| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೭. ನನ್ದಮಾಣವಪುಚ್ಛಾ
7. Nandamāṇavapucchā
೧೦೮೩.
1083.
‘‘ಸನ್ತಿ ಲೋಕೇ ಮುನಯೋ, (ಇಚ್ಚಾಯಸ್ಮಾ ನನ್ದೋ)
‘‘Santi loke munayo, (iccāyasmā nando)
ಜನಾ ವದನ್ತಿ ತಯಿದಂ ಕಥಂಸು।
Janā vadanti tayidaṃ kathaṃsu;
ಞಾಣೂಪಪನ್ನಂ ನೋ ಮುನಿಂ 1 ವದನ್ತಿ, ಉದಾಹು ವೇ ಜೀವಿತೇನೂಪಪನ್ನಂ’’॥
Ñāṇūpapannaṃ no muniṃ 2 vadanti, udāhu ve jīvitenūpapannaṃ’’.
೧೦೮೪.
1084.
‘‘ನ ದಿಟ್ಠಿಯಾ ನ ಸುತಿಯಾ ನ ಞಾಣೇನ, (ನ ಸೀಲಬ್ಬತೇನ) 3
‘‘Na diṭṭhiyā na sutiyā na ñāṇena, (na sīlabbatena) 4
ಮುನೀಧ ನನ್ದ ಕುಸಲಾ ವದನ್ತಿ।
Munīdha nanda kusalā vadanti;
ವಿಸೇನಿಕತ್ವಾ ಅನೀಘಾ ನಿರಾಸಾ, ಚರನ್ತಿ ಯೇ ತೇ ಮುನಯೋತಿ ಬ್ರೂಮಿ’’॥
Visenikatvā anīghā nirāsā, caranti ye te munayoti brūmi’’.
೧೦೮೫.
1085.
‘‘ಯೇ ಕೇಚಿಮೇ ಸಮಣಬ್ರಾಹ್ಮಣಾಸೇ, (ಇಚ್ಚಾಯಸ್ಮಾ ನನ್ದೋ)
‘‘Ye kecime samaṇabrāhmaṇāse, (iccāyasmā nando)
ಸೀಲಬ್ಬತೇನಾಪಿ ವದನ್ತಿ ಸುದ್ಧಿಂ, ಅನೇಕರೂಪೇನ ವದನ್ತಿ ಸುದ್ಧಿಂ।
Sīlabbatenāpi vadanti suddhiṃ, anekarūpena vadanti suddhiṃ;
ಕಚ್ಚಿಸ್ಸು ತೇ ಭಗವಾ ತತ್ಥ ಯತಾ ಚರನ್ತಾ, ಅತಾರು ಜಾತಿಞ್ಚ ಜರಞ್ಚ ಮಾರಿಸ।
Kaccissu te bhagavā tattha yatā carantā, atāru jātiñca jarañca mārisa;
ಪುಚ್ಛಾಮಿ ತಂ ಭಗವಾ ಬ್ರೂಹಿ ಮೇ ತಂ’’॥
Pucchāmi taṃ bhagavā brūhi me taṃ’’.
೧೦೮೬.
1086.
‘‘ಯೇ ಕೇಚಿಮೇ ಸಮಣಬ್ರಾಹ್ಮಣಾಸೇ, (ನನ್ದಾತಿ ಭಗವಾ)
‘‘Ye kecime samaṇabrāhmaṇāse, (nandāti bhagavā)
ದಿಟ್ಠಸ್ಸುತೇನಾಪಿ ವದನ್ತಿ ಸುದ್ಧಿಂ।
Diṭṭhassutenāpi vadanti suddhiṃ;
ಸೀಲಬ್ಬತೇನಾಪಿ ವದನ್ತಿ ಸುದ್ಧಿಂ, ಅನೇಕರೂಪೇನ ವದನ್ತಿ ಸುದ್ಧಿಂ।
Sīlabbatenāpi vadanti suddhiṃ, anekarūpena vadanti suddhiṃ;
ಕಿಞ್ಚಾಪಿ ತೇ ತತ್ಥ ಯತಾ ಚರನ್ತಿ, ನಾರಿಂಸು ಜಾತಿಜರನ್ತಿ ಬ್ರೂಮಿ’’॥
Kiñcāpi te tattha yatā caranti, nāriṃsu jātijaranti brūmi’’.
೧೦೮೭.
1087.
‘‘ಯೇ ಕೇಚಿಮೇ ಸಮಣಬ್ರಾಹ್ಮಣಾಸೇ, (ಇಚ್ಚಾಯಸ್ಮಾ ನನ್ದೋ)
‘‘Ye kecime samaṇabrāhmaṇāse, (iccāyasmā nando)
ದಿಟ್ಠಸ್ಸುತೇನಾಪಿ ವದನ್ತಿ ಸುದ್ಧಿಂ।
Diṭṭhassutenāpi vadanti suddhiṃ;
ಸೀಲಬ್ಬತೇನಾಪಿ ವದನ್ತಿ ಸುದ್ಧಿಂ, ಅನೇಕರೂಪೇನ ವದನ್ತಿ ಸುದ್ಧಿಂ।
Sīlabbatenāpi vadanti suddhiṃ, anekarūpena vadanti suddhiṃ;
ತೇ ಚೇ ಮುನಿ 7 ಬ್ರೂಸಿ ಅನೋಘತಿಣ್ಣೇ, ಅಥ ಕೋ ಚರಹಿ ದೇವಮನುಸ್ಸಲೋಕೇ।
Te ce muni 8 brūsi anoghatiṇṇe, atha ko carahi devamanussaloke;
ಅತಾರಿ ಜಾತಿಞ್ಚ ಜರಞ್ಚ ಮಾರಿಸ, ಪುಚ್ಛಾಮಿ ತಂ ಭಗವಾ ಬ್ರೂಹಿ ಮೇ ತಂ’’॥
Atāri jātiñca jarañca mārisa, pucchāmi taṃ bhagavā brūhi me taṃ’’.
೧೦೮೮.
1088.
‘‘ನಾಹಂ ಸಬ್ಬೇ ಸಮಣಬ್ರಾಹ್ಮಣಾಸೇ, (ನನ್ದಾತಿ ಭಗವಾ)
‘‘Nāhaṃ sabbe samaṇabrāhmaṇāse, (nandāti bhagavā)
ಜಾತಿಜರಾಯ ನಿವುತಾತಿ ಬ್ರೂಮಿ।
Jātijarāya nivutāti brūmi;
ಯೇ ಸೀಧ ದಿಟ್ಠಂವ ಸುತಂ ಮುತಂ ವಾ, ಸೀಲಬ್ಬತಂ ವಾಪಿ ಪಹಾಯ ಸಬ್ಬಂ।
Ye sīdha diṭṭhaṃva sutaṃ mutaṃ vā, sīlabbataṃ vāpi pahāya sabbaṃ;
ಅನೇಕರೂಪಮ್ಪಿ ಪಹಾಯ ಸಬ್ಬಂ, ತಣ್ಹಂ ಪರಿಞ್ಞಾಯ ಅನಾಸವಾಸೇ।
Anekarūpampi pahāya sabbaṃ, taṇhaṃ pariññāya anāsavāse;
ತೇ ವೇ ನರಾ ಓಘತಿಣ್ಣಾತಿ ಬ್ರೂಮಿ’’॥
Te ve narā oghatiṇṇāti brūmi’’.
೧೦೮೯.
1089.
‘‘ಏತಾಭಿನನ್ದಾಮಿ ವಚೋ ಮಹೇಸಿನೋ, ಸುಕಿತ್ತಿತಂ ಗೋತಮನೂಪಧೀಕಂ।
‘‘Etābhinandāmi vaco mahesino, sukittitaṃ gotamanūpadhīkaṃ;
ಯೇ ಸೀಧ ದಿಟ್ಠಂ ವ ಸುತಂ ಮುತಂ ವಾ, ಸೀಲಬ್ಬತಂ ವಾಪಿ ಪಹಾಯ ಸಬ್ಬಂ।
Ye sīdha diṭṭhaṃ va sutaṃ mutaṃ vā, sīlabbataṃ vāpi pahāya sabbaṃ;
ಅನೇಕರೂಪಮ್ಪಿ ಪಹಾಯ ಸಬ್ಬಂ, ತಣ್ಹಂ ಪರಿಞ್ಞಾಯ ಅನಾಸವಾಸೇ।
Anekarūpampi pahāya sabbaṃ, taṇhaṃ pariññāya anāsavāse;
ಅಹಮ್ಪಿ ತೇ ಓಘತಿಣ್ಣಾತಿ ಬ್ರೂಮೀ’’ತಿ॥
Ahampi te oghatiṇṇāti brūmī’’ti.
ನನ್ದಮಾಣವಪುಚ್ಛಾ ಸತ್ತಮಾ ನಿಟ್ಠಿತಾ।
Nandamāṇavapucchā sattamā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೭. ನನ್ದಸುತ್ತವಣ್ಣನಾ • 7. Nandasuttavaṇṇanā
