| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ನಿಗಮನಕಥಾ
Nigamanakathā
ಏತ್ತಾವತಾ ಚ ಆರದ್ಧಾ, ವಿನಯಟ್ಠಕಥಾಯ ಯಾ।
Ettāvatā ca āraddhā, vinayaṭṭhakathāya yā;
ವಣ್ಣನಾ ನಾತಿವಿತ್ಥಿಣ್ಣಾ, ಪರಿಪುಣ್ಣವಿನಿಚ್ಛಯಾ॥
Vaṇṇanā nātivitthiṇṇā, paripuṇṇavinicchayā.
ಪಞ್ಞಾಸಭಾಣವಾರಾಯ, ತನ್ತಿಯಾ ಪರಿಮಾಣತೋ।
Paññāsabhāṇavārāya, tantiyā parimāṇato;
ಸಮಿಜ್ಝನಿಟ್ಠಿಪರಮಾ, ಯಾ ವಿಮತಿವಿನೋದನೀ॥
Samijjhaniṭṭhiparamā, yā vimativinodanī.
ಅನನ್ತರಾಯೇನ ಕತಾ, ಅಯಂ ನಿಟ್ಠಮುಪಾಗತಾ।
Anantarāyena katā, ayaṃ niṭṭhamupāgatā;
ಯಂ ತಂ ನಿಟ್ಠಂ ತಥಾ ಸಬ್ಬೇ, ಪಾಣಿನೋ ಸಮನೋರಥಾ॥
Yaṃ taṃ niṭṭhaṃ tathā sabbe, pāṇino samanorathā.
ಥೇರೇಹಿ ವಿನಯಞ್ಞೂಹಿ, ಸುಚಿಸಲ್ಲೇಖವುತ್ತಿಹಿ।
Therehi vinayaññūhi, sucisallekhavuttihi;
ಅವಿಸ್ಸತ್ಥಾತಿವಿತ್ಥಿಣ್ಣ-ಗನ್ಥಭೀರೂ ಹಿಪತ್ಥಿತಂ॥
Avissatthātivitthiṇṇa-ganthabhīrū hipatthitaṃ.
ಕರೋನ್ತೇನ ಮಯಾ ಏವಂ, ವಿನಯಅತ್ಥವಣ್ಣನಂ।
Karontena mayā evaṃ, vinayaatthavaṇṇanaṃ;
ಯಂ ಪತ್ತಂ ಕುಸಲಂ ತೇನ, ಪತ್ವಾ ಸಮ್ಬೋಧಿಮುತ್ತಮಂ॥
Yaṃ pattaṃ kusalaṃ tena, patvā sambodhimuttamaṃ.
ವಿನಯತ್ಥಂ ಪಕಾಸೇತ್ವಾ, ಯೋ ಸೋಪಾಯೇನ ಲಕ್ಖಣಂ।
Vinayatthaṃ pakāsetvā, yo sopāyena lakkhaṇaṃ;
ಸೋಪಾಯಂ ವಿಮತಿಚ್ಛೇದ-ಞಾಣಚಕ್ಖುಪದಾಯಕಂ॥
Sopāyaṃ vimaticcheda-ñāṇacakkhupadāyakaṃ.
ವಿರದ್ಧತ್ಥವಿಪಲ್ಲಾಸ-ಗನ್ಥವಿತ್ಥಾರಹಾನಿಯಾ।
Viraddhatthavipallāsa-ganthavitthārahāniyā;
ವಿಸುದ್ಧಿಂ ಪಾಪಯಿಸ್ಸಾಮಿ, ಸತ್ತೇ ಸಂಸಾರದುಕ್ಖತೋ॥
Visuddhiṃ pāpayissāmi, satte saṃsāradukkhato.
ಲೋಕಿಯೇಹಿ ಚ ಭೋಗೇಹಿ, ಗುಣೇಹಿ ನಿಖಿಲಾ ಪಜಾ।
Lokiyehi ca bhogehi, guṇehi nikhilā pajā;
ಸಬ್ಬೇಹಿ ಸಹಿತಾ ಹೋನ್ತು, ರತಾ ಸಮ್ಬುದ್ಧಸಾಸನೇತಿ॥
Sabbehi sahitā hontu, ratā sambuddhasāsaneti.
ವಿಮತಿವಿನೋದನೀಟೀಕಾ ನಿಟ್ಠಿತಾ।
Vimativinodanīṭīkā niṭṭhitā.
