| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
១២. និគ្រោធកប្បសុត្តំ
12. Nigrodhakappasuttaṃ
ឯវំ មេ សុតំ – ឯកំ សមយំ ភគវា អាឡវិយំ វិហរតិ អគ្គាឡវេ ចេតិយេ។ តេន ខោ បន សមយេន អាយស្មតោ វង្គីសស្ស ឧបជ្ឈាយោ និគ្រោធកប្បោ នាម ថេរោ អគ្គាឡវេ ចេតិយេ អចិរបរិនិព្ពុតោ ហោតិ។ អថ ខោ អាយស្មតោ វង្គីសស្ស រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ – ‘‘បរិនិព្ពុតោ នុ ខោ មេ ឧបជ្ឈាយោ ឧទាហុ នោ បរិនិព្ពុតោ’’តិ? អថ ខោ អាយស្មា វង្គីសោ សាយន្ហសមយំ បដិសល្លានា វុដ្ឋិតោ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា វង្គីសោ ភគវន្តំ ឯតទវោច – ‘‘ឥធ មយ្ហំ, ភន្តេ, រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ – ‘បរិនិព្ពុតោ នុ ខោ មេ ឧបជ្ឈាយោ, ឧទាហុ នោ បរិនព្ពុតោ’’’តិ។ អថ ខោ អាយស្មា វង្គីសោ ឧដ្ឋាយាសនា ឯកំសំ ចីវរំ កត្វា យេន ភគវា តេនញ្ជលិំ បណាមេត្វា ភគវន្តំ គាថាយ អជ្ឈភាសិ –
Evaṃ me sutaṃ – ekaṃ samayaṃ bhagavā āḷaviyaṃ viharati aggāḷave cetiye. Tena kho pana samayena āyasmato vaṅgīsassa upajjhāyo nigrodhakappo nāma thero aggāḷave cetiye aciraparinibbuto hoti. Atha kho āyasmato vaṅgīsassa rahogatassa paṭisallīnassa evaṃ cetaso parivitakko udapādi – ‘‘parinibbuto nu kho me upajjhāyo udāhu no parinibbuto’’ti? Atha kho āyasmā vaṅgīso sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā vaṅgīso bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘parinibbuto nu kho me upajjhāyo, udāhu no parinabbuto’’’ti. Atha kho āyasmā vaṅgīso uṭṭhāyāsanā ekaṃsaṃ cīvaraṃ katvā yena bhagavā tenañjaliṃ paṇāmetvā bhagavantaṃ gāthāya ajjhabhāsi –
៣៤៥.
345.
‘‘បុច្ឆាម 1 សត្ថារមនោមបញ្ញំ, ទិដ្ឋេវ ធម្មេ យោ វិចិកិច្ឆានំ ឆេត្តា;
‘‘Pucchāma 2 satthāramanomapaññaṃ, diṭṭheva dhamme yo vicikicchānaṃ chettā;
អគ្គាឡវេ កាលមកាសិ ភិក្ខុ, ញាតោ យសស្សី អភិនិព្ពុតត្តោ។
Aggāḷave kālamakāsi bhikkhu, ñāto yasassī abhinibbutatto.
៣៤៦.
346.
‘‘និគ្រោធកប្បោ ឥតិ តស្ស នាមំ, តយា កតំ ភគវា ព្រាហ្មណស្ស;
‘‘Nigrodhakappo iti tassa nāmaṃ, tayā kataṃ bhagavā brāhmaṇassa;
សោ តំ នមស្សំ អចរិ មុត្យបេក្ខោ, អារទ្ធវីរិយោ ទឡ្ហធម្មទស្សី។
So taṃ namassaṃ acari mutyapekkho, āraddhavīriyo daḷhadhammadassī.
៣៤៧.
347.
‘‘តំ សាវកំ សក្យ 3 មយម្បិ សព្ពេ, អញ្ញាតុមិច្ឆាម សមន្តចក្ខុ;
‘‘Taṃ sāvakaṃ sakya 4 mayampi sabbe, aññātumicchāma samantacakkhu;
សមវដ្ឋិតា នោ សវនាយ សោតា, តុវំ នោ សត្ថា ត្វមនុត្តរោសិ។
Samavaṭṭhitā no savanāya sotā, tuvaṃ no satthā tvamanuttarosi.
៣៤៨.
348.
‘‘ឆិន្ទេវ នោ វិចិកិច្ឆំ ព្រូហិ មេតំ, បរិនិព្ពុតំ វេទយ ភូរិបញ្ញ;
‘‘Chindeva no vicikicchaṃ brūhi metaṃ, parinibbutaṃ vedaya bhūripañña;
មជ្ឈេវ 5 នោ ភាស សមន្តចក្ខុ, សក្កោវ ទេវាន សហស្សនេត្តោ។
Majjheva 6 no bhāsa samantacakkhu, sakkova devāna sahassanetto.
៣៤៩.
349.
‘‘យេ កេចិ គន្ថា ឥធ មោហមគ្គា, អញ្ញាណបក្ខា វិចិកិច្ឆឋានា;
‘‘Ye keci ganthā idha mohamaggā, aññāṇapakkhā vicikicchaṭhānā;
តថាគតំ បត្វា ន តេ ភវន្តិ, ចក្ខុញ្ហិ ឯតំ បរមំ នរានំ។
Tathāgataṃ patvā na te bhavanti, cakkhuñhi etaṃ paramaṃ narānaṃ.
៣៥០.
350.
‘‘នោ ចេ ហិ ជាតុ បុរិសោ កិលេសេ, វាតោ យថា អព្ភធនំ វិហានេ;
‘‘No ce hi jātu puriso kilese, vāto yathā abbhadhanaṃ vihāne;
តមោវស្ស និវុតោ សព្ពលោកោ, ន ជោតិមន្តោបិ នរា តបេយ្យុំ។
Tamovassa nivuto sabbaloko, na jotimantopi narā tapeyyuṃ.
៣៥១.
351.
‘‘ធីរា ច បជ្ជោតករា ភវន្តិ, តំ តំ អហំ វីរ 7 តថេវ មញ្ញេ;
‘‘Dhīrā ca pajjotakarā bhavanti, taṃ taṃ ahaṃ vīra 8 tatheva maññe;
វិបស្សិនំ ជានមុបាគមុម្ហា 9, បរិសាសុ នោ អាវិករោហិ កប្បំ។
Vipassinaṃ jānamupāgamumhā 10, parisāsu no āvikarohi kappaṃ.
៣៥២.
352.
‘‘ខិប្បំ គិរំ ឯរយ វគ្គុ វគ្គុំ, ហំសោវ បគ្គយ្ហ សណិកំ 11 និកូជ;
‘‘Khippaṃ giraṃ eraya vaggu vagguṃ, haṃsova paggayha saṇikaṃ 12 nikūja;
ពិន្ទុស្សរេន សុវិកប្បិតេន, សព្ពេវ តេ ឧជ្ជុគតា សុណោម។
Bindussarena suvikappitena, sabbeva te ujjugatā suṇoma.
៣៥៣.
353.
‘‘បហីនជាតិមរណំ អសេសំ, និគ្គយ្ហ ធោនំ 13 វទេស្សាមិ ធម្មំ;
‘‘Pahīnajātimaraṇaṃ asesaṃ, niggayha dhonaṃ 14 vadessāmi dhammaṃ;
ន កាមការោ ហិ បុថុជ្ជនានំ, សង្ខេយ្យការោ ច 15 តថាគតានំ។
Na kāmakāro hi puthujjanānaṃ, saṅkheyyakāro ca 16 tathāgatānaṃ.
៣៥៤.
354.
‘‘សម្បន្នវេយ្យាករណំ តវេទំ, សមុជ្ជុបញ្ញស្ស 17 សមុគ្គហីតំ;
‘‘Sampannaveyyākaraṇaṃ tavedaṃ, samujjupaññassa 18 samuggahītaṃ;
អយមញ្ជលី បច្ឆិមោ សុប្បណាមិតោ, មា មោហយី ជានមនោមបញ្ញ។
Ayamañjalī pacchimo suppaṇāmito, mā mohayī jānamanomapañña.
៣៥៥.
355.
‘‘បរោវរំ 19 អរិយធម្មំ វិទិត្វា, មា មោហយី ជានមនោមវីរ;
‘‘Parovaraṃ 20 ariyadhammaṃ viditvā, mā mohayī jānamanomavīra;
វារិំ យថា ឃម្មនិ ឃម្មតត្តោ, វាចាភិកង្ខាមិ សុតំ បវស្ស 21។
Vāriṃ yathā ghammani ghammatatto, vācābhikaṅkhāmi sutaṃ pavassa 22.
៣៥៦.
356.
‘‘យទត្ថិកំ 23 ព្រហ្មចរិយំ អចរី, កប្បាយនោ កច្ចិស្ស តំ អមោឃំ;
‘‘Yadatthikaṃ 24 brahmacariyaṃ acarī, kappāyano kaccissa taṃ amoghaṃ;
និព្ពាយិ សោ អាទុ សឧបាទិសេសោ, យថា វិមុត្តោ អហុ តំ សុណោម’’។
Nibbāyi so ādu saupādiseso, yathā vimutto ahu taṃ suṇoma’’.
៣៥៧.
357.
អតារិ ជាតិំ មរណំ អសេសំ,’’
Atāri jātiṃ maraṇaṃ asesaṃ,’’
ឥច្ចព្រវី ភគវា បញ្ចសេដ្ឋោ។
Iccabravī bhagavā pañcaseṭṭho.
៣៥៨.
358.
‘‘ឯស សុត្វា បសីទាមិ, វចោ តេ ឥសិសត្តម;
‘‘Esa sutvā pasīdāmi, vaco te isisattama;
អមោឃំ កិរ មេ បុដ្ឋំ, ន មំ វញ្ចេសិ ព្រាហ្មណោ។
Amoghaṃ kira me puṭṭhaṃ, na maṃ vañcesi brāhmaṇo.
៣៥៩.
359.
‘‘យថាវាទី តថាការី, អហុ ពុទ្ធស្ស សាវកោ;
‘‘Yathāvādī tathākārī, ahu buddhassa sāvako;
អច្ឆិទា មច្ចុនោ ជាលំ, តតំ មាយាវិនោ ទឡ្ហំ។
Acchidā maccuno jālaṃ, tataṃ māyāvino daḷhaṃ.
៣៦០.
360.
‘‘អទ្ទសា ភគវា អាទិំ, ឧបាទានស្ស កប្បិយោ;
‘‘Addasā bhagavā ādiṃ, upādānassa kappiyo;
អច្ចគា វត កប្បាយនោ, មច្ចុធេយ្យំ សុទុត្តរ’’ន្តិ។
Accagā vata kappāyano, maccudheyyaṃ suduttara’’nti.
និគ្រោធកប្បសុត្តំ ទ្វាទសមំ និដ្ឋិតំ។
Nigrodhakappasuttaṃ dvādasamaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ១២. និគ្រោធកប្បសុត្ត-(វង្គីសសុត្ត)-វណ្ណនា • 12. Nigrodhakappasutta-(vaṅgīsasutta)-vaṇṇanā
