| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
निगमनकथा
Nigamanakathā
कारापितेतिरुचिरे पवरे विहारे।
Kārāpitetirucire pavare vihāre;
मानाधिकारिपुरिना गरुना गुणेन।
Mānādhikāripurinā garunā guṇena;
वस्सं वसं दमिळसो विधहं अकासिं।
Vassaṃ vasaṃ damiḷaso vidhahaṃ akāsiṃ;
आकङ्खटीक जिनसासनसम्पवुद्धिं॥
Ākaṅkhaṭīka jinasāsanasampavuddhiṃ.
पुञ्ञेन सत्थरचनाजनितेन तेन।
Puññena sattharacanājanitena tena;
सम्बुद्धसासनवरोदयकारणेन।
Sambuddhasāsanavarodayakāraṇena;
लोकामिसेसु पन मे समयं अलग्गो।
Lokāmisesu pana me samayaṃ alaggo;
सम्बुद्धसासनवरोदयमाचरेय्यं॥
Sambuddhasāsanavarodayamācareyyaṃ.
अत्थेसु अक्खरपदेसु विनिच्छयेसु।
Atthesu akkharapadesu vinicchayesu;
पुब्बापरेसु लिखितं खलितं यदत्थि।
Pubbāparesu likhitaṃ khalitaṃ yadatthi;
ओहाय खन्तुमरहन्ति वदन्तु सन्ता।
Ohāya khantumarahanti vadantu santā;
दिट्ठापराधमथ वा किमुलालनेन॥
Diṭṭhāparādhamatha vā kimulālanena.
येनन्ततन्तरतनाकरमन्थनेन।
Yenantatantaratanākaramanthanena;
मन्थाचलोल्लसितञाणवरेन लद्धा।
Manthācalollasitañāṇavarena laddhā;
सारामतातिसुखिता सुखयन्ति चञ्ञे।
Sārāmatātisukhitā sukhayanti caññe;
ते मे जयन्ति गरवो गरवो गुणेहि॥
Te me jayanti garavo garavo guṇehi.
परत्थसम्पादनतो, पुञ्ञेनाधिगतेनहं।
Paratthasampādanato, puññenādhigatenahaṃ;
परत्थसम्पादनको, भवेय्यं जातिजातियं॥
Paratthasampādanako, bhaveyyaṃ jātijātiyaṃ.
सिस्सो आह –
Sisso āha –
परमप्पिच्छतानेकसन्तोसोपसमेसिनं।
Paramappicchatānekasantosopasamesinaṃ;
सुचिसल्लेखवुत्तीनं, सदारञ्ञनिवासिनं॥
Sucisallekhavuttīnaṃ, sadāraññanivāsinaṃ.
सासनुज्जोतकारीनं, आचेरत्तमुपागतं।
Sāsanujjotakārīnaṃ, ācerattamupāgataṃ;
उदुम्बरगिरिख्यातयतीनं यतिपुङ्गवं॥
Udumbaragirikhyātayatīnaṃ yatipuṅgavaṃ.
मेधङ्कर इति ख्यातनामधेय्यं तपोधनं।
Medhaṅkara iti khyātanāmadheyyaṃ tapodhanaṃ;
थेरं थिरदयामेधानिधानं साधुपूजितं॥
Theraṃ thiradayāmedhānidhānaṃ sādhupūjitaṃ.
सिस्सं सहायमागम्म, कल्याणमित्तमत्तनो।
Sissaṃ sahāyamāgamma, kalyāṇamittamattano;
सोधेतुं सासनं सत्थु, परक्कममकासि यो॥
Sodhetuṃ sāsanaṃ satthu, parakkamamakāsi yo.
सुसद्दसिद्धिं यो योगनिच्छयं सब्भि वण्णितं।
Susaddasiddhiṃ yo yoganicchayaṃ sabbhi vaṇṇitaṃ;
अका सुबोधालङ्कारं, वुत्तोदयमनाकुलं॥
Akā subodhālaṅkāraṃ, vuttodayamanākulaṃ.
सङ्घरक्खितनामेन, महाथेरेन धीमता।
Saṅgharakkhitanāmena, mahātherena dhīmatā;
निवासभूतेनानेकगुणानप्पिच्छतादिनं॥
Nivāsabhūtenānekaguṇānappicchatādinaṃ.
तेनेव रचिता साधु, सासनोदयकारिना।
Teneva racitā sādhu, sāsanodayakārinā;
खुद्दसिक्खाय टीकापि, सुमङ्गलप्पसादनी॥
Khuddasikkhāya ṭīkāpi, sumaṅgalappasādanī.
निगमनकथा निट्ठिता।
Nigamanakathā niṭṭhitā.
इति सुमङ्गलप्पसादनी नाम
Iti sumaṅgalappasādanī nāma
खुद्दसिक्खा-अभिनवटीका समत्ता।
Khuddasikkhā-abhinavaṭīkā samattā.
