| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២០. វីសតិមវគ្គោ
20. Vīsatimavaggo
(១៩៥) ២. ញាណកថា
(195) 2. Ñāṇakathā
៨៦៣. នត្ថិ បុថុជ្ជនស្ស ញាណន្តិ? អាមន្តា។ នត្ថិ បុថុជ្ជនស្ស បញ្ញា បជាននា វិចយោ បវិចយោ ធម្មវិចយោ សល្លក្ខណា ឧបលក្ខណា បច្ចុបលក្ខណាតិ? ន ហេវំ វត្តព្ពេ…បេ.… ននុ អត្ថិ បុថុជ្ជនស្ស បញ្ញា បជាននា វិចយោ…បេ.… បច្ចុបលក្ខណាតិ? អាមន្តា។ ហញ្ចិ អត្ថិ បុថុជ្ជនស្ស បញ្ញា បជាននា វិចយោ…បេ.… បច្ចុបលក្ខណា, នោ ច វត រេ វត្តព្ពេ – ‘‘នត្ថិ បុថុជ្ជនស្ស ញាណ’’ន្តិ។
863. Natthi puthujjanassa ñāṇanti? Āmantā. Natthi puthujjanassa paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇāti? Na hevaṃ vattabbe…pe… nanu atthi puthujjanassa paññā pajānanā vicayo…pe… paccupalakkhaṇāti? Āmantā. Hañci atthi puthujjanassa paññā pajānanā vicayo…pe… paccupalakkhaṇā, no ca vata re vattabbe – ‘‘natthi puthujjanassa ñāṇa’’nti.
៨៦៤. នត្ថិ បុថុជ្ជនស្ស ញាណន្តិ? អាមន្តា។ បុថុជ្ជនោ បឋមំ ឈានំ សមាបជ្ជេយ្យាតិ? អាមន្តា។ ហញ្ចិ បុថុជ្ជនោ បឋមំ ឈានំ សមាបជ្ជេយ្យ, នោ ច វត រេ វត្តព្ពេ – ‘‘នត្ថិ បុថុជ្ជនស្ស ញាណ’’ន្តិ។
864. Natthi puthujjanassa ñāṇanti? Āmantā. Puthujjano paṭhamaṃ jhānaṃ samāpajjeyyāti? Āmantā. Hañci puthujjano paṭhamaṃ jhānaṃ samāpajjeyya, no ca vata re vattabbe – ‘‘natthi puthujjanassa ñāṇa’’nti.
បុថុជ្ជនោ ទុតិយំ ឈានំ…បេ.… តតិយំ ឈានំ…បេ.… ចតុត្ថំ ឈានំ…បេ.… អាកាសានញ្ចាយតនំ សមាបជ្ជេយ្យ, វិញ្ញាណញ្ចាយតនំ អាកិញ្ចញ្ញាយតនំ នេវសញ្ញានាសញ្ញាយតនំ សមាបជ្ជេយ្យ, បុថុជ្ជនោ ទានំ ទទេយ្យ …បេ.… ចីវរំ ទទេយ្យ, បិណ្ឌបាតំ ទទេយ្យ, សេនាសនំ ទទេយ្យ, គិលានបច្ចយភេសជ្ជបរិក្ខារំ ទទេយ្យាតិ? អាមន្តា។ ហញ្ចិ បុថុជ្ជនោ គិលានបច្ចយភេសជ្ជបរិក្ខារំ ទទេយ្យ, នោ ច វត រេ វត្តព្ពេ – នត្ថិ បុថុជ្ជនស្ស ញាណ’’ន្តិ។
Puthujjano dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ…pe… ākāsānañcāyatanaṃ samāpajjeyya, viññāṇañcāyatanaṃ ākiñcaññāyatanaṃ nevasaññānāsaññāyatanaṃ samāpajjeyya, puthujjano dānaṃ dadeyya …pe… cīvaraṃ dadeyya, piṇḍapātaṃ dadeyya, senāsanaṃ dadeyya, gilānapaccayabhesajjaparikkhāraṃ dadeyyāti? Āmantā. Hañci puthujjano gilānapaccayabhesajjaparikkhāraṃ dadeyya, no ca vata re vattabbe – natthi puthujjanassa ñāṇa’’nti.
៨៦៥. អត្ថិ បុថុជ្ជនស្ស ញាណន្តិ? អាមន្តា។ បុថុជ្ជនោ តេន ញាណេន ទុក្ខំ បរិជានាតិ , សមុទយំ បជហតិ, និរោធំ សច្ឆិករោតិ, មគ្គំ ភាវេតីតិ? ន ហេវំ វត្តព្ពេ…បេ.…។
865. Atthi puthujjanassa ñāṇanti? Āmantā. Puthujjano tena ñāṇena dukkhaṃ parijānāti , samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
ញាណកថា និដ្ឋិតា។
Ñāṇakathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ២. ញាណកថាវណ្ណនា • 2. Ñāṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ២. ញាណកថាវណ្ណនា • 2. Ñāṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ២. ញាណកថាវណ្ណនា • 2. Ñāṇakathāvaṇṇanā
