| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೯. ನಯಥಾಚಿತ್ತಸ್ಸ ವಾಚಾತಿಕಥಾವಣ್ಣನಾ
9. Nayathācittassa vācātikathāvaṇṇanā
೫೬೪. ಇದಾನಿ ನಯಥಾಚಿತ್ತಸ್ಸ ವಾಚಾತಿಕಥಾ ನಾಮ ಹೋತಿ। ತತ್ಥ ಯಸ್ಮಾ ಕೋಚಿ ಅಞ್ಞಂ ಭಣಿಸ್ಸಾಮೀತಿ ಅಞ್ಞಂ ಭಣತಿ, ತಸ್ಮಾ ನಯಥಾಚಿತ್ತಸ್ಸ ವಾಚಾ ಚಿತ್ತಾನುರೂಪಾ ಚಿತ್ತಾನುಗತಿಕಾ ನ ಹೋತಿ, ವಿನಾಪಿ ಚಿತ್ತೇನ ಪವತ್ತತೀತಿ ಯೇಸಂ ಲದ್ಧಿ; ಸೇಯ್ಯಥಾಪಿ ಪುಬ್ಬಸೇಲಿಯಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಅಥ ನಂ ‘‘ಯದಿ ತಂಸಮುಟ್ಠಾಪಕಂ ಚಿತ್ತಂ ನ ಸಿಯಾ, ಫಸ್ಸಾದಯೋಪಿ ತಸ್ಮಿಂ ಖಣೇ ನ ಸಿಯು’’ನ್ತಿ ಚೋದೇತುಂ ಅಫಸ್ಸಕಸ್ಸಾತಿಆದಿಮಾಹ। ನ ಭಣಿತುಕಾಮೋತಿಆದೀಸು ಯಸ್ಮಾ ಅಞ್ಞಂ ಭಣಿಸ್ಸಾಮೀತಿ ಅಞ್ಞಂ ಭಣನ್ತೋಪಿ ಭಣಿತುಕಾಮೋಯೇವ ನಾಮ ಹೋತಿ, ತಸ್ಮಾ ನ ಹೇವಾತಿ ಪಟಿಕ್ಖಿಪತಿ।
564. Idāni nayathācittassa vācātikathā nāma hoti. Tattha yasmā koci aññaṃ bhaṇissāmīti aññaṃ bhaṇati, tasmā nayathācittassa vācā cittānurūpā cittānugatikā na hoti, vināpi cittena pavattatīti yesaṃ laddhi; seyyathāpi pubbaseliyānaṃ; te sandhāya pucchā sakavādissa, paṭiññā itarassa. Atha naṃ ‘‘yadi taṃsamuṭṭhāpakaṃ cittaṃ na siyā, phassādayopi tasmiṃ khaṇe na siyu’’nti codetuṃ aphassakassātiādimāha. Na bhaṇitukāmotiādīsu yasmā aññaṃ bhaṇissāmīti aññaṃ bhaṇantopi bhaṇitukāmoyeva nāma hoti, tasmā na hevāti paṭikkhipati.
೫೬೫. ನನು ಅತ್ಥಿ ಕೋಚಿ ಅಞ್ಞಂ ಭಣಿಸ್ಸಾಮೀತಿಆದೀಸು ಚೀವರನ್ತಿ ಭಣಿತುಕಾಮೋ ಚೀರನ್ತಿ ಭಣೇಯ್ಯ। ತತ್ಥ ಅಞ್ಞಂ ಭಣಿತುಕಾಮತಾಚಿತ್ತಂ, ಅಞ್ಞಂ ಭಣನಚಿತ್ತಂ, ಇತಿ ಪುಬ್ಬಭಾಗೇನ ಚಿತ್ತೇನ ಅಸದಿಸತ್ತಾ ಅಯಥಾಚಿತ್ತೋ ನಾಮ ಹೋತಿ, ತೇನಸ್ಸ ಕೇವಲಂ ಅನಾಪತ್ತಿ ನಾಮ ಹೋತಿ, ನ ಪನ ಚೀರನ್ತಿ ವಚನಸಮುಟ್ಠಾಪಕಚಿತ್ತಂ ನತ್ಥಿ, ಇತಿ ಅಚಿತ್ತಕಾ ಸಾ ವಾಚಾತಿ ಅತ್ಥಂ ಸನ್ಧಾಯ ಇಮಿನಾ ಉದಾಹರಣೇನ ‘‘ನಯಥಾಚಿತ್ತಸ್ಸ ವಾಚಾ’’ತಿ ಪತಿಟ್ಠಾಪಿತಾಪಿ ಅಪ್ಪತಿಟ್ಠಾಪಿತಾವ ಹೋತೀತಿ।
565. Nanu atthi koci aññaṃ bhaṇissāmītiādīsu cīvaranti bhaṇitukāmo cīranti bhaṇeyya. Tattha aññaṃ bhaṇitukāmatācittaṃ, aññaṃ bhaṇanacittaṃ, iti pubbabhāgena cittena asadisattā ayathācitto nāma hoti, tenassa kevalaṃ anāpatti nāma hoti, na pana cīranti vacanasamuṭṭhāpakacittaṃ natthi, iti acittakā sā vācāti atthaṃ sandhāya iminā udāharaṇena ‘‘nayathācittassa vācā’’ti patiṭṭhāpitāpi appatiṭṭhāpitāva hotīti.
ನಯಥಾಚಿತ್ತಸ್ಸ ವಾಚಾತಿಕಥಾವಣ್ಣನಾ।
Nayathācittassa vācātikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೯೨) ೯. ನ ಯಥಾಚಿತ್ತಸ್ಸ ವಾಚಾತಿಕಥಾ • (92) 9. Na yathācittassa vācātikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೯. ನಯಥಾಚಿತ್ತಸ್ಸವಾಚಾತಿಕಥಾವಣ್ಣನಾ • 9. Nayathācittassavācātikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೯. ನಯಥಾಚಿತ್ತಸ್ಸವಾಚಾತಿಕಥಾವಣ್ಣನಾ • 9. Nayathācittassavācātikathāvaṇṇanā
