| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៥. មោឃរាជត្ថេរអបទានំ
5. Mogharājattheraapadānaṃ
៦៤.
64.
‘‘អត្ថទស្សី តុ ភគវា, សយម្ភូ អបរាជិតោ;
‘‘Atthadassī tu bhagavā, sayambhū aparājito;
ភិក្ខុសង្ឃបរិព្យូឡ្ហោ, រថិយំ បដិបជ្ជថ។
Bhikkhusaṅghaparibyūḷho, rathiyaṃ paṭipajjatha.
៦៥.
65.
‘‘សិស្សេហិ សម្បរិវុតោ, ឃរម្ហា អភិនិក្ខមិំ;
‘‘Sissehi samparivuto, gharamhā abhinikkhamiṃ;
និក្ខមិត្វានហំ តត្ថ, អទ្ទសំ លោកនាយកំ។
Nikkhamitvānahaṃ tattha, addasaṃ lokanāyakaṃ.
៦៦.
66.
‘‘អភិវាទិយ សម្ពុទ្ធំ, សិរេ កត្វាន អញ្ជលិំ;
‘‘Abhivādiya sambuddhaṃ, sire katvāna añjaliṃ;
សកំ ចិត្តំ បសាទេត្វា, សន្ថវិំ លោកនាយកំ។
Sakaṃ cittaṃ pasādetvā, santhaviṃ lokanāyakaṃ.
៦៧.
67.
‘‘យាវតា រូបិនោ សត្តា, អរូបី វា អសញ្ញិនោ;
‘‘Yāvatā rūpino sattā, arūpī vā asaññino;
សព្ពេ តេ តវ ញាណម្ហិ, អន្តោ ហោន្តិ សមោគធា។
Sabbe te tava ñāṇamhi, anto honti samogadhā.
៦៨.
68.
‘‘សុខុមច្ឆិកជាលេន , ឧទកំ យោ បរិក្ខិបេ;
‘‘Sukhumacchikajālena , udakaṃ yo parikkhipe;
យេ កេចិ ឧទកេ បាណា, អន្តោជាលេ ភវន្តិ តេ។
Ye keci udake pāṇā, antojāle bhavanti te.
៦៩.
69.
‘‘យេសញ្ច ចេតនា អត្ថិ, រូបិនោ ច អរូបិនោ;
‘‘Yesañca cetanā atthi, rūpino ca arūpino;
សព្ពេ តេ តវ ញាណម្ហិ, អន្តោ ហោន្តិ សមោគធា។
Sabbe te tava ñāṇamhi, anto honti samogadhā.
៧០.
70.
‘‘សមុទ្ធរសិមំ លោកំ, អន្ធការសមាកុលំ;
‘‘Samuddharasimaṃ lokaṃ, andhakārasamākulaṃ;
តវ ធម្មំ សុណិត្វាន, កង្ខាសោតំ តរន្តិ តេ។
Tava dhammaṃ suṇitvāna, kaṅkhāsotaṃ taranti te.
៧១.
71.
‘‘អវិជ្ជានិវុតេ លោកេ, អន្ធការេន ឱត្ថដេ;
‘‘Avijjānivute loke, andhakārena otthaṭe;
តវ ញាណម្ហិ ជោតន្តេ, អន្ធការា បធំសិតា។
Tava ñāṇamhi jotante, andhakārā padhaṃsitā.
៧២.
72.
‘‘តុវំ ចក្ខូសិ សព្ពេសំ, មហាតមបនូទនោ;
‘‘Tuvaṃ cakkhūsi sabbesaṃ, mahātamapanūdano;
តវ ធម្មំ សុណិត្វាន, និព្ពាយតិ ពហុជ្ជនោ។
Tava dhammaṃ suṇitvāna, nibbāyati bahujjano.
៧៣.
73.
ឧភោ ហត្ថេហិ បគ្គយ្ហ, ឧបនេសិំ មហេសិនោ។
Ubho hatthehi paggayha, upanesiṃ mahesino.
៧៤.
74.
‘‘បដិគ្គណ្ហិ មហាវីរោ, សហត្ថេន មហា ឥសី;
‘‘Paṭiggaṇhi mahāvīro, sahatthena mahā isī;
ភុញ្ជិត្វា តញ្ច សព្ពញ្ញូ, វេហាសំ នភមុគ្គមិ។
Bhuñjitvā tañca sabbaññū, vehāsaṃ nabhamuggami.
៧៥.
75.
‘‘អន្តលិក្ខេ ឋិតោ សត្ថា, អត្ថទស្សី នរាសភោ;
‘‘Antalikkhe ṭhito satthā, atthadassī narāsabho;
មម ចិត្តំ បសាទេន្តោ, ឥមា គាថា អភាសថ។
Mama cittaṃ pasādento, imā gāthā abhāsatha.
៧៦.
76.
‘‘‘យេនិទំ ថវិតំ ញាណំ, ពុទ្ធសេដ្ឋោ ច ថោមិតោ;
‘‘‘Yenidaṃ thavitaṃ ñāṇaṃ, buddhaseṭṭho ca thomito;
តេន ចិត្តប្បសាទេន, ទុគ្គតិំ សោ ន គច្ឆតិ។
Tena cittappasādena, duggatiṃ so na gacchati.
៧៧.
77.
បថព្យា រជ្ជំ អដ្ឋសតំ, វសុធំ អាវសិស្សតិ។
Pathabyā rajjaṃ aṭṭhasataṃ, vasudhaṃ āvasissati.
៧៨.
78.
បទេសរជ្ជំ អសង្ខេយ្យំ, មហិយា ការយិស្សតិ។
Padesarajjaṃ asaṅkheyyaṃ, mahiyā kārayissati.
៧៩.
79.
‘‘‘អជ្ឈាយកោ មន្តធរោ, តិណ្ណំ វេទាន បារគូ;
‘‘‘Ajjhāyako mantadharo, tiṇṇaṃ vedāna pāragū;
គោតមស្ស ភគវតោ, សាសនេ បព្ពជិស្សតិ។
Gotamassa bhagavato, sāsane pabbajissati.
៨០.
80.
‘‘‘គម្ភីរំ និបុណំ អត្ថំ, ញាណេន វិចិនិស្សតិ;
‘‘‘Gambhīraṃ nipuṇaṃ atthaṃ, ñāṇena vicinissati;
មោឃរាជាតិ នាមេន, ហេស្សតិ សត្ថុ សាវកោ។
Mogharājāti nāmena, hessati satthu sāvako.
៨១.
81.
‘‘‘តីហិ វិជ្ជាហិ សម្បន្នំ, កតកិច្ចមនាសវំ;
‘‘‘Tīhi vijjāhi sampannaṃ, katakiccamanāsavaṃ;
គោតមោ សត្ថវាហគ្គោ, ឯតទគ្គេ ឋបេស្សតិ’។
Gotamo satthavāhaggo, etadagge ṭhapessati’.
៨២.
82.
‘‘ហិត្វា មានុសកំ យោគំ, ឆេត្វាន ភវពន្ធនំ;
‘‘Hitvā mānusakaṃ yogaṃ, chetvāna bhavabandhanaṃ;
សព្ពាសវេ បរិញ្ញាយ, វិហរាមិ អនាសវោ។
Sabbāsave pariññāya, viharāmi anāsavo.
៨៣.
83.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា មោឃរាជោ ថេរោ ឥមា គាថាយោ អភាសិត្ថាតិ;
Itthaṃ sudaṃ āyasmā mogharājo thero imā gāthāyo abhāsitthāti;
មោឃរាជត្ថេរស្សាបទានំ បញ្ចមំ។
Mogharājattherassāpadānaṃ pañcamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ៥. មោឃរាជត្ថេរអបទានវណ្ណនា • 5. Mogharājattheraapadānavaṇṇanā
