| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
निगमनकथावण्णना
Nigamanakathāvaṇṇanā
४७३. यस्मा कारणा या सिक्खना, अयं भिक्खुकिच्चं, अतो तस्मा कारणाति अत्थो।
473. Yasmā kāraṇā yā sikkhanā, ayaṃ bhikkhukiccaṃ, ato tasmā kāraṇāti attho.
४७४. निच्चसो लोकविचारिनोति निच्चं लोके विचरतो। मालुतस्सेव परिस्समो न सम्भोतीति योजना। मालुतस्सेवाति वातस्स इव। न सम्भोतीति न होति।
474.Niccaso lokavicārinoti niccaṃ loke vicarato. Mālutasseva parissamo na sambhotīti yojanā. Mālutassevāti vātassa iva. Na sambhotīti na hoti.
४७५-६. तम्बपण्णि एव तम्बपण्णियो, केतु विय केतु, तम्बपण्णिये केतूति तप्पुरिसो। तेन रचिता धम्मविनयञ्ञुपसंसिता अयं खुद्दसिक्खा परिमाणतो गाथानं पञ्चमत्तेहि सतेहि एत्तावता निट्ठानमुपागताति सम्बन्धो।
475-6. Tambapaṇṇi eva tambapaṇṇiyo, ketu viya ketu, tambapaṇṇiye ketūti tappuriso. Tena racitā dhammavinayaññupasaṃsitā ayaṃ khuddasikkhā parimāṇato gāthānaṃ pañcamattehi satehi ettāvatā niṭṭhānamupāgatāti sambandho.
निगमनकथावण्णना निट्ठिता।
Nigamanakathāvaṇṇanā niṭṭhitā.
