| Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৮. নাৰাসুত্তং
8. Nāvāsuttaṃ
৩১৮.
318.
যস্মা হি ধম্মং পুরিসো ৰিজঞ্ঞা, ইন্দংৰ নং দেৰতা পূজযেয্য।
Yasmā hi dhammaṃ puriso vijaññā, indaṃva naṃ devatā pūjayeyya;
সো পূজিতো তস্মি পসন্নচিত্তো, বহুস্সুতো পাতুকরোতি ধম্মং॥
So pūjito tasmi pasannacitto, bahussuto pātukaroti dhammaṃ.
৩১৯.
319.
তদট্ঠিকত্ৰান নিসম্ম ধীরো, ধম্মানুধম্মং পটিপজ্জমানো।
Tadaṭṭhikatvāna nisamma dhīro, dhammānudhammaṃ paṭipajjamāno;
ৰিঞ্ঞূ ৰিভাৰী নিপুণো চ হোতি, যো তাদিসং ভজতি অপ্পমত্তো॥
Viññū vibhāvī nipuṇo ca hoti, yo tādisaṃ bhajati appamatto.
৩২০.
320.
খুদ্দঞ্চ বালং উপসেৰমানো, অনাগতত্থঞ্চ উসূযকঞ্চ।
Khuddañca bālaṃ upasevamāno, anāgatatthañca usūyakañca;
ইধেৰ ধম্মং অৰিভাৰযিত্ৰা, অৰিতিণ্ণকঙ্খো মরণং উপেতি॥
Idheva dhammaṃ avibhāvayitvā, avitiṇṇakaṅkho maraṇaṃ upeti.
৩২১.
321.
যথা নরো আপগমোতরিত্ৰা, মহোদকং সলিলং সীঘসোতং।
Yathā naro āpagamotaritvā, mahodakaṃ salilaṃ sīghasotaṃ;
সো ৰুয্হমানো অনুসোতগামী, কিং সো পরে সক্খতি তারযেতুং॥
So vuyhamāno anusotagāmī, kiṃ so pare sakkhati tārayetuṃ.
৩২২.
322.
তথেৰ ধম্মং অৰিভাৰযিত্ৰা, বহুস্সুতানং অনিসামযত্থং।
Tatheva dhammaṃ avibhāvayitvā, bahussutānaṃ anisāmayatthaṃ;
সযং অজানং অৰিতিণ্ণকঙ্খো, কিং সো পরে সক্খতি নিজ্ঝপেতুং॥
Sayaṃ ajānaṃ avitiṇṇakaṅkho, kiṃ so pare sakkhati nijjhapetuṃ.
৩২৩.
323.
যথাপি নাৰং দল়্হমারুহিত্ৰা, ফিযেন 1 রিত্তেন সমঙ্গিভূতো।
Yathāpi nāvaṃ daḷhamāruhitvā, phiyena 2 rittena samaṅgibhūto;
সো তারযে তত্থ বহূপি অঞ্ঞে, তত্রূপযঞ্ঞূ কুসলো মুতীমা 3॥
So tāraye tattha bahūpi aññe, tatrūpayaññū kusalo mutīmā 4.
৩২৪.
324.
এৰম্পি যো ৰেদগু ভাৰিতত্তো, বহুস্সুতো হোতি অৰেধধম্মো।
Evampi yo vedagu bhāvitatto, bahussuto hoti avedhadhammo;
সো খো পরে নিজ্ঝপযে পজানং, সোতাৰধানূপনিসূপপন্নে॥
So kho pare nijjhapaye pajānaṃ, sotāvadhānūpanisūpapanne.
৩২৫.
325.
তস্মা হৰে সপ্পুরিসং ভজেথ, মেধাৰিনঞ্চেৰ বহুস্সুতঞ্চ।
Tasmā have sappurisaṃ bhajetha, medhāvinañceva bahussutañca;
অঞ্ঞায অত্থং পটিপজ্জমানো, ৰিঞ্ঞাতধম্মো স সুখং 5 লভেথাতি॥
Aññāya atthaṃ paṭipajjamāno, viññātadhammo sa sukhaṃ 6 labhethāti.
নাৰাসুত্তং অট্ঠমং নিট্ঠিতং।
Nāvāsuttaṃ aṭṭhamaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ৮. ধম্মসুত্ত-(নাৰাসুত্ত)-ৰণ্ণনা • 8. Dhammasutta-(nāvāsutta)-vaṇṇanā
