| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၇. နဝကမ္မိကသုတ္တဝဏ္ဏနာ
7. Navakammikasuttavaṇṇanā
၂၀၃. သတ္တမေ နဝကမ္မိကဘာရဒ္ဝာဇောတိ သော ကိရ အရညေ ရုက္ခံ ဆိန္ဒာပေတ္ဝာ တတ္ထေဝ ပာသာဒကူဋာဂာရာဒီနိ ယောဇေတ္ဝာ နဂရံ အာဟရိတ္ဝာ ဝိက္ကိဏာတိ, ဣတိ နဝကမ္မံ နိသ္သာယ ဇီဝတီတိ နဝကမ္မိကော, ဂောတ္တေန ဘာရဒ္ဝာဇောတိ နဝကမ္မိကဘာရဒ္ဝာဇော။ ဒိသ္ဝာနသ္သ ဧတဒဟောသီတိ ဆဗ္ဗဏ္ဏရသ္မိယော ဝိသ္သဇ္ဇေတ္ဝာ နိသိန္နံ ဘဂဝန္တံ ဒိသ္ဝာန အသ္သ ဧတံ အဟောသိ။ ဝနသ္မိန္တိ ဣမသ္မိံ ဝနသဏ္ဍေ။ ဥစ္ဆိန္နမူလံ မေ ဝနန္တိ မယ္ဟံ ကိလေသဝနံ ဥစ္ဆိန္နမူလံ။ နိဗ္ဗနထောတိ နိက္ကိလေသဝနော။ ဧကော ရမေတိ ဧကကော အဘိရမာမိ။ အရတိံ ဝိပ္ပဟာယာတိ ပန္တသေနာသနေသု စေဝ ဘာဝနာယ စ ဥက္ကဏ္ဌိတံ ဇဟိတ္ဝာ။ သတ္တမံ။
203. Sattame navakammikabhāradvājoti so kira araññe rukkhaṃ chindāpetvā tattheva pāsādakūṭāgārādīni yojetvā nagaraṃ āharitvā vikkiṇāti, iti navakammaṃ nissāya jīvatīti navakammiko, gottena bhāradvājoti navakammikabhāradvājo. Disvānassa etadahosīti chabbaṇṇarasmiyo vissajjetvā nisinnaṃ bhagavantaṃ disvāna assa etaṃ ahosi. Vanasminti imasmiṃ vanasaṇḍe. Ucchinnamūlaṃ me vananti mayhaṃ kilesavanaṃ ucchinnamūlaṃ. Nibbanathoti nikkilesavano. Eko rameti ekako abhiramāmi. Aratiṃ vippahāyāti pantasenāsanesu ceva bhāvanāya ca ukkaṇṭhitaṃ jahitvā. Sattamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. နဝကမ္မိကသုတ္တံ • 7. Navakammikasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဝနကမ္မိကသုတ္တဝဏ္ဏနာ • 7. Vanakammikasuttavaṇṇanā
