| Library / Tipiṭaka / තිපිටක • Tipiṭaka / ථෙරීගාථාපාළි • Therīgāthāpāḷi |
5. නන්දුත්තරාථෙරීගාථා
5. Nanduttarātherīgāthā
87.
87.
‘‘අග්ගිං චන්දඤ්ච සූරියඤ්ච, දෙවතා ච නමස්සිහං;
‘‘Aggiṃ candañca sūriyañca, devatā ca namassihaṃ;
නදීතිත්ථානි ගන්ත්වාන, උදකං ඔරුහාමිහං.
Nadītitthāni gantvāna, udakaṃ oruhāmihaṃ.
88.
88.
‘‘බහූවතසමාදානා , අඩ්ඪං සීසස්ස ඔලිඛිං;
‘‘Bahūvatasamādānā , aḍḍhaṃ sīsassa olikhiṃ;
ඡමාය සෙය්යං කප්පෙමි, රත්තිං භත්තං න භුඤ්ජහං.
Chamāya seyyaṃ kappemi, rattiṃ bhattaṃ na bhuñjahaṃ.
89.
89.
‘‘විභූසාමණ්ඩනරතා, න්හාපනුච්ඡාදනෙහි ච;
‘‘Vibhūsāmaṇḍanaratā, nhāpanucchādanehi ca;
උපකාසිං ඉමං කායං, කාමරාගෙන අට්ටිතා.
Upakāsiṃ imaṃ kāyaṃ, kāmarāgena aṭṭitā.
90.
90.
‘‘තතො සද්ධං ලභිත්වාන, පබ්බජිං අනගාරියං;
‘‘Tato saddhaṃ labhitvāna, pabbajiṃ anagāriyaṃ;
දිස්වා කායං යථාභූතං, කාමරාගො සමූහතො.
Disvā kāyaṃ yathābhūtaṃ, kāmarāgo samūhato.
91.
91.
‘‘සබ්බෙ භවා සමුච්ඡින්නා, ඉච්ඡා ච පත්ථනාපි ච;
‘‘Sabbe bhavā samucchinnā, icchā ca patthanāpi ca;
සබ්බයොගවිසංයුත්තා, සන්තිං පාපුණි චෙතසො’’ති.
Sabbayogavisaṃyuttā, santiṃ pāpuṇi cetaso’’ti.
… නන්දුත්තරා ථෙරී….
… Nanduttarā therī….
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ථෙරීගාථා-අට්ඨකථා • Therīgāthā-aṭṭhakathā / 5. නන්දුත්තරාථෙරීගාථාවණ්ණනා • 5. Nanduttarātherīgāthāvaṇṇanā
