| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. နဇီရတိသုတ္တဝဏ္ဏနာ
6. Najīratisuttavaṇṇanā
၇၆. နာမဂောတ္တန္တိ တိသ္သော ကသ္သပော ဂောတမောတိ ဧဝရူပံ နာမဉ္စ ဂောတ္တဉ္စ။ နိဒသ္သနမတ္တမေတံ, တသ္မာ သဗ္ဗသ္သ ပညတ္တိယာ လက္ခဏဝစနန္တိ ဒဋ္ဌဗ္ဗံ။ န ဇီရတီတိ အသဘာဝဓမ္မတ္တာ ဥပ္ပာဒဝယာဘာဝတော ဇရံ န ပာပုဏာတိ။ တေနာဟ ‘‘ဇီရဏသဘာဝော န ဟောတီ’’တိ။ ယသ္မာ သမညာဘာဝတော ကာလန္တရေပိ တံ သမညာယတေဝ, တသ္မာ ‘‘အတီတဗုဒ္ဓာနံ။ပေ.။ န ဇီရတီတိ ဝုစ္စတီ’’တိ အာဟ။
76.Nāmagottanti tisso kassapo gotamoti evarūpaṃ nāmañca gottañca. Nidassanamattametaṃ, tasmā sabbassa paññattiyā lakkhaṇavacananti daṭṭhabbaṃ. Na jīratīti asabhāvadhammattā uppādavayābhāvato jaraṃ na pāpuṇāti. Tenāha ‘‘jīraṇasabhāvo na hotī’’ti. Yasmā samaññābhāvato kālantarepi taṃ samaññāyateva, tasmā ‘‘atītabuddhānaṃ…pe… na jīratīti vuccatī’’ti āha.
အာလသိယန္တိ အလသဘာဝော ဒဠ္ဟကောသဇ္ဇံ။ တေနာဟ ‘‘ယေနာ’’တိအာဒိ။ ဌိတိန္တိ ဗ္ယာပာရံ။ နိဒ္ဒာဝသေန ပမဇ္ဇနံ ကတ္တဗ္ဗသ္သ အကရဏံ။ ကိလေသဝသေန ပမဇ္ဇနံ အကတ္တဗ္ဗသ္သ ကရဏမ္ပိ။ ကမ္မသမယေတိ ကမ္မံ ကာတုံ ယုတ္တကာလေ။ ကမ္မကရဏဝီရိယာဘာဝောတိ တံကမ္မကိရိယသမုဋ္ဌာပကဝီရိယာဘာဝော။ သော ပန အတ္ထတော ဝီရိယပဋိပက္ခော အကုသလစိတ္တုပ္ပာဒော, န ဝီရိယသ္သ အဘာဝမတ္တံ။ သီလသညမာဘာဝော ဒုသ္သီလ္ယံ။ ဝိသ္သဋ္ဌာစာရတာ နာမ အနာစာရော။ သောပ္ပဗဟုလတာတိ နိဒ္ဒာလုတာ ။ ယတော ဂဟဏဟတ္ထောပိ န ကိလာသုပိ ပုရိသော နိဒ္ဒာယ အဘိဘုယ္ယတိ။ တေနာဟ ‘‘တာယာ’’တိအာဒိ။ အတိစ္ဆာတာဒီနီတိ အာဒိ-သဒ္ဒေန အဘိဘုယ္ယတာဒိံ သင္ဂဏ္ဟာတိ။ အာဂန္တုကာလသိယံ န ပုဗ္ဗေ ဝုတ္တအာလသ္ယံ ဝိယ ပကတိသိဒ္ဓံ။ ‘‘တေ ဆိဒ္ဒေ’’တိ ပာဠိယံ လိင္ဂဝိပလ္လာသေန ဝုတ္တန္တိ အာဟ ‘‘တာနိ ဆ ဆိဒ္ဒာနီ’’တိ။ ကုသလစိတ္တပ္ပဝတ္တိယာ အနောကာသဘာဝတော ဆိဒ္ဒာနိ။ တေနာဟ ဘဂဝာ – ‘‘ယတ္ထ ဝိတ္တံ န တိဋ္ဌတီ’’တိ။ သဗ္ဗာကာရေန လေသမတ္တံ အသေသေတ္ဝာတိ အဓိပ္ပာယော။
Ālasiyanti alasabhāvo daḷhakosajjaṃ. Tenāha ‘‘yenā’’tiādi. Ṭhitinti byāpāraṃ. Niddāvasena pamajjanaṃ kattabbassa akaraṇaṃ. Kilesavasena pamajjanaṃ akattabbassa karaṇampi. Kammasamayeti kammaṃ kātuṃ yuttakāle. Kammakaraṇavīriyābhāvoti taṃkammakiriyasamuṭṭhāpakavīriyābhāvo. So pana atthato vīriyapaṭipakkho akusalacittuppādo, na vīriyassa abhāvamattaṃ. Sīlasaññamābhāvo dussīlyaṃ. Vissaṭṭhācāratā nāma anācāro. Soppabahulatāti niddālutā . Yato gahaṇahatthopi na kilāsupi puriso niddāya abhibhuyyati. Tenāha ‘‘tāyā’’tiādi. Aticchātādīnīti ādi-saddena abhibhuyyatādiṃ saṅgaṇhāti. Āgantukālasiyaṃ na pubbe vuttaālasyaṃ viya pakatisiddhaṃ. ‘‘Te chidde’’ti pāḷiyaṃ liṅgavipallāsena vuttanti āha ‘‘tāni cha chiddānī’’ti. Kusalacittappavattiyā anokāsabhāvato chiddāni. Tenāha bhagavā – ‘‘yattha vittaṃ na tiṭṭhatī’’ti. Sabbākārena lesamattaṃ asesetvāti adhippāyo.
နဇီရတိသုတ္တဝဏ္ဏနာ နိဋ္ဌိတာ။
Najīratisuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. နဇီရတိသုတ္တံ • 6. Najīratisuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. နဇီရတိသုတ္တဝဏ္ဏနာ • 6. Najīratisuttavaṇṇanā
