| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
নিগমনকথাৰণ্ণনা
Nigamanakathāvaṇṇanā
অৰসানগাথাসু উভতোৰিভঙ্গ-খন্ধক-পরিৰারেহি ৰিভত্তত্তা ৰিভাগপটিদেসনা যস্মিং ৰিনযপিটকে। সো উভতোৰিভঙ্গ-খন্ধক-পরিৰারৰিভত্তদেসনো আহাতি যোজনা। তস্সাতি ৰিনযপিটকস্স।
Avasānagāthāsu ubhatovibhaṅga-khandhaka-parivārehi vibhattattā vibhāgapaṭidesanā yasmiṃ vinayapiṭake. So ubhatovibhaṅga-khandhaka-parivāravibhattadesano āhāti yojanā. Tassāti vinayapiṭakassa.
সত্থু মহাবোধীতি দক্খিণসাখং সন্ধায ৰদতি। যং পধানঘরং নাম পরিৰেণং, তত্থ চারুপাকারেন সঞ্চিতং পরিক্খিত্তং যং পাসাদং কারযি, তত্র তস্মিং মহানিগমসামিনো পাসাদে ৰসতাতি যোজেতব্বা।
Satthu mahābodhīti dakkhiṇasākhaṃ sandhāya vadati. Yaṃ padhānagharaṃ nāma pariveṇaṃ, tattha cārupākārena sañcitaṃ parikkhittaṃ yaṃ pāsādaṃ kārayi, tatra tasmiṃ mahānigamasāmino pāsāde vasatāti yojetabbā.
বুদ্ধসিরিং উদ্দিসিত্ৰা নিস্সায, তস্স ৰা অজ্ঝেসনম্পি পটিচ্চ যা ইদ্ধা পরিপুণ্ণৰিনিচ্ছযতায সমিদ্ধা ৰিনযসংৰণ্ণনা আরদ্ধাতি যোজনা।
Buddhasiriṃ uddisitvā nissāya, tassa vā ajjhesanampi paṭicca yā iddhā paripuṇṇavinicchayatāya samiddhā vinayasaṃvaṇṇanā āraddhāti yojanā.
সিরিনিৰাসস্সাতি সিরিযা নিৰাসনট্ঠানভূতস্স সিরিপালনামকস্স রঞ্ঞো। জযসংৰচ্ছরেতি ৰিজযযুত্তে সংৰচ্ছরে। আরদ্ধকালদস্সনত্থং পুন ‘‘জযসংৰচ্ছরে অযং আরদ্ধা’’তি ৰুত্তং।
Sirinivāsassāti siriyā nivāsanaṭṭhānabhūtassa siripālanāmakassa rañño. Jayasaṃvacchareti vijayayutte saṃvacchare. Āraddhakāladassanatthaṃ puna ‘‘jayasaṃvacchare ayaṃ āraddhā’’ti vuttaṃ.
কালে ৰস্সন্তি যুত্তকালে ৰস্সনসীলো। দেৰোতি মেঘো।
Kālevassanti yuttakāle vassanasīlo. Devoti megho.
নিগমনকথাৰণ্ণনা নিট্ঠিতা।
Nigamanakathāvaṇṇanā niṭṭhitā.
