| Library / Tipiṭaka / तिपिटक • Tipiṭaka / नेत्तिविभाविनी • Nettivibhāvinī |
निगमनकथा
Nigamanakathā
सब्बसत्तुत्तमो नाथो, लोके उप्पज्जि नायको।
Sabbasattuttamo nātho, loke uppajji nāyako;
सम्बुद्धो गोतमो जिनो, अनेकगुणलङ्कतो॥
Sambuddho gotamo jino, anekaguṇalaṅkato.
सासनं तस्स सेट्ठस्स, अट्ठवस्ससताधिकं।
Sāsanaṃ tassa seṭṭhassa, aṭṭhavassasatādhikaṃ;
द्विसहस्सं यदा पत्तं, निम्मलं वड्ढनं सुभं॥
Dvisahassaṃ yadā pattaṃ, nimmalaṃ vaḍḍhanaṃ subhaṃ.
तदा भूमिस्सरो महाधम्मराजा महिद्धिको।
Tadā bhūmissaro mahādhammarājā mahiddhiko;
आणाचक्केन सारेति, राजा नोअनुवत्तके॥
Āṇācakkena sāreti, rājā noanuvattake.
लद्धा सेतगजे वरे, लोके विम्हयजानके।
Laddhā setagaje vare, loke vimhayajānake;
अप्पमत्तो महावीरो, पुञ्ञं कत्वाभिमोदति॥
Appamatto mahāvīro, puññaṃ katvābhimodati.
तस्मिं वस्सेव सावणे, मासे नवमदिवसे।
Tasmiṃ vasseva sāvaṇe, māse navamadivase;
सूरियुग्गमने काले, निब्बत्तायं विभावना॥
Sūriyuggamane kāle, nibbattāyaṃ vibhāvanā.
यत्तकं सासनं ठितं, तत्तकं रचितं मया।
Yattakaṃ sāsanaṃ ṭhitaṃ, tattakaṃ racitaṃ mayā;
ठातु नेत्तिविभावना, जिनपुत्तहितावहा॥
Ṭhātu nettivibhāvanā, jinaputtahitāvahā.
इति तं रचयन्तेन, पुञ्ञं अधिगतं मया।
Iti taṃ racayantena, puññaṃ adhigataṃ mayā;
होन्तु तस्सानुभावेन, सब्बे विमुत्तिभागिनो॥
Hontu tassānubhāvena, sabbe vimuttibhāgino.
राजदेवी पुत्तनत्ता, पनत्ता च सजातिका।
Rājadevī puttanattā, panattā ca sajātikā;
सब्बे रज्जसुखे ठत्वा, चरन्तु चरितं सुखी॥
Sabbe rajjasukhe ṭhatvā, carantu caritaṃ sukhī.
देवो काले सुवस्सतु, सब्बो रट्ठजनो सुखी।
Devo kāle suvassatu, sabbo raṭṭhajano sukhī;
अञ्ञमञ्ञं अहिंसन्तो, पियो होतु हितावहोति॥
Aññamaññaṃ ahiṃsanto, piyo hotu hitāvahoti.
नेत्तिविभाविनी निट्ठिता।
Nettivibhāvinī niṭṭhitā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / नेत्तिप्पकरण-अट्ठकथा • Nettippakaraṇa-aṭṭhakathā / निगमनकथा • Nigamanakathā
टीका • Tīkā / सुत्तपिटक (टीका) • Suttapiṭaka (ṭīkā) / खुद्दकनिकाय (टीका) • Khuddakanikāya (ṭīkā) / नेत्तिप्पकरण-टीका • Nettippakaraṇa-ṭīkā / निगमनकथावण्णना • Nigamanakathāvaṇṇanā
