| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
নৰগুয্হমন্তৰিধংসকং
Navaguyhamantavidhaṃsakaṃ
‘‘ভন্তে নাগসেন, নৰিমে পুগ্গলা মন্তিতং গুয্হং ৰিৰরন্তি ন ধারেন্তি। কতমে নৰ? রাগচরিতো দোসচরিতো মোহচরিতো ভীরুকো আমিসগরুকো ইত্থী সোণ্ডো পণ্ডকো দারকো’’তি।
‘‘Bhante nāgasena, navime puggalā mantitaṃ guyhaṃ vivaranti na dhārenti. Katame nava? Rāgacarito dosacarito mohacarito bhīruko āmisagaruko itthī soṇḍo paṇḍako dārako’’ti.
থেরো আহ ‘‘তেসং কো দোসো’’তি? ‘‘রাগচরিতো, ভন্তে নাগসেন, রাগৰসেন মন্তিতং গুয্হং ৰিৰরতি ন ধারেতি, দোসচরিতো, ভন্তে , দোসৰসেন মন্তিতং গুয্হং ৰিৰরতি ন ধারেতি, মূল়্হো মোহৰসেন মন্তিতং গুয্হং ৰিৰরতি ন ধারেতি, ভীরুকো ভযৰসেন মন্তিতং গুয্হং ৰিৰরতি ন ধারেতি, আমিসগরুকো আমিসহেতু মন্তিতং গুয্হং ৰিৰরতি ন ধারেতি, ইত্থী পঞ্ঞায ইত্তরতায মন্তিতং গুয্হং ৰিৰরতি ন ধারেতি, সোণ্ডিকো সুরালোলতায মন্তিতং গুয্হং ৰিৰরতি ন ধারেতি, পণ্ডকো অনেকংসিকতায মন্তিতং গুয্হং ৰিৰরতি ন ধারেতি, দারকো চপলতায মন্তিতং গুয্হং ৰিৰরতি ন ধারেতি। ভৰতীহ –
Thero āha ‘‘tesaṃ ko doso’’ti? ‘‘Rāgacarito, bhante nāgasena, rāgavasena mantitaṃ guyhaṃ vivarati na dhāreti, dosacarito, bhante , dosavasena mantitaṃ guyhaṃ vivarati na dhāreti, mūḷho mohavasena mantitaṃ guyhaṃ vivarati na dhāreti, bhīruko bhayavasena mantitaṃ guyhaṃ vivarati na dhāreti, āmisagaruko āmisahetu mantitaṃ guyhaṃ vivarati na dhāreti, itthī paññāya ittaratāya mantitaṃ guyhaṃ vivarati na dhāreti, soṇḍiko surālolatāya mantitaṃ guyhaṃ vivarati na dhāreti, paṇḍako anekaṃsikatāya mantitaṃ guyhaṃ vivarati na dhāreti, dārako capalatāya mantitaṃ guyhaṃ vivarati na dhāreti. Bhavatīha –
ইত্থী সোণ্ডো পণ্ডকো চ, নৰমো ভৰতি দারকো॥
Itthī soṇḍo paṇḍako ca, navamo bhavati dārako.
‘‘নৰেতে পুগ্গলা লোকে, ইত্তরা চলিতা চলা।
‘‘Navete puggalā loke, ittarā calitā calā;
এতেহি মন্তিতং গুয্হং, খিপ্পং ভৰতি পাকট’’’ন্তি॥
Etehi mantitaṃ guyhaṃ, khippaṃ bhavati pākaṭa’’’nti.
নৰ গুয্হমন্তৰিধংসকা পুগ্গলা।
Nava guyhamantavidhaṃsakā puggalā.
Footnotes:
