| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៧. នន្ទមាណវបុច្ឆា
7. Nandamāṇavapucchā
១០៨៣.
1083.
‘‘សន្តិ លោកេ មុនយោ, (ឥច្ចាយស្មា នន្ទោ)
‘‘Santi loke munayo, (iccāyasmā nando)
ជនា វទន្តិ តយិទំ កថំសុ;
Janā vadanti tayidaṃ kathaṃsu;
ញាណូបបន្នំ នោ មុនិំ 1 វទន្តិ, ឧទាហុ វេ ជីវិតេនូបបន្នំ’’។
Ñāṇūpapannaṃ no muniṃ 2 vadanti, udāhu ve jīvitenūpapannaṃ’’.
១០៨៤.
1084.
‘‘ន ទិដ្ឋិយា ន សុតិយា ន ញាណេន, (ន សីលព្ពតេន) 3
‘‘Na diṭṭhiyā na sutiyā na ñāṇena, (na sīlabbatena) 4
មុនីធ នន្ទ កុសលា វទន្តិ;
Munīdha nanda kusalā vadanti;
វិសេនិកត្វា អនីឃា និរាសា, ចរន្តិ យេ តេ មុនយោតិ ព្រូមិ’’។
Visenikatvā anīghā nirāsā, caranti ye te munayoti brūmi’’.
១០៨៥.
1085.
‘‘យេ កេចិមេ សមណព្រាហ្មណាសេ, (ឥច្ចាយស្មា នន្ទោ)
‘‘Ye kecime samaṇabrāhmaṇāse, (iccāyasmā nando)
សីលព្ពតេនាបិ វទន្តិ សុទ្ធិំ, អនេករូបេន វទន្តិ សុទ្ធិំ;
Sīlabbatenāpi vadanti suddhiṃ, anekarūpena vadanti suddhiṃ;
កច្ចិស្សុ តេ ភគវា តត្ថ យតា ចរន្តា, អតារុ ជាតិញ្ច ជរញ្ច មារិស;
Kaccissu te bhagavā tattha yatā carantā, atāru jātiñca jarañca mārisa;
បុច្ឆាមិ តំ ភគវា ព្រូហិ មេ តំ’’។
Pucchāmi taṃ bhagavā brūhi me taṃ’’.
១០៨៦.
1086.
‘‘យេ កេចិមេ សមណព្រាហ្មណាសេ, (នន្ទាតិ ភគវា)
‘‘Ye kecime samaṇabrāhmaṇāse, (nandāti bhagavā)
ទិដ្ឋស្សុតេនាបិ វទន្តិ សុទ្ធិំ;
Diṭṭhassutenāpi vadanti suddhiṃ;
សីលព្ពតេនាបិ វទន្តិ សុទ្ធិំ, អនេករូបេន វទន្តិ សុទ្ធិំ;
Sīlabbatenāpi vadanti suddhiṃ, anekarūpena vadanti suddhiṃ;
កិញ្ចាបិ តេ តត្ថ យតា ចរន្តិ, នារិំសុ ជាតិជរន្តិ ព្រូមិ’’។
Kiñcāpi te tattha yatā caranti, nāriṃsu jātijaranti brūmi’’.
១០៨៧.
1087.
‘‘យេ កេចិមេ សមណព្រាហ្មណាសេ, (ឥច្ចាយស្មា នន្ទោ)
‘‘Ye kecime samaṇabrāhmaṇāse, (iccāyasmā nando)
ទិដ្ឋស្សុតេនាបិ វទន្តិ សុទ្ធិំ;
Diṭṭhassutenāpi vadanti suddhiṃ;
សីលព្ពតេនាបិ វទន្តិ សុទ្ធិំ, អនេករូបេន វទន្តិ សុទ្ធិំ;
Sīlabbatenāpi vadanti suddhiṃ, anekarūpena vadanti suddhiṃ;
តេ ចេ មុនិ 7 ព្រូសិ អនោឃតិណ្ណេ, អថ កោ ចរហិ ទេវមនុស្សលោកេ;
Te ce muni 8 brūsi anoghatiṇṇe, atha ko carahi devamanussaloke;
អតារិ ជាតិញ្ច ជរញ្ច មារិស, បុច្ឆាមិ តំ ភគវា ព្រូហិ មេ តំ’’។
Atāri jātiñca jarañca mārisa, pucchāmi taṃ bhagavā brūhi me taṃ’’.
១០៨៨.
1088.
‘‘នាហំ សព្ពេ សមណព្រាហ្មណាសេ, (នន្ទាតិ ភគវា)
‘‘Nāhaṃ sabbe samaṇabrāhmaṇāse, (nandāti bhagavā)
ជាតិជរាយ និវុតាតិ ព្រូមិ;
Jātijarāya nivutāti brūmi;
យេ សីធ ទិដ្ឋំវ សុតំ មុតំ វា, សីលព្ពតំ វាបិ បហាយ សព្ពំ;
Ye sīdha diṭṭhaṃva sutaṃ mutaṃ vā, sīlabbataṃ vāpi pahāya sabbaṃ;
អនេករូបម្បិ បហាយ សព្ពំ, តណ្ហំ បរិញ្ញាយ អនាសវាសេ;
Anekarūpampi pahāya sabbaṃ, taṇhaṃ pariññāya anāsavāse;
តេ វេ នរា ឱឃតិណ្ណាតិ ព្រូមិ’’។
Te ve narā oghatiṇṇāti brūmi’’.
១០៨៩.
1089.
‘‘ឯតាភិនន្ទាមិ វចោ មហេសិនោ, សុកិត្តិតំ គោតមនូបធីកំ;
‘‘Etābhinandāmi vaco mahesino, sukittitaṃ gotamanūpadhīkaṃ;
យេ សីធ ទិដ្ឋំ វ សុតំ មុតំ វា, សីលព្ពតំ វាបិ បហាយ សព្ពំ;
Ye sīdha diṭṭhaṃ va sutaṃ mutaṃ vā, sīlabbataṃ vāpi pahāya sabbaṃ;
អនេករូបម្បិ បហាយ សព្ពំ, តណ្ហំ បរិញ្ញាយ អនាសវាសេ;
Anekarūpampi pahāya sabbaṃ, taṇhaṃ pariññāya anāsavāse;
អហម្បិ តេ ឱឃតិណ្ណាតិ ព្រូមី’’តិ។
Ahampi te oghatiṇṇāti brūmī’’ti.
នន្ទមាណវបុច្ឆា សត្តមា និដ្ឋិតា។
Nandamāṇavapucchā sattamā niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ៧. នន្ទសុត្តវណ្ណនា • 7. Nandasuttavaṇṇanā
