| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ನಿಗಮನಕಥಾವಣ್ಣನಾ
Nigamanakathāvaṇṇanā
ಅವಸಾನಗಾಥಾಸು ಉಭತೋವಿಭಙ್ಗ-ಖನ್ಧಕ-ಪರಿವಾರೇಹಿ ವಿಭತ್ತತ್ತಾ ವಿಭಾಗಪಟಿದೇಸನಾ ಯಸ್ಮಿಂ ವಿನಯಪಿಟಕೇ। ಸೋ ಉಭತೋವಿಭಙ್ಗ-ಖನ್ಧಕ-ಪರಿವಾರವಿಭತ್ತದೇಸನೋ ಆಹಾತಿ ಯೋಜನಾ। ತಸ್ಸಾತಿ ವಿನಯಪಿಟಕಸ್ಸ।
Avasānagāthāsu ubhatovibhaṅga-khandhaka-parivārehi vibhattattā vibhāgapaṭidesanā yasmiṃ vinayapiṭake. So ubhatovibhaṅga-khandhaka-parivāravibhattadesano āhāti yojanā. Tassāti vinayapiṭakassa.
ಸತ್ಥು ಮಹಾಬೋಧೀತಿ ದಕ್ಖಿಣಸಾಖಂ ಸನ್ಧಾಯ ವದತಿ। ಯಂ ಪಧಾನಘರಂ ನಾಮ ಪರಿವೇಣಂ, ತತ್ಥ ಚಾರುಪಾಕಾರೇನ ಸಞ್ಚಿತಂ ಪರಿಕ್ಖಿತ್ತಂ ಯಂ ಪಾಸಾದಂ ಕಾರಯಿ, ತತ್ರ ತಸ್ಮಿಂ ಮಹಾನಿಗಮಸಾಮಿನೋ ಪಾಸಾದೇ ವಸತಾತಿ ಯೋಜೇತಬ್ಬಾ।
Satthu mahābodhīti dakkhiṇasākhaṃ sandhāya vadati. Yaṃ padhānagharaṃ nāma pariveṇaṃ, tattha cārupākārena sañcitaṃ parikkhittaṃ yaṃ pāsādaṃ kārayi, tatra tasmiṃ mahānigamasāmino pāsāde vasatāti yojetabbā.
ಬುದ್ಧಸಿರಿಂ ಉದ್ದಿಸಿತ್ವಾ ನಿಸ್ಸಾಯ, ತಸ್ಸ ವಾ ಅಜ್ಝೇಸನಮ್ಪಿ ಪಟಿಚ್ಚ ಯಾ ಇದ್ಧಾ ಪರಿಪುಣ್ಣವಿನಿಚ್ಛಯತಾಯ ಸಮಿದ್ಧಾ ವಿನಯಸಂವಣ್ಣನಾ ಆರದ್ಧಾತಿ ಯೋಜನಾ।
Buddhasiriṃ uddisitvā nissāya, tassa vā ajjhesanampi paṭicca yā iddhā paripuṇṇavinicchayatāya samiddhā vinayasaṃvaṇṇanā āraddhāti yojanā.
ಸಿರಿನಿವಾಸಸ್ಸಾತಿ ಸಿರಿಯಾ ನಿವಾಸನಟ್ಠಾನಭೂತಸ್ಸ ಸಿರಿಪಾಲನಾಮಕಸ್ಸ ರಞ್ಞೋ। ಜಯಸಂವಚ್ಛರೇತಿ ವಿಜಯಯುತ್ತೇ ಸಂವಚ್ಛರೇ। ಆರದ್ಧಕಾಲದಸ್ಸನತ್ಥಂ ಪುನ ‘‘ಜಯಸಂವಚ್ಛರೇ ಅಯಂ ಆರದ್ಧಾ’’ತಿ ವುತ್ತಂ।
Sirinivāsassāti siriyā nivāsanaṭṭhānabhūtassa siripālanāmakassa rañño. Jayasaṃvacchareti vijayayutte saṃvacchare. Āraddhakāladassanatthaṃ puna ‘‘jayasaṃvacchare ayaṃ āraddhā’’ti vuttaṃ.
ಕಾಲೇ ವಸ್ಸನ್ತಿ ಯುತ್ತಕಾಲೇ ವಸ್ಸನಸೀಲೋ। ದೇವೋತಿ ಮೇಘೋ।
Kālevassanti yuttakāle vassanasīlo. Devoti megho.
ನಿಗಮನಕಥಾವಣ್ಣನಾ ನಿಟ್ಠಿತಾ।
Nigamanakathāvaṇṇanā niṭṭhitā.
