| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
နသမ္မာဝတ္တနာဒိကထာဝဏ္ဏနာ
Nasammāvattanādikathāvaṇṇanā
၆၈. နသမ္မာဝတ္တနာဒိကထာယံ ဝတ္တံ န ပူရေယ္ယာတိ ‘‘ဝတ္တကရဏကာလော’’တိ ဝတ္ထုဝိဇာနနဝသေန ဉတ္ဝာ မာနကောသဇ္ဇာဒိဝသေန ဝာ ဥပဇ္ဈာယာဒီသု အနာဒရေန ဝာ ‘‘အကာတုံ န ဝဋ္ဋတီ’’တိ အဇာနနတာယ ဝာ န ကရေယ္ယ, ဒုက္ကဋမေဝ။ အသဉ္စိစ္စ အသတိယာတိအာဒီဟိ စ အကရောန္တသ္သ ပန အနာပတ္တိ။ သဗ္ဗာနိ ဟိ ဝတ္တာနိ သေခိယာနေဝ, တသ္မာ သေခိယေသု ဝုတ္တနယေနေဝေတ္ထ သဗ္ဗောပိ ဝိနိစ္ဆယော ဝေဒိတဗ္ဗော။ ဂေဟသ္သိတပေမန္တိ မေတ္တာပေမံ။
68. Nasammāvattanādikathāyaṃ vattaṃ na pūreyyāti ‘‘vattakaraṇakālo’’ti vatthuvijānanavasena ñatvā mānakosajjādivasena vā upajjhāyādīsu anādarena vā ‘‘akātuṃ na vaṭṭatī’’ti ajānanatāya vā na kareyya, dukkaṭameva. Asañcicca asatiyātiādīhi ca akarontassa pana anāpatti. Sabbāni hi vattāni sekhiyāneva, tasmā sekhiyesu vuttanayenevettha sabbopi vinicchayo veditabbo. Gehassitapemanti mettāpemaṃ.
သာဒိယနံ ဝာ အသာဒိယနံ ဝာ န ဇာနာတီတိ ‘‘မယိ သာဒိယန္တေ အကရောန္တာနံ အာပတ္တိ ဟောတိ, ပဋိက္ခိပိတ္ဝာ အသာဒိယန္တေ အာပတ္တိ န ဟောတီ’’တိ ဧဝံ န ဇာနာတီတိ အတ္ထော။ ‘‘တေသု ဧကော ဝတ္တသမ္ပန္နော ဘိက္ခု။ပေ.။ တေသံ အနာပတ္တီ’’တိ ဝစနတော သစေ ကောစိ ‘‘တုမ္ဟာကံ သဒ္ဓိဝိဟာရိကေ, အန္တေဝာသိကေ ဝာ ဂိလာနေ ဥပဋ္ဌဟိသ္သာမိ, ဩဝာဒာနုသာသနိအာဒိကံ သဗ္ဗံ ကတ္တဗ္ဗံ ကရိသ္သာမီ’’တိ ဝဒတိ, တေ ဝာ သဒ္ဓိဝိဟာရိကာဒယော ‘‘အပ္ပောသ္သုက္ကာ ဟောထာ’’တိ ဝဒန္တိ, ဝတ္တံ ဝာ န သာဒိယန္တိ, အာစရိယုပဇ္ဈာယာနမ္ပိ အနာပတ္တိ။
Sādiyanaṃvā asādiyanaṃ vā na jānātīti ‘‘mayi sādiyante akarontānaṃ āpatti hoti, paṭikkhipitvā asādiyante āpatti na hotī’’ti evaṃ na jānātīti attho. ‘‘Tesu eko vattasampanno bhikkhu…pe… tesaṃ anāpattī’’ti vacanato sace koci ‘‘tumhākaṃ saddhivihārike, antevāsike vā gilāne upaṭṭhahissāmi, ovādānusāsaniādikaṃ sabbaṃ kattabbaṃ karissāmī’’ti vadati, te vā saddhivihārikādayo ‘‘appossukkā hothā’’ti vadanti, vattaṃ vā na sādiyanti, ācariyupajjhāyānampi anāpatti.
နသမ္မာဝတ္တနာဒိကထာဝဏ္ဏနာ နိဋ္ဌိတာ။
Nasammāvattanādikathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၇. ပဏာမိတကထာ • 17. Paṇāmitakathā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / နသမ္မာဝတ္တနာဒိကထာ • Nasammāvattanādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / နသမ္မာဝတ္တနာဒိကထာဝဏ္ဏနာ • Nasammāvattanādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / နသမ္မာဝတ္တနာဒိကထာဝဏ္ဏနာ • Nasammāvattanādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / နသမ္မာဝတ္တနာဒိကထာ • Nasammāvattanādikathā
