| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៧. សត្តរសមវគ្គោ
17. Sattarasamavaggo
(១៧៥) ១០. ន វត្តព្ពំ ពុទ្ធស្សទិន្នំ មហប្ផលន្តិកថា
(175) 10. Na vattabbaṃ buddhassadinnaṃ mahapphalantikathā
៧៩៩. ន វត្តព្ពំ – ‘‘ពុទ្ធស្ស ទិន្នំ មហប្ផល’’ន្តិ? អាមន្តា។ ននុ ភគវា ទ្វិបទានំ អគ្គោ, ទ្វិបទានំ សេដ្ឋោ, ទ្វិបទានំ បមោក្ខោ, ទ្វិបទានំ ឧត្តមោ, ទ្វិបទានំ បវរោ អសមោ អសមសមោ អប្បដិសមោ អប្បដិភាគោ អប្បដិបុគ្គលោតិ? អាមន្តា។ ហញ្ចិ ភគវា ទ្វិបទានំ អគ្គោ, ទ្វិបទានំ សេដ្ឋោ, ទ្វិបទានំ បមោក្ខោ, ទ្វិបទានំ ឧត្តមោ, ទ្វិបទានំ បវរោ អសមោ អសមសមោ អប្បដិសមោ អប្បដិភាគោ អប្បដិបុគ្គលោ, តេន វត រេ វត្តព្ពេ – ‘‘ពុទ្ធស្ស ទិន្នំ មហប្ផល’’ន្តិ។
799. Na vattabbaṃ – ‘‘buddhassa dinnaṃ mahapphala’’nti? Āmantā. Nanu bhagavā dvipadānaṃ aggo, dvipadānaṃ seṭṭho, dvipadānaṃ pamokkho, dvipadānaṃ uttamo, dvipadānaṃ pavaro asamo asamasamo appaṭisamo appaṭibhāgo appaṭipuggaloti? Āmantā. Hañci bhagavā dvipadānaṃ aggo, dvipadānaṃ seṭṭho, dvipadānaṃ pamokkho, dvipadānaṃ uttamo, dvipadānaṃ pavaro asamo asamasamo appaṭisamo appaṭibhāgo appaṭipuggalo, tena vata re vattabbe – ‘‘buddhassa dinnaṃ mahapphala’’nti.
ន វត្តព្ពំ – ‘‘ពុទ្ធស្ស ទិន្នំ មហប្ផល’’ន្តិ? អាមន្តា។ អត្ថិ កោចិ ពុទ្ធេន សមសមោ – សីលេន សមាធិនា បញ្ញាយាតិ? នត្ថិ ។ ហញ្ចិ នត្ថិ កោចិ ពុទ្ធេន សមសមោ – សីលេន សមាធិនា បញ្ញាយ, តេន វត រេ វត្តព្ពេ – ‘‘ពុទ្ធស្ស ទិន្នំ មហប្ផល’’ន្តិ។
Na vattabbaṃ – ‘‘buddhassa dinnaṃ mahapphala’’nti? Āmantā. Atthi koci buddhena samasamo – sīlena samādhinā paññāyāti? Natthi . Hañci natthi koci buddhena samasamo – sīlena samādhinā paññāya, tena vata re vattabbe – ‘‘buddhassa dinnaṃ mahapphala’’nti.
ន វត្តព្ពំ – ‘‘ពុទ្ធស្ស ទិន្នំ មហប្ផល’’ន្តិ? អាមន្តា។ ននុ វុត្តំ ភគវតា –
Na vattabbaṃ – ‘‘buddhassa dinnaṃ mahapphala’’nti? Āmantā. Nanu vuttaṃ bhagavatā –
‘‘នយិមស្មិំ វា លោកេ បរស្មិំ វា បន,
‘‘Nayimasmiṃ vā loke parasmiṃ vā pana,
ពុទ្ធេន សេដ្ឋោ ច សមោ ច វិជ្ជតិ;
Buddhena seṭṭho ca samo ca vijjati;
យមាហុនេយ្យានំ អគ្គតំ គតោ,
Yamāhuneyyānaṃ aggataṃ gato,
អត្ថេវ សុត្តន្តោតិ? អាមន្តា។ តេន ហិ ពុទ្ធស្ស ទិន្នំ មហប្ផលន្តិ។
Attheva suttantoti? Āmantā. Tena hi buddhassa dinnaṃ mahapphalanti.
ន វត្តព្ពំ ពុទ្ធស្ស ទិន្នំ មហប្ផលន្តិកថា និដ្ឋិតា។
Na vattabbaṃ buddhassa dinnaṃ mahapphalantikathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១០. ន វត្តព្ពំ ពុទ្ធស្ស ទិន្នំ មហប្ផលន្តិកថាវណ្ណនា • 10. Na vattabbaṃ buddhassa dinnaṃ mahapphalantikathāvaṇṇanā
