| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
4. පාචිත්තියනිද්දෙසො
4. Pācittiyaniddeso
30.
30.
සම්පජානමුසාවාදෙ, පාචිත්තියමුදීරිතං;
Sampajānamusāvāde, pācittiyamudīritaṃ;
භික්ඛුඤ්ච ඔමසන්තස්ස, පෙසුඤ්ඤහරණෙපි ච.
Bhikkhuñca omasantassa, pesuññaharaṇepi ca.
31.
31.
ඨපෙත්වා භික්ඛුනිං භික්ඛුං, අඤ්ඤෙන පිටකත්තයං;
Ṭhapetvā bhikkhuniṃ bhikkhuṃ, aññena piṭakattayaṃ;
පදසොධම්මං භණන්තස්ස, පාචිත්තියමුදීරිතං.
Padasodhammaṃ bhaṇantassa, pācittiyamudīritaṃ.
32.
32.
අනුපසම්පන්නෙනෙව, සයිත්වාන තිරත්තියං;
Anupasampanneneva, sayitvāna tirattiyaṃ;
පාචිත්ති සහසෙය්යාය, චතුත්ථත්ථඞ්ගතෙ පුන.
Pācitti sahaseyyāya, catutthatthaṅgate puna.
33.
33.
ඉත්ථියා එකරත්තම්පි, සෙය්යං කප්පයතොපි වා;
Itthiyā ekarattampi, seyyaṃ kappayatopi vā;
දෙසෙන්තස්ස විනා විඤ්ඤුං, ධම්මඤ්ච ඡප්පදුත්තරිං.
Desentassa vinā viññuṃ, dhammañca chappaduttariṃ.
34.
34.
දුට්ඨුල්ලං භික්ඛුනො වජ්ජං, භික්ඛුසම්මුතියා විනා;
Duṭṭhullaṃ bhikkhuno vajjaṃ, bhikkhusammutiyā vinā;
අභික්ඛුනො වදන්තස්ස, පාචිත්තියමුදීරිතං.
Abhikkhuno vadantassa, pācittiyamudīritaṃ.
35.
35.
ඛණෙය්ය වා ඛණාපෙය්ය, පථවිඤ්ච අකප්පියං;
Khaṇeyya vā khaṇāpeyya, pathaviñca akappiyaṃ;
භූතගාමං විකොපෙය්ය, තස්ස පාචිත්තියං සියා.
Bhūtagāmaṃ vikopeyya, tassa pācittiyaṃ siyā.
36.
36.
අජ්ඣොකාසෙ තු මඤ්චාදිං, කත්වා සන්ථරණාදිකං;
Ajjhokāse tu mañcādiṃ, katvā santharaṇādikaṃ;
සඞ්ඝිකං යාති පාචිත්ති, අකත්වාපුච්ඡනාදිකං.
Saṅghikaṃ yāti pācitti, akatvāpucchanādikaṃ.
37.
37.
සඞ්ඝිකාවසථෙ සෙය්යං, කත්වා සන්ථරණාදිකං;
Saṅghikāvasathe seyyaṃ, katvā santharaṇādikaṃ;
අකත්වාපුච්ඡනාදිං යො, යාති පාචිත්ති තස්සපි.
Akatvāpucchanādiṃ yo, yāti pācitti tassapi.
38.
38.
ජානං සප්පාණකං තොයං, පාචිත්ති පරිභුඤ්ජතො;
Jānaṃ sappāṇakaṃ toyaṃ, pācitti paribhuñjato;
අඤ්ඤාතිකා භික්ඛුනියා, ඨපෙත්වා පාරිවත්තකං.
Aññātikā bhikkhuniyā, ṭhapetvā pārivattakaṃ.
39.
39.
චීවරං දෙති පාචිත්ති, චීවරං සිබ්බතොපි ච;
Cīvaraṃ deti pācitti, cīvaraṃ sibbatopi ca;
අතිරිත්තං අකාරෙත්වා, පවාරෙත්වාන භුඤ්ජතො.
Atirittaṃ akāretvā, pavāretvāna bhuñjato.
40.
40.
භික්ඛුං ආසාදනාපෙක්ඛො, පවාරෙති පවාරිතං;
Bhikkhuṃ āsādanāpekkho, pavāreti pavāritaṃ;
අනතිරිත්තෙන භුත්තෙ තු, පාචිත්තියමුදීරිතං.
Anatirittena bhutte tu, pācittiyamudīritaṃ.
41.
41.
සන්නිධිභොජනං භුඤ්ජෙ, විකාලෙ යාවකාලිකං;
Sannidhibhojanaṃ bhuñje, vikāle yāvakālikaṃ;
භුඤ්ජතො වාපි පාචිත්ති, අගිලානො පණීතකං.
Bhuñjato vāpi pācitti, agilāno paṇītakaṃ.
42.
42.
විඤ්ඤාපෙත්වාන භුඤ්ජෙය්ය, සප්පිභත්තාදිකම්පි ච;
Viññāpetvāna bhuñjeyya, sappibhattādikampi ca;
අප්පටිග්ගහිතං භුඤ්ජෙ, දන්තකට්ඨොදකං විනා.
Appaṭiggahitaṃ bhuñje, dantakaṭṭhodakaṃ vinā.
43.
43.
තිත්ථියස්ස දදෙ කිඤ්චි, භුඤ්ජිතබ්බං සහත්ථතො;
Titthiyassa dade kiñci, bhuñjitabbaṃ sahatthato;
නිසජ්ජං වාරහො කප්පෙ, මාතුගාමෙන චෙකතො.
Nisajjaṃ vāraho kappe, mātugāmena cekato.
44.
44.
සුරාමෙරයපානෙපි, පාචිත්තියමුදීරිතං;
Surāmerayapānepi, pācittiyamudīritaṃ;
අඞ්ගුලිපතොදකෙ චාපි, හසධම්මෙපි චොදකෙ.
Aṅgulipatodake cāpi, hasadhammepi codake.
45.
45.
අනාදරෙපි පාචිත්ති, භික්ඛුං භීසයතොපි වා;
Anādarepi pācitti, bhikkhuṃ bhīsayatopi vā;
භයානකං කථං කත්වා, දස්සෙත්වා වා භයානකං.
Bhayānakaṃ kathaṃ katvā, dassetvā vā bhayānakaṃ.
46.
46.
ඨපෙත්වා පච්චයං කිඤ්චි, අගිලානො ජලෙය්ය වා;
Ṭhapetvā paccayaṃ kiñci, agilāno jaleyya vā;
ජොතිං ජලාපයෙය්යාපි, තස්ස පාචිත්තියං සියා.
Jotiṃ jalāpayeyyāpi, tassa pācittiyaṃ siyā.
47.
47.
කප්පබින්දුමනාදාය, නවචීවරභොගිනො;
Kappabindumanādāya, navacīvarabhogino;
හසාපෙක්ඛස්ස පාචිත්ති, භික්ඛුනො චීවරාදිකං.
Hasāpekkhassa pācitti, bhikkhuno cīvarādikaṃ.
48.
48.
අපනෙත්වා නිධෙන්තස්ස, නිධාපෙන්තස්ස වා පන;
Apanetvā nidhentassa, nidhāpentassa vā pana;
ජානං පාණං මාරෙන්තස්ස, තිරච්ඡානගතම්පි ච.
Jānaṃ pāṇaṃ mārentassa, tiracchānagatampi ca.
49.
49.
ඡාදෙතුකාමො ඡාදෙති, දුට්ඨුල්ලං භික්ඛුනොපි ච;
Chādetukāmo chādeti, duṭṭhullaṃ bhikkhunopi ca;
ගාමන්තරගතස්සාපි, සංවිධායිත්ථියා සහ.
Gāmantaragatassāpi, saṃvidhāyitthiyā saha.
50.
50.
භික්ඛුං පහරතො වාපි, තලසත්තිකමුග්ගිරෙ;
Bhikkhuṃ paharato vāpi, talasattikamuggire;
චොදෙති වා චොදාපෙති, ගරුකාමූලකෙනපි.
Codeti vā codāpeti, garukāmūlakenapi.
51.
51.
කුක්කුච්චුප්පාදනෙ චාපි, භණ්ඩනත්ථායුපස්සුතිං;
Kukkuccuppādane cāpi, bhaṇḍanatthāyupassutiṃ;
සොතුං භණ්ඩනජාතානං, යාති පාචිත්තියං සියා.
Sotuṃ bhaṇḍanajātānaṃ, yāti pācittiyaṃ siyā.
52.
52.
සඞ්ඝස්ස ලාභං පරිණාමිතං තු,
Saṅghassa lābhaṃ pariṇāmitaṃ tu,
නාමෙති යො තං පරපුග්ගලස්ස;
Nāmeti yo taṃ parapuggalassa;
පුච්ඡං අකත්වාපි ච සන්තභික්ඛුං,
Pucchaṃ akatvāpi ca santabhikkhuṃ,
පාචිත්ති ගාමස්ස ගතෙ විකාලෙති.
Pācitti gāmassa gate vikāleti.
