| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
१५. मोघराजमाणवपुच्छा
15. Mogharājamāṇavapucchā
११२२.
1122.
‘‘द्वाहं सक्कं अपुच्छिस्सं, (इच्चायस्मा मोघराजा)
‘‘Dvāhaṃ sakkaṃ apucchissaṃ, (iccāyasmā mogharājā)
न मे ब्याकासि चक्खुमा।
Na me byākāsi cakkhumā;
यावततियञ्च देवीसि, ब्याकरोतीति मे सुतं॥
Yāvatatiyañca devīsi, byākarotīti me sutaṃ.
११२३.
1123.
‘‘अयं लोको परो लोको, ब्रह्मलोको सदेवको।
‘‘Ayaṃ loko paro loko, brahmaloko sadevako;
दिट्ठिं ते नाभिजानाति, गोतमस्स यसस्सिनो॥
Diṭṭhiṃ te nābhijānāti, gotamassa yasassino.
११२४.
1124.
‘‘एवं अभिक्कन्तदस्साविं, अत्थि पञ्हेन आगमं।
‘‘Evaṃ abhikkantadassāviṃ, atthi pañhena āgamaṃ;
कथं लोकं अवेक्खन्तं, मच्चुराजा न पस्सति’’॥
Kathaṃ lokaṃ avekkhantaṃ, maccurājā na passati’’.
११२५.
1125.
‘‘सुञ्ञतो लोकं अवेक्खस्सु, मोघराज सदा सतो।
‘‘Suññato lokaṃ avekkhassu, mogharāja sadā sato;
अत्तानुदिट्ठिं ऊहच्च, एवं मच्चुतरो सिया।
Attānudiṭṭhiṃ ūhacca, evaṃ maccutaro siyā;
एवं लोकं अवेक्खन्तं, मच्चुराजा न पस्सती’’ति॥
Evaṃ lokaṃ avekkhantaṃ, maccurājā na passatī’’ti.
मोघराजमाणवपुच्छा पन्नरसमा निट्ठिता।
Mogharājamāṇavapucchā pannarasamā niṭṭhitā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / १५. मोघराजसुत्तवण्णना • 15. Mogharājasuttavaṇṇanā
