| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
និគមនកថាវណ្ណនា
Nigamanakathāvaṇṇanā
អវសានគាថាសុ ឧភតោវិភង្គ-ខន្ធក-បរិវារេហិ វិភត្តត្តា វិភាគបដិទេសនា យស្មិំ វិនយបិដកេ។ សោ ឧភតោវិភង្គ-ខន្ធក-បរិវារវិភត្តទេសនោ អាហាតិ យោជនា។ តស្សាតិ វិនយបិដកស្ស។
Avasānagāthāsu ubhatovibhaṅga-khandhaka-parivārehi vibhattattā vibhāgapaṭidesanā yasmiṃ vinayapiṭake. So ubhatovibhaṅga-khandhaka-parivāravibhattadesano āhāti yojanā. Tassāti vinayapiṭakassa.
សត្ថុ មហាពោធីតិ ទក្ខិណសាខំ សន្ធាយ វទតិ។ យំ បធានឃរំ នាម បរិវេណំ, តត្ថ ចារុបាការេន សញ្ចិតំ បរិក្ខិត្តំ យំ បាសាទំ ការយិ, តត្រ តស្មិំ មហានិគមសាមិនោ បាសាទេ វសតាតិ យោជេតព្ពា។
Satthu mahābodhīti dakkhiṇasākhaṃ sandhāya vadati. Yaṃ padhānagharaṃ nāma pariveṇaṃ, tattha cārupākārena sañcitaṃ parikkhittaṃ yaṃ pāsādaṃ kārayi, tatra tasmiṃ mahānigamasāmino pāsāde vasatāti yojetabbā.
ពុទ្ធសិរិំ ឧទ្ទិសិត្វា និស្សាយ, តស្ស វា អជ្ឈេសនម្បិ បដិច្ច យា ឥទ្ធា បរិបុណ្ណវិនិច្ឆយតាយ សមិទ្ធា វិនយសំវណ្ណនា អារទ្ធាតិ យោជនា។
Buddhasiriṃ uddisitvā nissāya, tassa vā ajjhesanampi paṭicca yā iddhā paripuṇṇavinicchayatāya samiddhā vinayasaṃvaṇṇanā āraddhāti yojanā.
សិរិនិវាសស្សាតិ សិរិយា និវាសនដ្ឋានភូតស្ស សិរិបាលនាមកស្ស រញ្ញោ។ ជយសំវច្ឆរេតិ វិជយយុត្តេ សំវច្ឆរេ។ អារទ្ធកាលទស្សនត្ថំ បុន ‘‘ជយសំវច្ឆរេ អយំ អារទ្ធា’’តិ វុត្តំ។
Sirinivāsassāti siriyā nivāsanaṭṭhānabhūtassa siripālanāmakassa rañño. Jayasaṃvacchareti vijayayutte saṃvacchare. Āraddhakāladassanatthaṃ puna ‘‘jayasaṃvacchare ayaṃ āraddhā’’ti vuttaṃ.
កាលេ វស្សន្តិ យុត្តកាលេ វស្សនសីលោ។ ទេវោតិ មេឃោ។
Kālevassanti yuttakāle vassanasīlo. Devoti megho.
និគមនកថាវណ្ណនា និដ្ឋិតា។
Nigamanakathāvaṇṇanā niṭṭhitā.
