| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੨. ਅਭਿਸਮਯਸਂਯੁਤ੍ਤਂ
2. Abhisamayasaṃyuttaṃ
੧. ਨਖਸਿਖਾਸੁਤ੍ਤવਣ੍ਣਨਾ
1. Nakhasikhāsuttavaṇṇanā
੭੪. ਅਭਿਸਮਯਸਂਯੁਤ੍ਤਸ੍ਸ ਪਠਮੇ ਨਖਸਿਖਾਯਨ੍ਤਿ ਮਂਸਟ੍ਠਾਨੇਨ વਿਮੁਤ੍ਤੇ ਨਖਗ੍ਗੇ। ਨਖਸਿਖਾ ਚ ਨਾਮ ਲੋਕਿਯਾਨਂ ਮਹਤੀਪਿ ਹੋਤਿ, ਸਤ੍ਥੁ ਪਨ ਰਤ੍ਤੁਪ੍ਪਲਪਤ੍ਤਕੋਟਿ વਿਯ ਸੁਖੁਮਾ। ਕਥਂ ਪਨੇਤ੍ਥ ਪਂਸੁ ਪਤਿਟ੍ਠਿਤੋਤਿ? ਅਧਿਟ੍ਠਾਨਬਲੇਨ। ਭਗવਤਾ ਹਿ ਅਤ੍ਥਂ ਞਾਪੇਤੁਕਾਮੇਨ ਅਧਿਟ੍ਠਾਨਬਲੇਨ ਤਤ੍ਥ ਪਤਿਟ੍ਠਾਪਿਤੋ। ਸਤਿਮਂ ਕਲਨ੍ਤਿ ਮਹਾਪਥવਿਯਾ ਪਂਸੁਂ ਸਤਕੋਟ੍ਠਾਸੇ ਕਤ੍વਾ ਤਤੋ ਏਕਕੋਟ੍ਠਾਸਂ। ਪਰਤੋਪਿ ਏਸੇવ ਨਯੋ। ਅਭਿਸਮੇਤਾવਿਨੋਤਿ ਪਞ੍ਞਾਯ ਅਰਿਯਸਚ੍ਚਾਨਿ ਅਭਿਸਮੇਤ੍વਾ ਠਿਤਸ੍ਸ। ਪੁਰਿਮਂ ਦੁਕ੍ਖਕ੍ਖਨ੍ਧਂ ਪਰਿਕ੍ਖੀਣਂ ਪਰਿਯਾਦਿਣ੍ਣਂ ਉਪਨਿਧਾਯਾਤਿ ਏਤਦੇવ ਬਹੁਤਰਂ ਦੁਕ੍ਖਂ, ਯਦਿਦਂ ਪਰਿਕ੍ਖੀਣਨ੍ਤਿ ਏવਂ ਪਠਮਂ વੁਤ੍ਤਂ ਦੁਕ੍ਖਕ੍ਖਨ੍ਧਂ ਉਪਨਿਧਾਯ, ਞਾਣੇਨ ਤਂ ਤਸ੍ਸ ਸਨ੍ਤਿਕੇ ਠਪੇਤ੍વਾ ਉਪਪਰਿਕ੍ਖਿਯਮਾਨੇਤਿ ਅਤ੍ਥੋ। ਕਤਮਂ ਪਨੇਤ੍ਥ ਪੁਰਿਮਦੁਕ੍ਖਂ ਨਾਮ? ਯਂ ਪਰਿਕ੍ਖੀਣਂ। ਕਤਮਂ ਪਨ ਪਰਿਕ੍ਖੀਣਂ? ਯਂ ਪਠਮਮਗ੍ਗਸ੍ਸ ਅਭਾવਿਤਤ੍ਤਾ ਉਪ੍ਪਜ੍ਜੇਯ੍ਯ। ਕਤਮਂ ਪਨ ਉਪਨਿਧਾਯ? ਯਂ ਸਤ੍ਤਸੁ ਅਤ੍ਤਭਾવੇਸੁ ਅਪਾਯੇ ਅਟ੍ਠਮਞ੍ਚ ਪਟਿਸਨ੍ਧਿਂ ਆਦਿਂ ਕਤ੍વਾ ਯਤ੍ਥ ਕਤ੍ਥਚਿ ਉਪ੍ਪਜ੍ਜੇਯ੍ਯ, ਸਬ੍ਬਂ ਤਂ ਪਰਿਕ੍ਖੀਣਨ੍ਤਿ વੇਦਿਤਬ੍ਬਂ। ਸਤ੍ਤਕ੍ਖਤ੍ਤੁਨ੍ਤਿ ਸਤ੍ਤ વਾਰੇ, ਸਤ੍ਤਸੁ ਅਤ੍ਤਭਾવੇਸੂਤਿ ਅਤ੍ਥੋ। ਪਰਮਤਾਤਿ ਇਦਮਸ੍ਸ ਪਰਂ ਪਮਾਣਨ੍ਤਿ ਦਸ੍ਸੇਤਿ। ਮਹਤ੍ਥਿਯੋਤਿ ਮਹਤੋ ਅਤ੍ਥਸ੍ਸ ਨਿਪ੍ਫਾਦਕੋ। ਪਠਮਂ।
74. Abhisamayasaṃyuttassa paṭhame nakhasikhāyanti maṃsaṭṭhānena vimutte nakhagge. Nakhasikhā ca nāma lokiyānaṃ mahatīpi hoti, satthu pana rattuppalapattakoṭi viya sukhumā. Kathaṃ panettha paṃsu patiṭṭhitoti? Adhiṭṭhānabalena. Bhagavatā hi atthaṃ ñāpetukāmena adhiṭṭhānabalena tattha patiṭṭhāpito. Satimaṃ kalanti mahāpathaviyā paṃsuṃ satakoṭṭhāse katvā tato ekakoṭṭhāsaṃ. Paratopi eseva nayo. Abhisametāvinoti paññāya ariyasaccāni abhisametvā ṭhitassa. Purimaṃ dukkhakkhandhaṃ parikkhīṇaṃ pariyādiṇṇaṃ upanidhāyāti etadeva bahutaraṃ dukkhaṃ, yadidaṃ parikkhīṇanti evaṃ paṭhamaṃ vuttaṃ dukkhakkhandhaṃ upanidhāya, ñāṇena taṃ tassa santike ṭhapetvā upaparikkhiyamāneti attho. Katamaṃ panettha purimadukkhaṃ nāma? Yaṃ parikkhīṇaṃ. Katamaṃ pana parikkhīṇaṃ? Yaṃ paṭhamamaggassa abhāvitattā uppajjeyya. Katamaṃ pana upanidhāya? Yaṃ sattasu attabhāvesu apāye aṭṭhamañca paṭisandhiṃ ādiṃ katvā yattha katthaci uppajjeyya, sabbaṃ taṃ parikkhīṇanti veditabbaṃ. Sattakkhattunti satta vāre, sattasu attabhāvesūti attho. Paramatāti idamassa paraṃ pamāṇanti dasseti. Mahatthiyoti mahato atthassa nipphādako. Paṭhamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧. ਨਖਸਿਖਾਸੁਤ੍ਤਂ • 1. Nakhasikhāsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧. ਨਖਸਿਖਾਸੁਤ੍ਤવਣ੍ਣਨਾ • 1. Nakhasikhāsuttavaṇṇanā
