| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၉-၁၀. နန္ဒိက္ခယသုတ္တာဒိဝဏ္ဏနာ
9-10. Nandikkhayasuttādivaṇṇanā
၅၁-၅၂. နဝမဒသမေသူတိ သုတ္တဒ္ဝယံ သဟေဝ ဥဒ္ဓဋံ, ဒ္ဝီသုပိ အတ္ထဝဏ္ဏနာယ သရိက္ခဘာဝတော။ နန္ဒနဋ္ဌေန နန္ဒီ, ရဉ္ဇနဋ္ဌေန ရာဂော။ သတိပိ သဒ္ဒတ္ထတော ဘေဒေ ‘‘ဣမေသံ အတ္ထတော နိန္နာနာကရဏတာယာ’’တိ ဝတ္ဝာပိ ပဟာယကဓမ္မဘေဒေန ပန လဗ္ဘတေဝ ဘေဒမတ္တာတိ ဒသ္သေတုံ ‘‘နိဗ္ဗိဒာနုပသ္သနာယ ဝာ’’တိအာဒိ ဝုတ္တံ။ ဝိရဇ္ဇန္တော ရာဂံ ပဇဟတီတိ သမ္ဗန္ဓော။ ဧတ္တာဝတာတိ ‘‘နန္ဒိက္ခယာ ရာဂက္ခယော’’တိ ဧတ္တာဝတာ။ ဝိပသ္သနံ နိဋ္ဌပေတ္ဝာ ဝိပသ္သနာကိစ္စသ္သ ပရိယောသာနေန။ ရာဂက္ခယာတိ ဝုဋ္ဌာနဂာမိနိပရိယောသာနာယ ဝိပသ္သနာယ ရာဂသ္သ ခေပိတတ္တာ။ အနန္တရံ ဥပ္ပန္နေန အရိယမဂ္ဂေန သမုစ္ဆေဒဝသေန နန္ဒိက္ခယောတိ။ တေနာဟ ‘‘ဣဓ မဂ္ဂံ ဒသ္သေတ္ဝာ’’တိ။ အနန္တရံ ပန ဥပ္ပန္နေန အရိယဖလေန ပဋိပသ္သဒ္ဓိဝသေန နန္ဒိရာဂက္ခယာ သဗ္ဗံ သံကိလေသတော စိတ္တံ ဝိမုစ္စတီတိ။ တေနာဟ ‘‘ဖလံ ဒသ္သိတ’’န္တိ။
51-52.Navamadasamesūti suttadvayaṃ saheva uddhaṭaṃ, dvīsupi atthavaṇṇanāya sarikkhabhāvato. Nandanaṭṭhena nandī, rañjanaṭṭhena rāgo. Satipi saddatthato bhede ‘‘imesaṃ atthato ninnānākaraṇatāyā’’ti vatvāpi pahāyakadhammabhedena pana labbhateva bhedamattāti dassetuṃ ‘‘nibbidānupassanāya vā’’tiādi vuttaṃ. Virajjanto rāgaṃ pajahatīti sambandho. Ettāvatāti ‘‘nandikkhayā rāgakkhayo’’ti ettāvatā. Vipassanaṃ niṭṭhapetvā vipassanākiccassa pariyosānena. Rāgakkhayāti vuṭṭhānagāminipariyosānāya vipassanāya rāgassa khepitattā. Anantaraṃ uppannena ariyamaggena samucchedavasena nandikkhayoti. Tenāha ‘‘idha maggaṃ dassetvā’’ti. Anantaraṃ pana uppannena ariyaphalena paṭipassaddhivasena nandirāgakkhayā sabbaṃ saṃkilesato cittaṃ vimuccatīti. Tenāha ‘‘phalaṃ dassita’’nti.
နန္ဒိက္ခယသုတ္တာဒိဝဏ္ဏနာ နိဋ္ဌိတာ။
Nandikkhayasuttādivaṇṇanā niṭṭhitā.
အတ္တဒီပဝဂ္ဂဝဏ္ဏနာ နိဋ္ဌိတာ။
Attadīpavaggavaṇṇanā niṭṭhitā.
မူလပဏ္ဏာသကော သမတ္တော။
Mūlapaṇṇāsako samatto.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၉. နန္ဒိက္ခယသုတ္တံ • 9. Nandikkhayasuttaṃ
၁၀. ဒုတိယနန္ဒိက္ခယသုတ္တံ • 10. Dutiyanandikkhayasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉-၁၀. နန္ဒိက္ခယသုတ္တာဒိဝဏ္ဏနာ • 9-10. Nandikkhayasuttādivaṇṇanā
