| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
८. नावासुत्तं
8. Nāvāsuttaṃ
३१८.
318.
यस्मा हि धम्मं पुरिसो विजञ्ञा, इन्दंव नं देवता पूजयेय्य।
Yasmā hi dhammaṃ puriso vijaññā, indaṃva naṃ devatā pūjayeyya;
सो पूजितो तस्मि पसन्नचित्तो, बहुस्सुतो पातुकरोति धम्मं॥
So pūjito tasmi pasannacitto, bahussuto pātukaroti dhammaṃ.
३१९.
319.
तदट्ठिकत्वान निसम्म धीरो, धम्मानुधम्मं पटिपज्जमानो।
Tadaṭṭhikatvāna nisamma dhīro, dhammānudhammaṃ paṭipajjamāno;
विञ्ञू विभावी निपुणो च होति, यो तादिसं भजति अप्पमत्तो॥
Viññū vibhāvī nipuṇo ca hoti, yo tādisaṃ bhajati appamatto.
३२०.
320.
खुद्दञ्च बालं उपसेवमानो, अनागतत्थञ्च उसूयकञ्च।
Khuddañca bālaṃ upasevamāno, anāgatatthañca usūyakañca;
इधेव धम्मं अविभावयित्वा, अवितिण्णकङ्खो मरणं उपेति॥
Idheva dhammaṃ avibhāvayitvā, avitiṇṇakaṅkho maraṇaṃ upeti.
३२१.
321.
यथा नरो आपगमोतरित्वा, महोदकं सलिलं सीघसोतं।
Yathā naro āpagamotaritvā, mahodakaṃ salilaṃ sīghasotaṃ;
सो वुय्हमानो अनुसोतगामी, किं सो परे सक्खति तारयेतुं॥
So vuyhamāno anusotagāmī, kiṃ so pare sakkhati tārayetuṃ.
३२२.
322.
तथेव धम्मं अविभावयित्वा, बहुस्सुतानं अनिसामयत्थं।
Tatheva dhammaṃ avibhāvayitvā, bahussutānaṃ anisāmayatthaṃ;
सयं अजानं अवितिण्णकङ्खो, किं सो परे सक्खति निज्झपेतुं॥
Sayaṃ ajānaṃ avitiṇṇakaṅkho, kiṃ so pare sakkhati nijjhapetuṃ.
३२३.
323.
यथापि नावं दळ्हमारुहित्वा, फियेन 1 रित्तेन समङ्गिभूतो।
Yathāpi nāvaṃ daḷhamāruhitvā, phiyena 2 rittena samaṅgibhūto;
सो तारये तत्थ बहूपि अञ्ञे, तत्रूपयञ्ञू कुसलो मुतीमा 3॥
So tāraye tattha bahūpi aññe, tatrūpayaññū kusalo mutīmā 4.
३२४.
324.
एवम्पि यो वेदगु भावितत्तो, बहुस्सुतो होति अवेधधम्मो।
Evampi yo vedagu bhāvitatto, bahussuto hoti avedhadhammo;
सो खो परे निज्झपये पजानं, सोतावधानूपनिसूपपन्ने॥
So kho pare nijjhapaye pajānaṃ, sotāvadhānūpanisūpapanne.
३२५.
325.
तस्मा हवे सप्पुरिसं भजेथ, मेधाविनञ्चेव बहुस्सुतञ्च।
Tasmā have sappurisaṃ bhajetha, medhāvinañceva bahussutañca;
अञ्ञाय अत्थं पटिपज्जमानो, विञ्ञातधम्मो स सुखं 5 लभेथाति॥
Aññāya atthaṃ paṭipajjamāno, viññātadhammo sa sukhaṃ 6 labhethāti.
नावासुत्तं अट्ठमं निट्ठितं।
Nāvāsuttaṃ aṭṭhamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ८. धम्मसुत्त-(नावासुत्त)-वण्णना • 8. Dhammasutta-(nāvāsutta)-vaṇṇanā
