| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
និគមនកថា
Nigamanakathā
ឯត្តាវតា ច អារទ្ធា, វិនយដ្ឋកថាយ យា;
Ettāvatā ca āraddhā, vinayaṭṭhakathāya yā;
វណ្ណនា នាតិវិត្ថិណ្ណា, បរិបុណ្ណវិនិច្ឆយា។
Vaṇṇanā nātivitthiṇṇā, paripuṇṇavinicchayā.
បញ្ញាសភាណវារាយ, តន្តិយា បរិមាណតោ;
Paññāsabhāṇavārāya, tantiyā parimāṇato;
សមិជ្ឈនិដ្ឋិបរមា, យា វិមតិវិនោទនី។
Samijjhaniṭṭhiparamā, yā vimativinodanī.
អនន្តរាយេន កតា, អយំ និដ្ឋមុបាគតា;
Anantarāyena katā, ayaṃ niṭṭhamupāgatā;
យំ តំ និដ្ឋំ តថា សព្ពេ, បាណិនោ សមនោរថា។
Yaṃ taṃ niṭṭhaṃ tathā sabbe, pāṇino samanorathā.
ថេរេហិ វិនយញ្ញូហិ, សុចិសល្លេខវុត្តិហិ;
Therehi vinayaññūhi, sucisallekhavuttihi;
អវិស្សត្ថាតិវិត្ថិណ្ណ-គន្ថភីរូ ហិបត្ថិតំ។
Avissatthātivitthiṇṇa-ganthabhīrū hipatthitaṃ.
ករោន្តេន មយា ឯវំ, វិនយអត្ថវណ្ណនំ;
Karontena mayā evaṃ, vinayaatthavaṇṇanaṃ;
យំ បត្តំ កុសលំ តេន, បត្វា សម្ពោធិមុត្តមំ។
Yaṃ pattaṃ kusalaṃ tena, patvā sambodhimuttamaṃ.
វិនយត្ថំ បកាសេត្វា, យោ សោបាយេន លក្ខណំ;
Vinayatthaṃ pakāsetvā, yo sopāyena lakkhaṇaṃ;
សោបាយំ វិមតិច្ឆេទ-ញាណចក្ខុបទាយកំ។
Sopāyaṃ vimaticcheda-ñāṇacakkhupadāyakaṃ.
វិរទ្ធត្ថវិបល្លាស-គន្ថវិត្ថារហានិយា;
Viraddhatthavipallāsa-ganthavitthārahāniyā;
វិសុទ្ធិំ បាបយិស្សាមិ, សត្តេ សំសារទុក្ខតោ។
Visuddhiṃ pāpayissāmi, satte saṃsāradukkhato.
លោកិយេហិ ច ភោគេហិ, គុណេហិ និខិលា បជា;
Lokiyehi ca bhogehi, guṇehi nikhilā pajā;
សព្ពេហិ សហិតា ហោន្តុ, រតា សម្ពុទ្ធសាសនេតិ។
Sabbehi sahitā hontu, ratā sambuddhasāsaneti.
វិមតិវិនោទនីដីកា និដ្ឋិតា។
Vimativinodanīṭīkā niṭṭhitā.
