| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕಪಾಳಿ • Itivuttakapāḷi |
೭. ನಿಬ್ಬಾನಧಾತುಸುತ್ತಂ
7. Nibbānadhātusuttaṃ
೪೪. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –
44. Vuttañhetaṃ bhagavatā, vuttamarahatāti me sutaṃ –
‘‘ದ್ವೇಮಾ, ಭಿಕ್ಖವೇ, ನಿಬ್ಬಾನಧಾತುಯೋ। ಕತಮೇ ದ್ವೇ? ಸಉಪಾದಿಸೇಸಾ ಚ ನಿಬ್ಬಾನಧಾತು, ಅನುಪಾದಿಸೇಸಾ ಚ ನಿಬ್ಬಾನಧಾತು।
‘‘Dvemā, bhikkhave, nibbānadhātuyo. Katame dve? Saupādisesā ca nibbānadhātu, anupādisesā ca nibbānadhātu.
‘‘ಕತಮಾ ಚ, ಭಿಕ್ಖವೇ, ಸಉಪಾದಿಸೇಸಾ ನಿಬ್ಬಾನಧಾತು? ಇಧ, ಭಿಕ್ಖವೇ, ಭಿಕ್ಖು ಅರಹಂ ಹೋತಿ ಖೀಣಾಸವೋ ವುಸಿತವಾ ಕತಕರಣೀಯೋ ಓಹಿತಭಾರೋ ಅನುಪ್ಪತ್ತಸದತ್ಥೋ ಪರಿಕ್ಖೀಣಭವಸಂಯೋಜನೋ ಸಮ್ಮದಞ್ಞಾ ವಿಮುತ್ತೋ। ತಸ್ಸ ತಿಟ್ಠನ್ತೇವ ಪಞ್ಚಿನ್ದ್ರಿಯಾನಿ ಯೇಸಂ ಅವಿಘಾತತ್ತಾ 1 ಮನಾಪಾಮನಾಪಂ ಪಚ್ಚನುಭೋತಿ, ಸುಖದುಕ್ಖಂ ಪಟಿಸಂವೇದೇತಿ । ತಸ್ಸ ಯೋ ರಾಗಕ್ಖಯೋ, ದೋಸಕ್ಖಯೋ, ಮೋಹಕ್ಖಯೋ – ಅಯಂ ವುಚ್ಚತಿ, ಭಿಕ್ಖವೇ, ಸಉಪಾದಿಸೇಸಾ ನಿಬ್ಬಾನಧಾತು।
‘‘Katamā ca, bhikkhave, saupādisesā nibbānadhātu? Idha, bhikkhave, bhikkhu arahaṃ hoti khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto. Tassa tiṭṭhanteva pañcindriyāni yesaṃ avighātattā 2 manāpāmanāpaṃ paccanubhoti, sukhadukkhaṃ paṭisaṃvedeti . Tassa yo rāgakkhayo, dosakkhayo, mohakkhayo – ayaṃ vuccati, bhikkhave, saupādisesā nibbānadhātu.
‘‘ಕತಮಾ ಚ, ಭಿಕ್ಖವೇ, ಅನುಪಾದಿಸೇಸಾ ನಿಬ್ಬಾನಧಾತು? ಇಧ, ಭಿಕ್ಖವೇ, ಭಿಕ್ಖು ಅರಹಂ ಹೋತಿ ಖೀಣಾಸವೋ ವುಸಿತವಾ ಕತಕರಣೀಯೋ ಓಹಿತಭಾರೋ ಅನುಪ್ಪತ್ತಸದತ್ಥೋ ಪರಿಕ್ಖೀಣಭವಸಂಯೋಜನೋ ಸಮ್ಮದಞ್ಞಾ ವಿಮುತ್ತೋ। ತಸ್ಸ ಇಧೇವ, ಭಿಕ್ಖವೇ, ಸಬ್ಬವೇದಯಿತಾನಿ ಅನಭಿನನ್ದಿತಾನಿ ಸೀತಿ ಭವಿಸ್ಸನ್ತಿ 3। ಅಯಂ ವುಚ್ಚತಿ, ಭಿಕ್ಖವೇ, ಅನುಪಾದಿಸೇಸಾ ನಿಬ್ಬಾನಧಾತು। ಇಮಾ ಖೋ, ಭಿಕ್ಖವೇ, ದ್ವೇ ನಿಬ್ಬಾನಧಾತುಯೋ’’ತಿ। ಏತಮತ್ಥಂ ಭಗವಾ ಅವೋಚ। ತತ್ಥೇತಂ ಇತಿ ವುಚ್ಚತಿ –
‘‘Katamā ca, bhikkhave, anupādisesā nibbānadhātu? Idha, bhikkhave, bhikkhu arahaṃ hoti khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto. Tassa idheva, bhikkhave, sabbavedayitāni anabhinanditāni sīti bhavissanti 4. Ayaṃ vuccati, bhikkhave, anupādisesā nibbānadhātu. Imā kho, bhikkhave, dve nibbānadhātuyo’’ti. Etamatthaṃ bhagavā avoca. Tatthetaṃ iti vuccati –
‘‘ದುವೇ ಇಮಾ ಚಕ್ಖುಮತಾ ಪಕಾಸಿತಾ, ನಿಬ್ಬಾನಧಾತೂ ಅನಿಸ್ಸಿತೇನ ತಾದಿನಾ।
‘‘Duve imā cakkhumatā pakāsitā, nibbānadhātū anissitena tādinā;
ಏಕಾ ಹಿ ಧಾತು ಇಧ ದಿಟ್ಠಧಮ್ಮಿಕಾ, ಸಉಪಾದಿಸೇಸಾ ಭವನೇತ್ತಿಸಙ್ಖಯಾ।
Ekā hi dhātu idha diṭṭhadhammikā, saupādisesā bhavanettisaṅkhayā;
ಅನುಪಾದಿಸೇಸಾ ಪನ ಸಮ್ಪರಾಯಿಕಾ, ಯಮ್ಹಿ ನಿರುಜ್ಝನ್ತಿ ಭವಾನಿ ಸಬ್ಬಸೋ॥
Anupādisesā pana samparāyikā, yamhi nirujjhanti bhavāni sabbaso.
‘‘ಯೇ ಏತದಞ್ಞಾಯ ಪದಂ ಅಸಙ್ಖತಂ, ವಿಮುತ್ತಚಿತ್ತಾ ಭವನೇತ್ತಿಸಙ್ಖಯಾ।
‘‘Ye etadaññāya padaṃ asaṅkhataṃ, vimuttacittā bhavanettisaṅkhayā;
ತೇ ಧಮ್ಮಸಾರಾಧಿಗಮಾ ಖಯೇ ರತಾ, ಪಹಂಸು ತೇ ಸಬ್ಬಭವಾನಿ ತಾದಿನೋ’’ತಿ॥
Te dhammasārādhigamā khaye ratā, pahaṃsu te sabbabhavāni tādino’’ti.
ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ। ಸತ್ತಮಂ।
Ayampi attho vutto bhagavatā, iti me sutanti. Sattamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā / ೭. ನಿಬ್ಬಾನಧಾತುಸುತ್ತವಣ್ಣನಾ • 7. Nibbānadhātusuttavaṇṇanā
