| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༧. སཏྟརསམཝགྒོ
17. Sattarasamavaggo
(༡༧༣) ༨. ན ཝཏྟབྦཾ སངྒྷོ བྷུཉྫཏཱིཏིཀཐཱ
(173) 8. Na vattabbaṃ saṅgho bhuñjatītikathā
༧༩༥. ན ཝཏྟབྦཾ – ‘‘སངྒྷོ བྷུཉྫཏི པིཝཏི ཁཱདཏི སཱཡཏཱི’’ཏི? ཨཱམནྟཱ། ནནུ ཨཏྠི ཀེཙི སངྒྷབྷཏྟཱནི ཀརོནྟི, ཨུདྡེསབྷཏྟཱནི ཀརོནྟི, ཡཱགུཔཱནཱནི ཀརོནྟཱིཏི? ཨཱམནྟཱ། ཧཉྩི ཨཏྠི ཀེཙི སངྒྷབྷཏྟཱནི ཀརོནྟི, ཨུདྡེསབྷཏྟཱནི ཀརོནྟི, ཡཱགུཔཱནཱནི ཀརོནྟི, ཏེན ཝཏ རེ ཝཏྟབྦེ – ‘‘སངྒྷོ བྷུཉྫཏི པིཝཏི ཁཱདཏི སཱཡཏཱི’’ཏི།
795. Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu atthi keci saṅghabhattāni karonti, uddesabhattāni karonti, yāgupānāni karontīti? Āmantā. Hañci atthi keci saṅghabhattāni karonti, uddesabhattāni karonti, yāgupānāni karonti, tena vata re vattabbe – ‘‘saṅgho bhuñjati pivati khādati sāyatī’’ti.
ན ཝཏྟབྦཾ – ‘‘སངྒྷོ བྷུཉྫཏི པིཝཏི ཁཱདཏི སཱཡཏཱི’’ཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘གཎབྷོཛནཾ པརམྤརབྷོཛནཾ ཨཏིརིཏྟབྷོཛནཾ ཨནཏིརིཏྟབྷོཛན’’ནྟི? ཨཱམནྟཱ། ཧཉྩི ཝུཏྟཾ བྷགཝཏཱ – ‘‘གཎབྷོཛནཾ པརམྤརབྷོཛནཾ ཨཏིརིཏྟབྷོཛནཾ ཨནཏིརིཏྟབྷོཛནཾ’’, ཏེན ཝཏ རེ ཝཏྟབྦེ – ‘‘སངྒྷོ བྷུཉྫཏི པིཝཏི ཁཱདཏི སཱཡཏཱི’’ཏི།
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojana’’nti? Āmantā. Hañci vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojanaṃ’’, tena vata re vattabbe – ‘‘saṅgho bhuñjati pivati khādati sāyatī’’ti.
ན ཝཏྟབྦཾ – ‘‘སངྒྷོ བྷུཉྫཏི པིཝཏི ཁཱདཏི སཱཡཏཱི’’ཏི? ཨཱམནྟཱ། ནནུ ཨཊྛ པཱནཱནི ཝུཏྟཱནི བྷགཝཏཱ – ཨམྦཔཱནཾ, ཛམྦུཔཱནཾ , ཙོཙཔཱནཾ, མོཙཔཱནཾ, མདྷུཀཔཱནཾ, 1 མུདྡིཀཔཱནཾ, སཱལུཀཔཱནཾ, ཕཱརུསཀཔཱནནྟི? ཨཱམནྟཱ། ཧཉྩི ཨཊྛ པཱནཱནི ཝུཏྟཱནི བྷགཝཏཱ – ཨམྦཔཱནཾ, ཛམྦུཔཱནཾ, ཙོཙཔཱནཾ, མོཙཔཱནཾ, མདྷུཀཔཱནཾ, མུདྡིཀཔཱནཾ , སཱལུཀཔཱནཾ, ཕཱརུསཀཔཱནཾ, ཏེན ཝཏ རེ ཝཏྟབྦེ – ‘‘སངྒྷོ བྷུཉྫཏི པིཝཏི ཁཱདཏི སཱཡཏཱི’’ཏི།
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu aṭṭha pānāni vuttāni bhagavatā – ambapānaṃ, jambupānaṃ , cocapānaṃ, mocapānaṃ, madhukapānaṃ, 2 muddikapānaṃ, sālukapānaṃ, phārusakapānanti? Āmantā. Hañci aṭṭha pānāni vuttāni bhagavatā – ambapānaṃ, jambupānaṃ, cocapānaṃ, mocapānaṃ, madhukapānaṃ, muddikapānaṃ , sālukapānaṃ, phārusakapānaṃ, tena vata re vattabbe – ‘‘saṅgho bhuñjati pivati khādati sāyatī’’ti.
༧༩༦. སངྒྷོ བྷུཉྫཏི པིཝཏི ཁཱདཏི སཱཡཏཱིཏི? ཨཱམནྟཱ། མགྒོ བྷུཉྫཏི པིཝཏི ཁཱདཏི སཱཡཏི, ཕལཾ བྷུཉྫཏི པིཝཏི ཁཱདཏི སཱཡཏཱིཏི? ན ཧེཝཾ ཝཏྟབྦེ…པེ॰…།
796. Saṅgho bhuñjati pivati khādati sāyatīti? Āmantā. Maggo bhuñjati pivati khādati sāyati, phalaṃ bhuñjati pivati khādati sāyatīti? Na hevaṃ vattabbe…pe….
ན ཝཏྟབྦཾ སངྒྷོ བྷུཉྫཏཱིཏིཀཐཱ ནིཊྛིཏཱ།
Na vattabbaṃ saṅgho bhuñjatītikathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༨. ན ཝཏྟབྦཾ སངྒྷོ བྷུཉྫཏཱིཏིཀཐཱཝཎྞནཱ • 8. Na vattabbaṃ saṅgho bhuñjatītikathāvaṇṇanā
