාපි, ඨපෙත්වා සහධම්මිකෙ.
Kappiyaṃ kappiyenāpi, ṭhapetvā sahadhammike.
24.
24.
විකප්පනමධිට්ඨාන-මකත්වාන පමාණිකං;
Vikappanamadhiṭṭhāna-makatvāna pamāṇikaṃ;
දසාහමතිමාපෙති, පත්තං නිස්සග්ගියං සියා.
Dasāhamatimāpeti, pattaṃ nissaggiyaṃ siyā.
25.
25.
පඤ්චබන්ධනතො ඌන-පත්තෙ සති පරං පන;
Pañcabandhanato ūna-patte sati paraṃ pana;
විඤ්ඤාපෙති නවං පත්තං, තස්ස නිස්සග්ගියං සියා.
Viññāpeti navaṃ pattaṃ, tassa nissaggiyaṃ siyā.
26.
26.
පටිග්ගහෙත්වා භුඤ්ජන්තො, සප්පිතෙලාදිකං පන;
Paṭiggahetvā bhuñjanto, sappitelādikaṃ pana;
සත්තාහමතිමාපෙති, තස්ස නිස්සග්ගියං සියා.
Sattāhamatimāpeti, tassa nissaggiyaṃ siyā.
27.
27.
භික්ඛුස්ස චීවරං දත්වා, අච්ඡින්දන්තස්ස තං පුන;
Bhikkhussa cīvaraṃ datvā, acchindantassa taṃ puna;
සකසඤ්ඤාය නිස්සග්ගි, අච්ඡින්දාපයතොපි වා.
Sakasaññāya nissaggi, acchindāpayatopi vā.
28.
28.
අප්පවාරිතමඤ්ඤාතිං , සුත්තං යාචිය චීවරං;
Appavāritamaññātiṃ , suttaṃ yāciya cīvaraṃ;
වායාපෙන්තස්ස නිස්සග්ගි, විනා ඤාතිප්පවාරිතෙ.
Vāyāpentassa nissaggi, vinā ñātippavārite.
29.
29.
ජානන්තො භික්ඛු සඞ්ඝස්ස, ලාභං පරිණතං පන;
Jānanto bhikkhu saṅghassa, lābhaṃ pariṇataṃ pana;
අත්තනො පරිණාමෙති, තස්ස නිස්සග්ගියං සියාති.
Attano pariṇāmeti, tassa nissaggiyaṃ siyāti.
