| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๔. ปาจิตฺติยกณฺฑํ
4. Pācittiyakaṇḍaṃ
๑. มุสาวาทวโคฺค
1. Musāvādavaggo
๑๖๕. สมฺปชานมุสาวาทํ ภาสโนฺต กติ อาปตฺติโย อาปชฺชติ? สมฺปชานมุสาวาทํ ภาสโนฺต ปญฺจ อาปตฺติโย อาปชฺชติฯ ปาปิโจฺฉ อิจฺฉาปกโต อสนฺตํ อภูตํ อุตฺตริมนุสฺสธมฺมํ อุลฺลปติ, อาปตฺติ ปาราชิกสฺส; ภิกฺขุํ อมูลเกน ปาราชิเกน ธเมฺมน อนุทฺธํเสติ, อาปตฺติ สงฺฆาทิเสสสฺส; ‘‘โย เต วิหาเร วสติ, โส ภิกฺขุ อรหา’’ติ ภณติ, ปฎิวิชานนฺตสฺส อาปตฺติ ถุลฺลจฺจยสฺส; น ปฎิวิชานนฺตสฺส อาปตฺติ ทุกฺกฎสฺส; สมฺปชานมุสาวาเท ปาจิตฺติยํ – สมฺปชานมุสาวาทํ ภาสโนฺต อิมา ปญฺจ อาปตฺติโย อาปชฺชติฯ
165. Sampajānamusāvādaṃ bhāsanto kati āpattiyo āpajjati? Sampajānamusāvādaṃ bhāsanto pañca āpattiyo āpajjati. Pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa; bhikkhuṃ amūlakena pārājikena dhammena anuddhaṃseti, āpatti saṅghādisesassa; ‘‘yo te vihāre vasati, so bhikkhu arahā’’ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa; sampajānamusāvāde pācittiyaṃ – sampajānamusāvādaṃ bhāsanto imā pañca āpattiyo āpajjati.
โอมสโนฺต เทฺว อาปตฺติโย อาปชฺชติฯ อุปสมฺปนฺนํ โอมสติ, อาปตฺติ ปาจิตฺติยสฺส; อนุปสมฺปนฺนํ โอมสติ, อาปตฺติ ทุกฺกฎสฺสฯ
Omasanto dve āpattiyo āpajjati. Upasampannaṃ omasati, āpatti pācittiyassa; anupasampannaṃ omasati, āpatti dukkaṭassa.
เปสุญฺญํ อุปสํหรโนฺต เทฺว อาปตฺติโย อาปชฺชติฯ อุปสมฺปนฺนสฺส เปสุญฺญํ อุปสํหรติ, อาปตฺติ ปาจิตฺติยสฺส; อนุปสมฺปนฺนสฺส เปสุญฺญํ อุปสํหรติ, อาปตฺติ ทุกฺกฎสฺสฯ
Pesuññaṃ upasaṃharanto dve āpattiyo āpajjati. Upasampannassa pesuññaṃ upasaṃharati, āpatti pācittiyassa; anupasampannassa pesuññaṃ upasaṃharati, āpatti dukkaṭassa.
อนุปสมฺปนฺนํ ปทโส ธมฺมํ วาเจโนฺต เทฺว อาปตฺติโย อาปชฺชติฯ วาเจติ, ปโยเค ทุกฺกฎํ; ปเท ปเท อาปตฺติ ปาจิตฺติยสฺสฯ
Anupasampannaṃ padaso dhammaṃ vācento dve āpattiyo āpajjati. Vāceti, payoge dukkaṭaṃ; pade pade āpatti pācittiyassa.
อนุปสมฺปเนฺนน อุตฺตริทิรตฺตติรตฺตํ สหเสยฺยํ กเปฺปโนฺต เทฺว อาปตฺติโย อาปชฺชติฯ นิปชฺชติ, ปโยเค ทุกฺกฎํ; นิปเนฺน อาปตฺติ ปาจิตฺติยสฺสฯ
Anupasampannena uttaridirattatirattaṃ sahaseyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
มาตุคาเมน สหเสยฺยํ กเปฺปโนฺต เทฺว อาปตฺติโย อาปชฺชติฯ นิปชฺชติ, ปโยเค ทุกฺกฎํ; นิปเนฺน อาปตฺติ ปาจิตฺติยสฺสฯ
Mātugāmena sahaseyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
มาตุคามสฺส อุตฺตริฉปฺปญฺจวาจาหิ ธมฺมํ เทเสโนฺต เทฺว อาปตฺติโย อาปชฺชติฯ เทเสติ, ปโยเค ทุกฺกฎํ; ปเท ปเท อาปตฺติ ปาจิตฺติยสฺสฯ
Mātugāmassa uttarichappañcavācāhi dhammaṃ desento dve āpattiyo āpajjati. Deseti, payoge dukkaṭaṃ; pade pade āpatti pācittiyassa.
อนุปสมฺปนฺนสฺส อุตฺตริมนุสฺสธมฺมํ ภูตํ อาโรเจโนฺต เทฺว อาปตฺติโย อาปชฺชติฯ อาโรเจติ, ปโยเค ทุกฺกฎํ; อาโรจิเต อาปตฺติ ปาจิตฺติยสฺสฯ
Anupasampannassa uttarimanussadhammaṃ bhūtaṃ ārocento dve āpattiyo āpajjati. Āroceti, payoge dukkaṭaṃ; ārocite āpatti pācittiyassa.
ภิกฺขุสฺส ทุฎฺฐุลฺลํ อาปตฺติํ อนุปสมฺปนฺนสฺส อาโรเจโนฺต เทฺว อาปตฺติโย อาปชฺชติฯ อาโรเจติ, ปโยเค ทุกฺกฎํ; อาโรจิเต อาปตฺติ ปาจิตฺติยสฺสฯ
Bhikkhussa duṭṭhullaṃ āpattiṃ anupasampannassa ārocento dve āpattiyo āpajjati. Āroceti, payoge dukkaṭaṃ; ārocite āpatti pācittiyassa.
ปถวิํ ขณโนฺต เทฺว อาปตฺติโย อาปชฺชติฯ ขณติ, ปโยเค ทุกฺกฎํ; ปหาเร ปหาเร อาปตฺติ ปาจิตฺติยสฺสฯ
Pathaviṃ khaṇanto dve āpattiyo āpajjati. Khaṇati, payoge dukkaṭaṃ; pahāre pahāre āpatti pācittiyassa.
มุสาวาทวโคฺค ปฐโมฯ
Musāvādavaggo paṭhamo.
