| Library / Tipiṭaka / तिपिटक • Tipiṭaka / थेरीगाथापाळि • Therīgāthāpāḷi |
५. नन्दुत्तराथेरीगाथा
5. Nanduttarātherīgāthā
८७.
87.
‘‘अग्गिं चन्दञ्च सूरियञ्च, देवता च नमस्सिहं।
‘‘Aggiṃ candañca sūriyañca, devatā ca namassihaṃ;
नदीतित्थानि गन्त्वान, उदकं ओरुहामिहं॥
Nadītitthāni gantvāna, udakaṃ oruhāmihaṃ.
८८.
88.
‘‘बहूवतसमादाना , अड्ढं सीसस्स ओलिखिं।
‘‘Bahūvatasamādānā , aḍḍhaṃ sīsassa olikhiṃ;
छमाय सेय्यं कप्पेमि, रत्तिं भत्तं न भुञ्जहं॥
Chamāya seyyaṃ kappemi, rattiṃ bhattaṃ na bhuñjahaṃ.
८९.
89.
‘‘विभूसामण्डनरता, न्हापनुच्छादनेहि च।
‘‘Vibhūsāmaṇḍanaratā, nhāpanucchādanehi ca;
उपकासिं इमं कायं, कामरागेन अट्टिता॥
Upakāsiṃ imaṃ kāyaṃ, kāmarāgena aṭṭitā.
९०.
90.
‘‘ततो सद्धं लभित्वान, पब्बजिं अनगारियं।
‘‘Tato saddhaṃ labhitvāna, pabbajiṃ anagāriyaṃ;
दिस्वा कायं यथाभूतं, कामरागो समूहतो॥
Disvā kāyaṃ yathābhūtaṃ, kāmarāgo samūhato.
९१.
91.
‘‘सब्बे भवा समुच्छिन्ना, इच्छा च पत्थनापि च।
‘‘Sabbe bhavā samucchinnā, icchā ca patthanāpi ca;
सब्बयोगविसंयुत्ता, सन्तिं पापुणि चेतसो’’ति॥
Sabbayogavisaṃyuttā, santiṃ pāpuṇi cetaso’’ti.
… नन्दुत्तरा थेरी…।
… Nanduttarā therī….
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरीगाथा-अट्ठकथा • Therīgāthā-aṭṭhakathā / ५. नन्दुत्तराथेरीगाथावण्णना • 5. Nanduttarātherīgāthāvaṇṇanā
