| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
២. នាគសេនបញ្ហោ
2. Nāgasenapañho
២. ថេរោ អាហ ‘‘លោណំ, មហារាជ, ចក្ខុវិញ្ញេយ្យ’’ន្តិ។ ‘‘អាម, ភន្តេ, ចក្ខុវិញ្ញេយ្យ’’ន្តិ។ ‘‘សុដ្ឋុ ខោ, មហារាជ, ជានាហី’’តិ។ ‘‘កិំ បន, ភន្តេ, ជិវ្ហាវិញ្ញេយ្យ’’ន្តិ? ‘‘អាម, មហារាជ, ជិវ្ហាវិញ្ញេយ្យ’’ន្តិ។ ‘‘កិំ បន, ភន្តេ, សព្ពំ លោណំ ជិវ្ហាយ វិជានាតី’’តិ? ‘‘អាម, មហារាជ, សព្ពំ លោណំ ជិវ្ហាយ វិជានាតិ’’។
2. Thero āha ‘‘loṇaṃ, mahārāja, cakkhuviññeyya’’nti. ‘‘Āma, bhante, cakkhuviññeyya’’nti. ‘‘Suṭṭhu kho, mahārāja, jānāhī’’ti. ‘‘Kiṃ pana, bhante, jivhāviññeyya’’nti? ‘‘Āma, mahārāja, jivhāviññeyya’’nti. ‘‘Kiṃ pana, bhante, sabbaṃ loṇaṃ jivhāya vijānātī’’ti? ‘‘Āma, mahārāja, sabbaṃ loṇaṃ jivhāya vijānāti’’.
‘‘យទិ, ភន្តេ, សព្ពំ លោណំ ជិវ្ហាយ វិជានាតិ, កិស្ស បន តំ សកដេហិ ពលីពទ្ទា 1 អាហរន្តិ, ននុ លោណមេវ អាហរិតព្ព’’ន្តិ? ‘‘ន សក្កា, មហារាជ, លោណមេវ អាហរិតុំ ឯកតោភាវគតា ឯតេ ធម្មា គោចរនានត្តគតា លោណំ គរុភាវោ ចាតិ។ សក្កា បន, មហារាជ, លោណំ តុលាយ តុលយិតុ’’ន្តិ? ‘‘អាម, ភន្តេ, សក្កា’’តិ។ ‘‘ន សក្កា, មហារាជ, លោណំ តុលាយ តុលយិតុំ, គរុភាវោ តុលាយ តុលិយតី’’តិ។
‘‘Yadi, bhante, sabbaṃ loṇaṃ jivhāya vijānāti, kissa pana taṃ sakaṭehi balībaddā 2 āharanti, nanu loṇameva āharitabba’’nti? ‘‘Na sakkā, mahārāja, loṇameva āharituṃ ekatobhāvagatā ete dhammā gocaranānattagatā loṇaṃ garubhāvo cāti. Sakkā pana, mahārāja, loṇaṃ tulāya tulayitu’’nti? ‘‘Āma, bhante, sakkā’’ti. ‘‘Na sakkā, mahārāja, loṇaṃ tulāya tulayituṃ, garubhāvo tulāya tuliyatī’’ti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
នាគសេនបញ្ហោ ទុតិយោ។
Nāgasenapañho dutiyo.
Footnotes:
