| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
។ នមោ តស្ស ភគវតោ អរហតោ សម្មាសម្ពុទ្ធស្ស។
Namo tassa bhagavato arahato sammāsambuddhassa
ខុទ្ទកនិកាយេ
Khuddakanikāye
មិលិន្ទបញ្ហបាឡិ
Milindapañhapāḷi
១.
1.
មិលិន្ទោ នាម សោ រាជា, សាគលាយំ បុរុត្តមេ;
Milindo nāma so rājā, sāgalāyaṃ puruttame;
អាសជ្ជ រាជា ចិត្រកថិំ, ឧក្កាធារំ តមោនុទំ;
Āsajja rājā citrakathiṃ, ukkādhāraṃ tamonudaṃ;
អបុច្ឆិ និបុណេ បញ្ហេ, ឋានាដ្ឋានគតេ បុថូ។
Apucchi nipuṇe pañhe, ṭhānāṭṭhānagate puthū.
ហទយង្គមា កណ្ណសុខា, អព្ភុតា លោមហំសនា។
Hadayaṅgamā kaṇṇasukhā, abbhutā lomahaṃsanā.
អភិធម្មវិនយោគាឡ្ហា, សុត្តជាលសមត្តិតា;
Abhidhammavinayogāḷhā, suttajālasamattitā;
នាគសេនកថា ចិត្រា, ឱបម្មេហិ នយេហិ ច។
Nāgasenakathā citrā, opammehi nayehi ca.
តត្ថ ញាណំ បណិធាយ, ហាសយិត្វាន មានសំ;
Tattha ñāṇaṃ paṇidhāya, hāsayitvāna mānasaṃ;
សុណាថ និបុណេ បញ្ហេ, កង្ខាដ្ឋានវិទាលនេតិ។
Suṇātha nipuṇe pañhe, kaṅkhāṭṭhānavidālaneti.
២. តំ យថានុសូយតេ – អត្ថិ យោនកានំ នានាបុដភេទនំ សាគលំ នាម នគរំ នទីបព្ពតសោភិតំ រមណីយភូមិប្បទេសភាគំ អារាមុយ្យានោបវនតឡាកបោក្ខរណិសម្បន្នំ នទីបព្ពតវនរាមណេយ្យកំ សុតវន្តនិម្មិតំ និហតបច្ចត្ថិកំ 5 បច្ចាមិត្តានុបបីឡិតំ វិវិធវិចិត្រទឡ្ហមដ្ដាលកោដ្ឋកំ វរបវរគោបុរ 6 តោរណំ គម្ភីរបរិខាបណ្ឌរបាការបរិក្ខិត្តន្តេបុរំ។ សុវិភត្តវីថិចច្ចរចតុក្កសិង្ឃាដកំ សុប្បសារិតានេកវិធវរភណ្ឌបរិបូរិតន្តរាបណំ វិវិធទានគ្គសតសមុបសោភិតំ 7 ហិមគិរិសិខរសង្កាសវរភវនសតសហស្សប្បដិមណ្ឌិតំ គជហយរថបត្តិសមាកុលំ អភិរូបនរនារិគណានុចរិតំ អាកិណ្ណជនមនុស្សំ បុថុខត្តិយព្រាហ្មណវេស្សសុទ្ទំ វិវិធសមណព្រាហ្មណសភាជន 8 សង្ឃដិតំ ពហុវិធវិជ្ជាវន្ត 9 នរចិរ 10 និសេវិតំ កាសិកកោដុម្ពរិកាទិនានាវិធវត្ថាបណសម្បន្នំ សុប្បសារិតរុចិរពហុវិធបុប្ផគន្ធាបណំ គន្ធគន្ធិតំ អាសីសនីយពហុរតនបរិបូរិតំ ទិសាមុខសុប្បសារិតាបណំ សិង្គារវាណិជគណានុចរិតំ កហាបណរជតសុវណ្ណកំសបត្ថរបរិបូរំ បជ្ជោតមាននិធិនិកេតំ បហូតធនធញ្ញវិត្តូបករណំ បរិបុណ្ណកោសកោដ្ឋាគារំ ពហ្វន្នបានំ ពហុវិធខជ្ជភោជ្ជលេយ្យបេយ្យសាយនីយំ ឧត្តរកុរុសង្កាសំ សម្បន្នសស្សំ អាឡកមន្ទា វិយ ទេវបុរំ។
2. Taṃ yathānusūyate – atthi yonakānaṃ nānāpuṭabhedanaṃ sāgalaṃ nāma nagaraṃ nadīpabbatasobhitaṃ ramaṇīyabhūmippadesabhāgaṃ ārāmuyyānopavanataḷākapokkharaṇisampannaṃ nadīpabbatavanarāmaṇeyyakaṃ sutavantanimmitaṃ nihatapaccatthikaṃ 11 paccāmittānupapīḷitaṃ vividhavicitradaḷhamaṭṭālakoṭṭhakaṃ varapavaragopura 12 toraṇaṃ gambhīraparikhāpaṇḍarapākāraparikkhittantepuraṃ. Suvibhattavīthicaccaracatukkasiṅghāṭakaṃ suppasāritānekavidhavarabhaṇḍaparipūritantarāpaṇaṃ vividhadānaggasatasamupasobhitaṃ 13 himagirisikharasaṅkāsavarabhavanasatasahassappaṭimaṇḍitaṃ gajahayarathapattisamākulaṃ abhirūpanaranārigaṇānucaritaṃ ākiṇṇajanamanussaṃ puthukhattiyabrāhmaṇavessasuddaṃ vividhasamaṇabrāhmaṇasabhājana 14 saṅghaṭitaṃ bahuvidhavijjāvanta 15 naracira 16 nisevitaṃ kāsikakoṭumbarikādinānāvidhavatthāpaṇasampannaṃ suppasāritarucirabahuvidhapupphagandhāpaṇaṃ gandhagandhitaṃ āsīsanīyabahuratanaparipūritaṃ disāmukhasuppasāritāpaṇaṃ siṅgāravāṇijagaṇānucaritaṃ kahāpaṇarajatasuvaṇṇakaṃsapattharaparipūraṃ pajjotamānanidhiniketaṃ pahūtadhanadhaññavittūpakaraṇaṃ paripuṇṇakosakoṭṭhāgāraṃ bahvannapānaṃ bahuvidhakhajjabhojjaleyyapeyyasāyanīyaṃ uttarakurusaṅkāsaṃ sampannasassaṃ āḷakamandā viya devapuraṃ.
ឯត្ថ ឋត្វា តេសំ បុព្ពកម្មំ កថេតព្ពំ, កថេន្តេន ច ឆធា វិភជិត្វា កថេតព្ពំ។ សេយ្យថីទំ – បុព្ពយោគោ មិលិន្ទបញ្ហំ លក្ខណបញ្ហំ មេណ្ឌកបញ្ហំ អនុមានបញ្ហំ ឱបម្មកថាបញ្ហន្តិ។
Ettha ṭhatvā tesaṃ pubbakammaṃ kathetabbaṃ, kathentena ca chadhā vibhajitvā kathetabbaṃ. Seyyathīdaṃ – pubbayogo milindapañhaṃ lakkhaṇapañhaṃ meṇḍakapañhaṃ anumānapañhaṃ opammakathāpañhanti.
តត្ថ មិលិន្ទបញ្ហោ លក្ខណបញ្ហោ, វិមតិច្ឆេទនបញ្ហោតិ ទុវិធោ។ មេណ្ឌកបញ្ហោបិ មហាវគ្គោ, យោគិកថាបញ្ហោតិ ទុវិធោ។
Tattha milindapañho lakkhaṇapañho, vimaticchedanapañhoti duvidho. Meṇḍakapañhopi mahāvaggo, yogikathāpañhoti duvidho.
បុព្ពយោគោតិ តេសំ បុព្ពកម្មំ។
Pubbayogoti tesaṃ pubbakammaṃ.
Footnotes:
