| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៧. សត្តរសមវគ្គោ
17. Sattarasamavaggo
(១៧៦) ១១. ទក្ខិណាវិសុទ្ធិកថា
(176) 11. Dakkhiṇāvisuddhikathā
៨០០. ទាយកតោវ ទានំ វិសុជ្ឈតិ, នោ បដិគ្គាហកតោតិ? អាមន្តា។ ននុ អត្ថិ កេចិ បដិគ្គាហកា អាហុនេយ្យា បាហុនេយ្យា ទក្ខិណេយ្យា អញ្ជលិករណីយា អនុត្តរំ បុញ្ញក្ខេត្តំ លោកស្សាតិ? អាមន្តា ។ ហញ្ចិ អត្ថិ កេចិ បដិគ្គាហកា អាហុនេយ្យា បាហុនេយ្យា ទក្ខិណេយ្យា អញ្ជលិករណីយា អនុត្តរំ បុញ្ញក្ខេត្តំ លោកស្ស, នោ ច វត រេ វត្តព្ពេ – ‘‘ទាយកតោវ ទានំ វិសុជ្ឈតិ, នោ បដិគ្គាហកតោ’’តិ។
800. Dāyakatova dānaṃ visujjhati, no paṭiggāhakatoti? Āmantā. Nanu atthi keci paṭiggāhakā āhuneyyā pāhuneyyā dakkhiṇeyyā añjalikaraṇīyā anuttaraṃ puññakkhettaṃ lokassāti? Āmantā . Hañci atthi keci paṭiggāhakā āhuneyyā pāhuneyyā dakkhiṇeyyā añjalikaraṇīyā anuttaraṃ puññakkhettaṃ lokassa, no ca vata re vattabbe – ‘‘dāyakatova dānaṃ visujjhati, no paṭiggāhakato’’ti.
ទាយកតោវ ទានំ វិសុជ្ឈតិ, នោ បដិគ្គាហកតោតិ? អាមន្តា ។ ននុ ចត្តារោ បុរិសយុគា អដ្ឋ បុរិសបុគ្គលា ទក្ខិណេយ្យា វុត្តា ភគវតាតិ? អាមន្តា។ ហញ្ចិ ចត្តារោ បុរិសយុគា អដ្ឋ បុរិសបុគ្គលា ទក្ខិណេយ្យា វុត្តា ភគវតា, នោ ច វត រេ វត្តព្ពេ – ‘‘ទាយកតោវ ទានំ វិសុជ្ឈតិ, នោ បដិគ្គាហកតោ’’តិ។
Dāyakatova dānaṃ visujjhati, no paṭiggāhakatoti? Āmantā . Nanu cattāro purisayugā aṭṭha purisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, no ca vata re vattabbe – ‘‘dāyakatova dānaṃ visujjhati, no paṭiggāhakato’’ti.
ទាយកតោវ ទានំ វិសុជ្ឈតិ, នោ បដិគ្គាហកតោតិ? អាមន្តា។ ននុ អត្ថិ កេចិ សោតាបន្នេ ទានំ ទត្វា ទក្ខិណំ អារាធេន្តីតិ? អាមន្តា។ ហញ្ចិ អត្ថិ កេចិ សោតាបន្នេ ទានំ ទត្វា ទក្ខិណំ អារាធេន្តិ, នោ ច វត រេ វត្តព្ពេ – ‘‘ទាយកតោវ ទានំ វិសុជ្ឈតិ, នោ បដិគ្គាហកតោ’’តិ។
Dāyakatova dānaṃ visujjhati, no paṭiggāhakatoti? Āmantā. Nanu atthi keci sotāpanne dānaṃ datvā dakkhiṇaṃ ārādhentīti? Āmantā. Hañci atthi keci sotāpanne dānaṃ datvā dakkhiṇaṃ ārādhenti, no ca vata re vattabbe – ‘‘dāyakatova dānaṃ visujjhati, no paṭiggāhakato’’ti.
ននុ អត្ថិ កេចិ សកទាគាមិស្ស…បេ.… អនាគាមិស្ស…បេ.… អរហតោ ទានំ ទត្វា ទក្ខិណំ អារាធេន្តីតិ? អាមន្តា។ ហញ្ចិ អត្ថិ កេចិ អរហតោ ទានំ ទត្វា ទក្ខិណំ អារាធេន្តិ, នោ ច វត រេ វត្តព្ពេ – ‘‘ទាយកតោវ ទានំ វិសុជ្ឈតិ, នោ បដិគ្គាហកតោ’’តិ។
Nanu atthi keci sakadāgāmissa…pe… anāgāmissa…pe… arahato dānaṃ datvā dakkhiṇaṃ ārādhentīti? Āmantā. Hañci atthi keci arahato dānaṃ datvā dakkhiṇaṃ ārādhenti, no ca vata re vattabbe – ‘‘dāyakatova dānaṃ visujjhati, no paṭiggāhakato’’ti.
៨០១. បដិគ្គាហកតោ ទានំ វិសុជ្ឈតីតិ? អាមន្តា។ អញ្ញោ អញ្ញស្ស ការកោ, បរកតំ សុខទុក្ខំ, អញ្ញោ ករោតិ អញ្ញោ បដិសំវេទេតីតិ? ន ហេវំ វត្តព្ពេ…បេ.…។
801. Paṭiggāhakato dānaṃ visujjhatīti? Āmantā. Añño aññassa kārako, parakataṃ sukhadukkhaṃ, añño karoti añño paṭisaṃvedetīti? Na hevaṃ vattabbe…pe….
ទាយកតោវ ទានំ វិសុជ្ឈតិ, នោ បដិគ្គាហកតោតិ? អាមន្តា។ ននុ វុត្តំ ភគវតា – ‘‘ចតស្សោ ខោ ឥមា, អានន្ទ, ទក្ខិណា វិសុទ្ធិយោ! កតមា ចតស្សោ? អត្ថានន្ទ, ទក្ខិណា ទាយកតោ វិសុជ្ឈតិ, នោ បដិគ្គាហកតោ; អត្ថានន្ទ, ទក្ខិណា បដិគ្គាហកតោ វិសុជ្ឈតិ, នោ ទាយកតោ ; អត្ថានន្ទ, ទក្ខិណា ទាយកតោ ចេវ វិសុជ្ឈតិ បដិគ្គាហកតោ ច; អត្ថានន្ទ, ទក្ខិណា នេវ ទាយកតោ វិសុជ្ឈតិ, នោ បដិគ្គាហកតោ។ ឥមា ខោ, អានន្ទ, ចតស្សោ ទក្ខិណា វិសុទ្ធិយោ’’តិ 1។ អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘ទាយកតោវ ទានំ វិសុជ្ឈតិ, នោ បដិគ្គាហកតោ’’តិ។
Dāyakatova dānaṃ visujjhati, no paṭiggāhakatoti? Āmantā. Nanu vuttaṃ bhagavatā – ‘‘catasso kho imā, ānanda, dakkhiṇā visuddhiyo! Katamā catasso? Atthānanda, dakkhiṇā dāyakato visujjhati, no paṭiggāhakato; atthānanda, dakkhiṇā paṭiggāhakato visujjhati, no dāyakato ; atthānanda, dakkhiṇā dāyakato ceva visujjhati paṭiggāhakato ca; atthānanda, dakkhiṇā neva dāyakato visujjhati, no paṭiggāhakato. Imā kho, ānanda, catasso dakkhiṇā visuddhiyo’’ti 2. Attheva suttantoti? Āmantā. Tena hi na vattabbaṃ – ‘‘dāyakatova dānaṃ visujjhati, no paṭiggāhakato’’ti.
ទក្ខិណាវិសុទ្ធិកថា និដ្ឋិតា។
Dakkhiṇāvisuddhikathā niṭṭhitā.
សត្តរសមវគ្គោ។
Sattarasamavaggo.
តស្សុទ្ទានំ –
Tassuddānaṃ –
អត្ថិ អរហតោ បុញ្ញូបចយោ, នត្ថិ អរហតោ អកាលមច្ចុ, សព្ពមិទំ កម្មតោ, ឥន្ទ្រិយពទ្ធញ្ញេវ ទុក្ខំ, ឋបេត្វា អរិយមគ្គំ អវសេសា សង្ខារា ទុក្ខា, សង្ឃោ ទក្ខិណំ បដិគ្គណ្ហាតិ, សង្ឃោ ទក្ខិណំ វិសោធេតិ, សង្ឃោ ភុញ្ជតិ បិវតិ ខាទតិ សាយតិ, សង្ឃស្ស ទិន្នំ មហប្ផលំ, អត្ថិ ទានំ វិសុទ្ធិយាតិ 3។
Atthi arahato puññūpacayo, natthi arahato akālamaccu, sabbamidaṃ kammato, indriyabaddhaññeva dukkhaṃ, ṭhapetvā ariyamaggaṃ avasesā saṅkhārā dukkhā, saṅgho dakkhiṇaṃ paṭiggaṇhāti, saṅgho dakkhiṇaṃ visodheti, saṅgho bhuñjati pivati khādati sāyati, saṅghassa dinnaṃ mahapphalaṃ, atthi dānaṃ visuddhiyāti 4.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១១. ទក្ខិណាវិសុទ្ធិកថាវណ្ណនា • 11. Dakkhiṇāvisuddhikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១១. ទក្ខិណាវិសុទ្ធិកថាវណ្ណនា • 11. Dakkhiṇāvisuddhikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១១. ទក្ខិណាវិសុទ្ធិកថាវណ្ណនា • 11. Dakkhiṇāvisuddhikathāvaṇṇanā
