| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๘. นาวาสุตฺตํ
8. Nāvāsuttaṃ
๓๑๘.
318.
ยสฺมา หิ ธมฺมํ ปุริโส วิชญฺญา, อินฺทํว นํ เทวตา ปูชเยยฺย;
Yasmā hi dhammaṃ puriso vijaññā, indaṃva naṃ devatā pūjayeyya;
โส ปูชิโต ตสฺมิ ปสนฺนจิโตฺต, พหุสฺสุโต ปาตุกโรติ ธมฺมํฯ
So pūjito tasmi pasannacitto, bahussuto pātukaroti dhammaṃ.
๓๑๙.
319.
ตทฎฺฐิกตฺวาน นิสมฺม ธีโร, ธมฺมานุธมฺมํ ปฎิปชฺชมาโน;
Tadaṭṭhikatvāna nisamma dhīro, dhammānudhammaṃ paṭipajjamāno;
วิญฺญู วิภาวี นิปุโณ จ โหติ, โย ตาทิสํ ภชติ อปฺปมโตฺตฯ
Viññū vibhāvī nipuṇo ca hoti, yo tādisaṃ bhajati appamatto.
๓๒๐.
320.
ขุทฺทญฺจ พาลํ อุปเสวมาโน, อนาคตตฺถญฺจ อุสูยกญฺจ;
Khuddañca bālaṃ upasevamāno, anāgatatthañca usūyakañca;
อิเธว ธมฺมํ อวิภาวยิตฺวา, อวิติณฺณกโงฺข มรณํ อุเปติฯ
Idheva dhammaṃ avibhāvayitvā, avitiṇṇakaṅkho maraṇaṃ upeti.
๓๒๑.
321.
ยถา นโร อาปคโมตริตฺวา, มโหทกํ สลิลํ สีฆโสตํ;
Yathā naro āpagamotaritvā, mahodakaṃ salilaṃ sīghasotaṃ;
โส วุยฺหมาโน อนุโสตคามี, กิํ โส ปเร สกฺขติ ตารเยตุํฯ
So vuyhamāno anusotagāmī, kiṃ so pare sakkhati tārayetuṃ.
๓๒๒.
322.
ตเถว ธมฺมํ อวิภาวยิตฺวา, พหุสฺสุตานํ อนิสามยตฺถํ;
Tatheva dhammaṃ avibhāvayitvā, bahussutānaṃ anisāmayatthaṃ;
สยํ อชานํ อวิติณฺณกโงฺข, กิํ โส ปเร สกฺขติ นิชฺฌเปตุํฯ
Sayaṃ ajānaṃ avitiṇṇakaṅkho, kiṃ so pare sakkhati nijjhapetuṃ.
๓๒๓.
323.
ยถาปิ นาวํ ทฬฺหมารุหิตฺวา, ผิเยน 1 ริเตฺตน สมงฺคิภูโต;
Yathāpi nāvaṃ daḷhamāruhitvā, phiyena 2 rittena samaṅgibhūto;
โส ตารเย ตตฺถ พหูปิ อเญฺญ, ตตฺรูปยญฺญู กุสโล มุตีมา 3ฯ
So tāraye tattha bahūpi aññe, tatrūpayaññū kusalo mutīmā 4.
๓๒๔.
324.
เอวมฺปิ โย เวทคุ ภาวิตโตฺต, พหุสฺสุโต โหติ อเวธธโมฺม;
Evampi yo vedagu bhāvitatto, bahussuto hoti avedhadhammo;
โส โข ปเร นิชฺฌปเย ปชานํ, โสตาวธานูปนิสูปปเนฺนฯ
So kho pare nijjhapaye pajānaṃ, sotāvadhānūpanisūpapanne.
๓๒๕.
325.
ตสฺมา หเว สปฺปุริสํ ภเชถ, เมธาวินเญฺจว พหุสฺสุตญฺจ;
Tasmā have sappurisaṃ bhajetha, medhāvinañceva bahussutañca;
อญฺญาย อตฺถํ ปฎิปชฺชมาโน, วิญฺญาตธโมฺม ส สุขํ 5 ลเภถาติฯ
Aññāya atthaṃ paṭipajjamāno, viññātadhammo sa sukhaṃ 6 labhethāti.
นาวาสุตฺตํ อฎฺฐมํ นิฎฺฐิตํฯ
Nāvāsuttaṃ aṭṭhamaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๘. ธมฺมสุตฺต-(นาวาสุตฺต)-วณฺณนา • 8. Dhammasutta-(nāvāsutta)-vaṇṇanā
