| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৯. কিংসীলসুত্তং
9. Kiṃsīlasuttaṃ
৩২৬.
326.
‘‘কিংসীলো কিংসমাচারো, কানি কম্মানি ব্রূহযং।
‘‘Kiṃsīlo kiṃsamācāro, kāni kammāni brūhayaṃ;
নরো সম্মা নিৰিট্ঠস্স, উত্তমত্থঞ্চ পাপুণে’’॥
Naro sammā niviṭṭhassa, uttamatthañca pāpuṇe’’.
৩২৭.
327.
ধম্মিং কথং এরযিতং খণঞ্ঞূ, সুণেয্য সক্কচ্চ সুভাসিতানি॥
Dhammiṃ kathaṃ erayitaṃ khaṇaññū, suṇeyya sakkacca subhāsitāni.
৩২৮.
328.
‘‘কালেন গচ্ছে গরূনং সকাসং, থম্ভং নিরংকত্ৰা 5 নিৰাতৰুত্তি।
‘‘Kālena gacche garūnaṃ sakāsaṃ, thambhaṃ niraṃkatvā 6 nivātavutti;
অত্থং ধম্মং সংযমং ব্রহ্মচরিযং, অনুস্সরে চেৰ সমাচরে চ॥
Atthaṃ dhammaṃ saṃyamaṃ brahmacariyaṃ, anussare ceva samācare ca.
৩২৯.
329.
‘‘ধম্মারামো ধম্মরতো, ধম্মে ঠিতো ধম্মৰিনিচ্ছযঞ্ঞূ।
‘‘Dhammārāmo dhammarato, dhamme ṭhito dhammavinicchayaññū;
নেৰাচরে ধম্মসন্দোসৰাদং, তচ্ছেহি নীযেথ সুভাসিতেহি॥
Nevācare dhammasandosavādaṃ, tacchehi nīyetha subhāsitehi.
৩৩০.
330.
‘‘হস্সং জপ্পং পরিদেৰং পদোসং, মাযাকতং কুহনং গিদ্ধি মানং।
‘‘Hassaṃ jappaṃ paridevaṃ padosaṃ, māyākataṃ kuhanaṃ giddhi mānaṃ;
সারম্ভং কক্কসং কসাৰঞ্চ মুচ্ছং 7, হিত্ৰা চরে ৰীতমদো ঠিতত্তো॥
Sārambhaṃ kakkasaṃ kasāvañca mucchaṃ 8, hitvā care vītamado ṭhitatto.
৩৩১.
331.
‘‘ৰিঞ্ঞাতসারানি সুভাসিতানি, সুতঞ্চ ৰিঞ্ঞাতসমাধিসারং।
‘‘Viññātasārāni subhāsitāni, sutañca viññātasamādhisāraṃ;
ন তস্স পঞ্ঞা চ সুতঞ্চ ৰড্ঢতি, যো সাহসো হোতি নরো পমত্তো॥
Na tassa paññā ca sutañca vaḍḍhati, yo sāhaso hoti naro pamatto.
৩৩২.
332.
‘‘ধম্মে চ যে অরিযপৰেদিতে রতা,
‘‘Dhamme ca ye ariyapavedite ratā,
অনুত্তরা তে ৰচসা মনসা কম্মুনা চ।
Anuttarā te vacasā manasā kammunā ca;
তে সন্তিসোরচ্চসমাধিসণ্ঠিতা,
Te santisoraccasamādhisaṇṭhitā,
সুতস্স পঞ্ঞায চ সারমজ্ঝগূ’’তি॥
Sutassa paññāya ca sāramajjhagū’’ti.
কিংসীলসুত্তং নৰমং নিট্ঠিতং।
Kiṃsīlasuttaṃ navamaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ৯. কিংসীলসুত্তৰণ্ণনা • 9. Kiṃsīlasuttavaṇṇanā
