| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
७. निक्कड्ढनसिक्खापदवण्णना
7. Nikkaḍḍhanasikkhāpadavaṇṇanā
अनेककोट्ठकानीति अनेकद्वारकोट्ठकानि। ‘‘निक्खमाति वचनं सुत्वा अत्तनो रुचिया चे निक्खमति, अनापत्ती’’ति (सारत्थ॰ टी॰ पाचित्तिय १२६) वदन्ति।
Anekakoṭṭhakānīti anekadvārakoṭṭhakāni. ‘‘Nikkhamāti vacanaṃ sutvā attano ruciyā ce nikkhamati, anāpattī’’ti (sārattha. ṭī. pācittiya 126) vadanti.
तस्स परिक्खारनिक्कड्ढनेति तस्स सन्तकं यं किञ्चि पत्तचीवरपरिस्सावनधम्मकरणमञ्चपीठभिसिबिब्बोहनादिभेदं अन्तमसो रजनछल्लिपि अत्थि, तस्स परिक्खारस्स निक्कड्ढने। तञ्चाति दुक्कटं परामसति। निक्कड्ढापनेपि एसेव नयो। गाळ्हं बन्धित्वा ठपितेसु पन एकाव आपत्ति।
Tassaparikkhāranikkaḍḍhaneti tassa santakaṃ yaṃ kiñci pattacīvaraparissāvanadhammakaraṇamañcapīṭhabhisibibbohanādibhedaṃ antamaso rajanachallipi atthi, tassa parikkhārassa nikkaḍḍhane. Tañcāti dukkaṭaṃ parāmasati. Nikkaḍḍhāpanepi eseva nayo. Gāḷhaṃ bandhitvā ṭhapitesu pana ekāva āpatti.
भण्डनकारककलहकारकमेव सकलसङ्घारामतो निक्कड्ढितुं लभति। सो हि पक्खं लभित्वा सङ्घम्पि भिन्देय्य। अलज्जिआदयो पन अत्तनो वसनट्ठानतोयेव निक्कड्ढितब्बा। सकलसङ्घारामतो निक्कड्ढितुं न वट्टति। तेनाह ‘‘सकलसङ्घारामतोपी’’तिआदि।
Bhaṇḍanakārakakalahakārakameva sakalasaṅghārāmato nikkaḍḍhituṃ labhati. So hi pakkhaṃ labhitvā saṅghampi bhindeyya. Alajjiādayo pana attano vasanaṭṭhānatoyeva nikkaḍḍhitabbā. Sakalasaṅghārāmato nikkaḍḍhituṃ na vaṭṭati. Tenāha ‘‘sakalasaṅghārāmatopī’’tiādi.
निक्कड्ढनसिक्खापदवण्णना निट्ठिता।
Nikkaḍḍhanasikkhāpadavaṇṇanā niṭṭhitā.
