| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૭. નવકમ્મિકસુત્તં
7. Navakammikasuttaṃ
૨૦૩. એકં સમયં ભગવા કોસલેસુ વિહરતિ અઞ્ઞતરસ્મિં વનસણ્ડે . તેન ખો પન સમયેન નવકમ્મિકભારદ્વાજો બ્રાહ્મણો તસ્મિં વનસણ્ડે કમ્મન્તં કારાપેતિ. અદ્દસા ખો નવકમ્મિકભારદ્વાજો બ્રાહ્મણો ભગવન્તં અઞ્ઞતરસ્મિં સાલરુક્ખમૂલે નિસિન્નં પલ્લઙ્કં આભુજિત્વા ઉજું કાયં પણિધાય પરિમુખં સતિં ઉપટ્ઠપેત્વા. દિસ્વાનસ્સ એતદહોસિ – ‘‘અહં ખો ઇમસ્મિં વનસણ્ડે કમ્મન્તં કારાપેન્તો રમામિ. અયં સમણો ગોતમો કિં કારાપેન્તો રમતી’’તિ? અથ ખો નવકમ્મિકભારદ્વાજો બ્રાહ્મણો યેન ભગવા તેનુપસઙ્કમિ. ઉપસઙ્કમિત્વા ભગવન્તં ગાથાય અજ્ઝભાસિ –
203. Ekaṃ samayaṃ bhagavā kosalesu viharati aññatarasmiṃ vanasaṇḍe . Tena kho pana samayena navakammikabhāradvājo brāhmaṇo tasmiṃ vanasaṇḍe kammantaṃ kārāpeti. Addasā kho navakammikabhāradvājo brāhmaṇo bhagavantaṃ aññatarasmiṃ sālarukkhamūle nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. Disvānassa etadahosi – ‘‘ahaṃ kho imasmiṃ vanasaṇḍe kammantaṃ kārāpento ramāmi. Ayaṃ samaṇo gotamo kiṃ kārāpento ramatī’’ti? Atha kho navakammikabhāradvājo brāhmaṇo yena bhagavā tenupasaṅkami. Upasaṅkamitvā bhagavantaṃ gāthāya ajjhabhāsi –
‘‘કે નુ કમ્મન્તા કરીયન્તિ, ભિક્ખુ સાલવને તવ;
‘‘Ke nu kammantā karīyanti, bhikkhu sālavane tava;
યદેકકો અરઞ્ઞસ્મિં, રતિં વિન્દતિ ગોતમો’’તિ.
Yadekako araññasmiṃ, ratiṃ vindati gotamo’’ti.
‘‘ન મે વનસ્મિં કરણીયમત્થિ,
‘‘Na me vanasmiṃ karaṇīyamatthi,
ઉચ્છિન્નમૂલં મે વનં વિસૂકં;
Ucchinnamūlaṃ me vanaṃ visūkaṃ;
સ્વાહં વને નિબ્બનથો વિસલ્લો,
Svāhaṃ vane nibbanatho visallo,
એકો રમે અરતિં વિપ્પહાયા’’તિ.
Eko rame aratiṃ vippahāyā’’ti.
એવં વુત્તે, નવકમ્મિકભારદ્વાજો બ્રાહ્મણો ભગવન્તં એતદવોચ – ‘‘અભિક્કન્તં, ભો ગોતમ…પે॰… ઉપાસકં મં ભવં ગોતમો ધારેતુ અજ્જતગ્ગે પાણુપેતં સરણં ગત’’ન્તિ.
Evaṃ vutte, navakammikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૭. નવકમ્મિકસુત્તવણ્ણના • 7. Navakammikasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૭. વનકમ્મિકસુત્તવણ્ણના • 7. Vanakammikasuttavaṇṇanā
