| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៣. បញ្ចាយតនកម្មនិព្ពត្តបញ្ហោ
3. Pañcāyatanakammanibbattapañho
៣. រាជា អាហ ‘‘ភន្តេ នាគសេន, យានិមានិ បញ្ចាយតនានិ, កិំ នុ តានិ នានាកម្មេហិ និព្ពត្តានិ, ឧទាហុ ឯកេន កម្មេនា’’តិ? ‘‘នានាកម្មេហិ, មហារាជ, និព្ពត្តានិ, ន ឯកេន កម្មេនា’’តិ។
3. Rājā āha ‘‘bhante nāgasena, yānimāni pañcāyatanāni, kiṃ nu tāni nānākammehi nibbattāni, udāhu ekena kammenā’’ti? ‘‘Nānākammehi, mahārāja, nibbattāni, na ekena kammenā’’ti.
‘‘ឱបម្មំ ករោហី’’តិ។ ‘‘តំ កិំ មញ្ញសិ, មហារាជ, ឯកស្មិំ ខេត្តេ នានាពីជានិ វប្បេយ្យុំ , តេសំ នានាពីជានំ នានាផលានិ និព្ពត្តេយ្យុ’’ន្តិ? ‘‘អាម, ភន្តេ, និព្ពត្តេយ្យុ’’ន្តិ។ ‘‘ឯវមេវ ខោ, មហារាជ, យានិ យានិ បញ្ចាយតនានិ, តានិ តានិ នានាកម្មេហិ និព្ពត្តានិ, ន ឯកេន កម្មេនា’’តិ។
‘‘Opammaṃ karohī’’ti. ‘‘Taṃ kiṃ maññasi, mahārāja, ekasmiṃ khette nānābījāni vappeyyuṃ , tesaṃ nānābījānaṃ nānāphalāni nibbatteyyu’’nti? ‘‘Āma, bhante, nibbatteyyu’’nti. ‘‘Evameva kho, mahārāja, yāni yāni pañcāyatanāni, tāni tāni nānākammehi nibbattāni, na ekena kammenā’’ti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
បញ្ចាយតនកម្មនិព្ពត្តបញ្ហោ តតិយោ។
Pañcāyatanakammanibbattapañho tatiyo.
