| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៨. ហេមកមាណវបុច្ឆា
8. Hemakamāṇavapucchā
១០៩០.
1090.
‘‘យេ មេ បុព្ពេ វិយាកំសុ, (ឥច្ចាយស្មា ហេមកោ)
‘‘Ye me pubbe viyākaṃsu, (iccāyasmā hemako)
ហុរំ គោតមសាសនា;
Huraṃ gotamasāsanā;
ឥច្ចាសិ ឥតិ ភវិស្សតិ, សព្ពំ តំ ឥតិហីតិហំ;
Iccāsi iti bhavissati, sabbaṃ taṃ itihītihaṃ;
សព្ពំ តំ តក្កវឌ្ឍនំ, នាហំ តត្ថ អភិរមិំ។
Sabbaṃ taṃ takkavaḍḍhanaṃ, nāhaṃ tattha abhiramiṃ.
១០៩១.
1091.
‘‘ត្វញ្ច មេ ធម្មមក្ខាហិ, តណ្ហានិគ្ឃាតនំ មុនិ;
‘‘Tvañca me dhammamakkhāhi, taṇhānigghātanaṃ muni;
យំ វិទិត្វា សតោ ចរំ, តរេ លោកេ វិសត្តិកំ’’។
Yaṃ viditvā sato caraṃ, tare loke visattikaṃ’’.
១០៩២.
1092.
‘‘ឥធ ទិដ្ឋសុតមុតវិញ្ញាតេសុ, បិយរូបេសុ ហេមក;
‘‘Idha diṭṭhasutamutaviññātesu, piyarūpesu hemaka;
ឆន្ទរាគវិនោទនំ, និព្ពានបទមច្ចុតំ។
Chandarāgavinodanaṃ, nibbānapadamaccutaṃ.
១០៩៣.
1093.
‘‘ឯតទញ្ញាយ យេ សតា, ទិដ្ឋធម្មាភិនិព្ពុតា;
‘‘Etadaññāya ye satā, diṭṭhadhammābhinibbutā;
ឧបសន្តា ច តេ សទា, តិណ្ណា លោកេ វិសត្តិក’’ន្តិ។
Upasantā ca te sadā, tiṇṇā loke visattika’’nti.
ហេមកមាណវបុច្ឆា អដ្ឋមា និដ្ឋិតា។
Hemakamāṇavapucchā aṭṭhamā niṭṭhitā.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ៨. ហេមកសុត្តវណ្ណនា • 8. Hemakasuttavaṇṇanā
