| Library / Tipiṭaka / តិបិដក • Tipiṭaka / ចរិយាបិដកបាឡិ • Cariyāpiṭakapāḷi |
៦. និមិរាជចរិយា
6. Nimirājacariyā
៤០.
40.
‘‘បុនាបរំ យទា ហោមិ, មិថិលាយំ បុរុត្តមេ;
‘‘Punāparaṃ yadā homi, mithilāyaṃ puruttame;
និមិ នាម មហារាជា, បណ្ឌិតោ កុសលត្ថិកោ។
Nimi nāma mahārājā, paṇḍito kusalatthiko.
៤១.
41.
‘‘តទាហំ មាបយិត្វាន, ចតុស្សាលំ ចតុម្មុខំ;
‘‘Tadāhaṃ māpayitvāna, catussālaṃ catummukhaṃ;
តត្ថ ទានំ បវត្តេសិំ, មិគបក្ខិនរាទិនំ។
Tattha dānaṃ pavattesiṃ, migapakkhinarādinaṃ.
៤២.
42.
‘‘អច្ឆាទនញ្ច សយនំ, អន្នំ បានញ្ច ភោជនំ;
‘‘Acchādanañca sayanaṃ, annaṃ pānañca bhojanaṃ;
អព្ពោច្ឆិន្នំ ករិត្វាន, មហាទានំ បវត្តយិំ។
Abbocchinnaṃ karitvāna, mahādānaṃ pavattayiṃ.
៤៣.
43.
‘‘យថាបិ សេវកោ សាមិំ, ធនហេតុមុបាគតោ;
‘‘Yathāpi sevako sāmiṃ, dhanahetumupāgato;
កាយេន វាចា មនសា, អារាធនីយមេសតិ។
Kāyena vācā manasā, ārādhanīyamesati.
៤៤.
44.
‘‘តថេវាហំ សព្ពភវេ, បរិយេសិស្សាមិ ពោធិជំ;
‘‘Tathevāhaṃ sabbabhave, pariyesissāmi bodhijaṃ;
ទានេន សត្តេ តប្បេត្វា, ឥច្ឆាមិ ពោធិមុត្តម’’ន្តិ។
Dānena satte tappetvā, icchāmi bodhimuttama’’nti.
និមិរាជចរិយំ ឆដ្ឋំ។
Nimirājacariyaṃ chaṭṭhaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ចរិយាបិដក-អដ្ឋកថា • Cariyāpiṭaka-aṭṭhakathā / ៦. និមិរាជចរិយាវណ្ណនា • 6. Nimirājacariyāvaṇṇanā
