| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৬. নেরযিকগ্গিউণ্হভাৰপঞ্হো
6. Nerayikaggiuṇhabhāvapañho
৬. রাজা আহ ‘‘ভন্তে নাগসেন, তুম্হে ভণথ ‘পাকতিকঅগ্গিতো নেরযিকো অগ্গি মহাভিতাপতরো হোতি, খুদ্দকোপি পাসাণো পাকতিকে অগ্গিম্হি পক্খিত্তো দিৰসম্পি পচ্চমানো 1 ন ৰিলযং গচ্ছতি, কূটাগারমত্তোপি পাসাণো নেরযিকগ্গিম্হি পক্খিত্তো খণেন ৰিলযং গচ্ছতী’তি, এতং ৰচনং ন সদ্দহামি, এৰঞ্চ পন ৰদেথ ‘যে চ তত্থ উপ্পন্না সত্তা, তে অনেকানিপি ৰস্সসহস্সানি নিরযে পচ্চমানা ন ৰিলযং গচ্ছন্তী’তি, তম্পি ৰচনং ন সদ্দহামী’’তি।
6. Rājā āha ‘‘bhante nāgasena, tumhe bhaṇatha ‘pākatikaaggito nerayiko aggi mahābhitāpataro hoti, khuddakopi pāsāṇo pākatike aggimhi pakkhitto divasampi paccamāno 2 na vilayaṃ gacchati, kūṭāgāramattopi pāsāṇo nerayikaggimhi pakkhitto khaṇena vilayaṃ gacchatī’ti, etaṃ vacanaṃ na saddahāmi, evañca pana vadetha ‘ye ca tattha uppannā sattā, te anekānipi vassasahassāni niraye paccamānā na vilayaṃ gacchantī’ti, tampi vacanaṃ na saddahāmī’’ti.
থেরো আহ ‘‘তং কিং মঞ্ঞসি, মহারাজ, যা তা সন্তি মকরিনিযোপি সুসুমারিনিযোপি কচ্ছপিনিযোপি মোরিনিযোপি কপোতিনিযোপি, কিংনু তা কক্খল়ানি পাসাণানি সক্খরাযো চ খাদন্তী’’তি? ‘‘আম, ভন্তে, খাদন্তী’’তি। ‘‘কিং পন তানি তাসং কুচ্ছিযং কোট্ঠব্ভন্তরগতানি ৰিলযং গচ্ছন্তী’’তি? ‘‘আম, ভন্তে, ৰিলযং গচ্ছন্তী’’তি। ‘‘যো পন তাসং কুচ্ছিযং গব্ভো, সোপি ৰিলযং গচ্ছতী’’তি? ‘‘ন হি ভন্তে’’তি। ‘‘কেন কারণেনা’’তি? ‘‘মঞ্ঞামি, ভন্তে, কম্মাধিকতেন ন ৰিলযং গচ্ছতী’’তি। ‘‘এৰমেৰ খো, মহারাজ, কম্মাধিকতেন নেরযিকা সত্তা অনেকানিপি ৰস্সসহস্সানি নিরযে পচ্চমানা ন ৰিলযং গচ্ছন্তি। ভাসিতম্পেতং, মহারাজ, ভগৰতা – ‘সো ন তাৰ কালং করোতি, যাৰ ন তং পাপকম্মং ব্যন্তীহোতী’’’তি।
Thero āha ‘‘taṃ kiṃ maññasi, mahārāja, yā tā santi makariniyopi susumāriniyopi kacchapiniyopi moriniyopi kapotiniyopi, kiṃnu tā kakkhaḷāni pāsāṇāni sakkharāyo ca khādantī’’ti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho, sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti? ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchanti. Bhāsitampetaṃ, mahārāja, bhagavatā – ‘so na tāva kālaṃ karoti, yāva na taṃ pāpakammaṃ byantīhotī’’’ti.
‘‘ভিয্যো ওপম্মং করোহী’’তি। ‘‘তং কিং মঞ্ঞসি, মহারাজ, যা তা সন্তি সীহিনিযোপি ব্যগ্ঘিনিযোপি দীপিনিযোপি কুক্কুরিনিযোপি, কিংনু তা কক্খল়ানি অট্ঠিকানি মংসানি খাদন্তীতি? ‘‘আম, ভন্তে, খাদন্তী’’তি। ‘‘কিং পন তানি তাসং কুচ্ছিযং কোট্ঠব্ভন্তরগতানি ৰিলযং গচ্ছন্তী’’তি? ‘‘আম, ভন্তে, ৰিলযং গচ্ছন্তী’’তি। ‘‘যো পন তাসং কুচ্ছিযং গব্ভো, সোপি ৰিলযং গচ্ছতী’’তি? ‘‘ন হি ভন্তে’’তি। ‘‘কেন কারণেনা’’তি? ‘‘মঞ্ঞামি, ভন্তে, কম্মাধিকতেন ন ৰিলযং গচ্ছতী’’তি। ‘‘এৰমেৰ খো, মহারাজ, কম্মাধিকতেন নেরযিকা সত্তা অনেকানিপি ৰস্সসহস্সানি নিরযে পচ্চমানা ন ৰিলযং গচ্ছন্তী’’তি।
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, yā tā santi sīhiniyopi byagghiniyopi dīpiniyopi kukkuriniyopi, kiṃnu tā kakkhaḷāni aṭṭhikāni maṃsāni khādantīti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho, sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti? ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchantī’’ti.
‘‘ভিয্যো ওপম্মং করোহী’’তি। ‘‘তং কিং মঞ্ঞসি, মহারাজ, যা তা সন্তি যোনকসুখুমালিনিযোপি খত্তিযসুখুমালিনিযোপি ব্রাহ্মণসুখুমালিনিযোপি গহপতিসুখুমালিনিযোপি, কিংনু তা কক্খল়ানি খজ্জকানি মংসানি খাদন্তী’’তি? ‘‘আম, ভন্তে, খাদন্তী’’তি। ‘‘কিং পন তানি তাসং কুচ্ছিযং কোট্ঠব্ভন্তরগতানি ৰিলযং গচ্ছন্তী’’তি? ‘‘আম, ভন্তে, ৰিলযং গচ্ছন্তী’’তি। ‘‘যো পন তাসং কুচ্ছিযং গব্ভো সোপি ৰিলযং গচ্ছতী’’তি? ‘‘ন হি ভন্তে’’তি। ‘‘কেন কারণেনা’’তি। ‘‘মঞ্ঞামি, ভন্তে, কম্মাধিকতেন ন ৰিলযং গচ্ছতী’’তি। ‘‘এৰমেৰ খো, মহারাজ, কম্মাধিকতেন নেরযিকা সত্তা অনেকানিপি ৰস্সসহস্সানি নিরযে পচ্চমানা ন ৰিলযং গচ্ছন্তি। ভাসিতম্পেতং, মহারাজ, ভগৰতা – ‘‘সো ন তাৰ কালং করোতি, যাৰ ন তং পাপকম্মং ব্যন্তীহোতী’’তি।
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, yā tā santi yonakasukhumāliniyopi khattiyasukhumāliniyopi brāhmaṇasukhumāliniyopi gahapatisukhumāliniyopi, kiṃnu tā kakkhaḷāni khajjakāni maṃsāni khādantī’’ti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti. ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchanti. Bhāsitampetaṃ, mahārāja, bhagavatā – ‘‘so na tāva kālaṃ karoti, yāva na taṃ pāpakammaṃ byantīhotī’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
নেরযিকগ্গিউণ্হভাৰপঞ্হো ছট্ঠো।
Nerayikaggiuṇhabhāvapañho chaṭṭho.
Footnotes:
