| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. নৰকম্মিকসুত্তং
7. Navakammikasuttaṃ
২০৩. একং সমযং ভগৰা কোসলেসু ৰিহরতি অঞ্ঞতরস্মিং ৰনসণ্ডে । তেন খো পন সমযেন নৰকম্মিকভারদ্ৰাজো ব্রাহ্মণো তস্মিং ৰনসণ্ডে কম্মন্তং কারাপেতি। অদ্দসা খো নৰকম্মিকভারদ্ৰাজো ব্রাহ্মণো ভগৰন্তং অঞ্ঞতরস্মিং সালরুক্খমূলে নিসিন্নং পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা। দিস্ৰানস্স এতদহোসি – ‘‘অহং খো ইমস্মিং ৰনসণ্ডে কম্মন্তং কারাপেন্তো রমামি। অযং সমণো গোতমো কিং কারাপেন্তো রমতী’’তি? অথ খো নৰকম্মিকভারদ্ৰাজো ব্রাহ্মণো যেন ভগৰা তেনুপসঙ্কমি। উপসঙ্কমিত্ৰা ভগৰন্তং গাথায অজ্ঝভাসি –
203. Ekaṃ samayaṃ bhagavā kosalesu viharati aññatarasmiṃ vanasaṇḍe . Tena kho pana samayena navakammikabhāradvājo brāhmaṇo tasmiṃ vanasaṇḍe kammantaṃ kārāpeti. Addasā kho navakammikabhāradvājo brāhmaṇo bhagavantaṃ aññatarasmiṃ sālarukkhamūle nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. Disvānassa etadahosi – ‘‘ahaṃ kho imasmiṃ vanasaṇḍe kammantaṃ kārāpento ramāmi. Ayaṃ samaṇo gotamo kiṃ kārāpento ramatī’’ti? Atha kho navakammikabhāradvājo brāhmaṇo yena bhagavā tenupasaṅkami. Upasaṅkamitvā bhagavantaṃ gāthāya ajjhabhāsi –
‘‘কে নু কম্মন্তা করীযন্তি, ভিক্খু সালৰনে তৰ।
‘‘Ke nu kammantā karīyanti, bhikkhu sālavane tava;
যদেককো অরঞ্ঞস্মিং, রতিং ৰিন্দতি গোতমো’’তি॥
Yadekako araññasmiṃ, ratiṃ vindati gotamo’’ti.
‘‘ন মে ৰনস্মিং করণীযমত্থি,
‘‘Na me vanasmiṃ karaṇīyamatthi,
উচ্ছিন্নমূলং মে ৰনং ৰিসূকং।
Ucchinnamūlaṃ me vanaṃ visūkaṃ;
স্ৰাহং ৰনে নিব্বনথো ৰিসল্লো,
Svāhaṃ vane nibbanatho visallo,
একো রমে অরতিং ৰিপ্পহাযা’’তি॥
Eko rame aratiṃ vippahāyā’’ti.
এৰং ৰুত্তে, নৰকম্মিকভারদ্ৰাজো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, navakammikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. নৰকম্মিকসুত্তৰণ্ণনা • 7. Navakammikasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. ৰনকম্মিকসুত্তৰণ্ণনা • 7. Vanakammikasuttavaṇṇanā
