| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৪. মেত্তগূমাণৰপুচ্ছা
4. Mettagūmāṇavapucchā
১০৫৫.
1055.
‘‘পুচ্ছামি তং ভগৰা ব্রূহি মে তং, (ইচ্চাযস্মা মেত্তগূ)
‘‘Pucchāmi taṃ bhagavā brūhi me taṃ, (iccāyasmā mettagū)
মঞ্ঞামি তং ৰেদগুং ভাৰিতত্তং।
Maññāmi taṃ vedaguṃ bhāvitattaṃ;
কুতো নু দুক্খা সমুদাগতা ইমে, যে কেচি লোকস্মিমনেকরূপা’’॥
Kuto nu dukkhā samudāgatā ime, ye keci lokasmimanekarūpā’’.
১০৫৬.
1056.
‘‘দুক্খস্স ৰে মং পভৰং অপুচ্ছসি, (মেত্তগূতি ভগৰা)
‘‘Dukkhassa ve maṃ pabhavaṃ apucchasi, (mettagūti bhagavā)
তং তে পৰক্খামি যথা পজানং।
Taṃ te pavakkhāmi yathā pajānaṃ;
উপধিনিদানা পভৰন্তি দুক্খা, যে কেচি লোকস্মিমনেকরূপা॥
Upadhinidānā pabhavanti dukkhā, ye keci lokasmimanekarūpā.
১০৫৭.
1057.
‘‘যো ৰে অৰিদ্ৰা উপধিং করোতি, পুনপ্পুনং দুক্খমুপেতি মন্দো।
‘‘Yo ve avidvā upadhiṃ karoti, punappunaṃ dukkhamupeti mando;
তস্মা পজানং উপধিং ন কযিরা, দুক্খস্স জাতিপ্পভৰানুপস্সী’’॥
Tasmā pajānaṃ upadhiṃ na kayirā, dukkhassa jātippabhavānupassī’’.
১০৫৮.
1058.
‘‘যং তং অপুচ্ছিম্হ অকিত্তযী নো, অঞ্ঞং তং পুচ্ছাম 1 তদিঙ্ঘ ব্রূহি।
‘‘Yaṃ taṃ apucchimha akittayī no, aññaṃ taṃ pucchāma 2 tadiṅgha brūhi;
কথং নু ধীরা ৰিতরন্তি ওঘং, জাতিং জরং সোকপরিদ্দৰঞ্চ।
Kathaṃ nu dhīrā vitaranti oghaṃ, jātiṃ jaraṃ sokapariddavañca;
তং মে মুনি সাধু ৰিযাকরোহি, তথা হি তে ৰিদিতো এস ধম্মো’’॥
Taṃ me muni sādhu viyākarohi, tathā hi te vidito esa dhammo’’.
১০৫৯.
1059.
‘‘কিত্তযিস্সামি তে ধম্মং, (মেত্তগূতি ভগৰা)
‘‘Kittayissāmi te dhammaṃ, (mettagūti bhagavā)
দিট্ঠে ধম্মে অনীতিহং।
Diṭṭhe dhamme anītihaṃ;
যং ৰিদিত্ৰা সতো চরং, তরে লোকে ৰিসত্তিকং’’॥
Yaṃ viditvā sato caraṃ, tare loke visattikaṃ’’.
১০৬০.
1060.
‘‘তঞ্চাহং অভিনন্দামি, মহেসি ধম্মমুত্তমং।
‘‘Tañcāhaṃ abhinandāmi, mahesi dhammamuttamaṃ;
যং ৰিদিত্ৰা সতো চরং, তরে লোকে ৰিসত্তিকং’’॥
Yaṃ viditvā sato caraṃ, tare loke visattikaṃ’’.
১০৬১.
1061.
‘‘যং কিঞ্চি সম্পজানাসি, (মেত্তগূতি ভগৰা)
‘‘Yaṃ kiñci sampajānāsi, (mettagūti bhagavā)
উদ্ধং অধো তিরিযঞ্চাপি মজ্ঝে।
Uddhaṃ adho tiriyañcāpi majjhe;
এতেসু নন্দিঞ্চ নিৰেসনঞ্চ, পনুজ্জ ৰিঞ্ঞাণং ভৰে ন তিট্ঠে॥
Etesu nandiñca nivesanañca, panujja viññāṇaṃ bhave na tiṭṭhe.
১০৬২.
1062.
‘‘এৰংৰিহারী সতো অপ্পমত্তো, ভিক্খু চরং হিত্ৰা মমাযিতানি।
‘‘Evaṃvihārī sato appamatto, bhikkhu caraṃ hitvā mamāyitāni;
জাতিং জরং সোকপরিদ্দৰঞ্চ, ইধেৰ ৰিদ্ৰা পজহেয্য দুক্খং’’॥
Jātiṃ jaraṃ sokapariddavañca, idheva vidvā pajaheyya dukkhaṃ’’.
১০৬৩.
1063.
‘‘এতাভিনন্দামি ৰচো মহেসিনো, সুকিত্তিতং গোতমনূপধীকং।
‘‘Etābhinandāmi vaco mahesino, sukittitaṃ gotamanūpadhīkaṃ;
অদ্ধা হি ভগৰা পহাসি দুক্খং, তথা হি তে ৰিদিতো এস ধম্মো॥
Addhā hi bhagavā pahāsi dukkhaṃ, tathā hi te vidito esa dhammo.
১০৬৪.
1064.
‘‘তে চাপি নূনপ্পজহেয্যু দুক্খং, যে ত্ৰং মুনি অট্ঠিতং ওৰদেয্য।
‘‘Te cāpi nūnappajaheyyu dukkhaṃ, ye tvaṃ muni aṭṭhitaṃ ovadeyya;
তং তং নমস্সামি সমেচ্চ নাগ, অপ্পেৰ মং ভগৰা অট্ঠিতং ওৰদেয্য’’॥
Taṃ taṃ namassāmi samecca nāga, appeva maṃ bhagavā aṭṭhitaṃ ovadeyya’’.
১০৬৫.
1065.
‘‘যং ব্রাহ্মণং ৰেদগুমাভিজঞ্ঞা, অকিঞ্চনং কামভৰে অসত্তং।
‘‘Yaṃ brāhmaṇaṃ vedagumābhijaññā, akiñcanaṃ kāmabhave asattaṃ;
অদ্ধা হি সো ওঘমিমং অতারি, তিণ্ণো চ পারং অখিলো অকঙ্খো॥
Addhā hi so oghamimaṃ atāri, tiṇṇo ca pāraṃ akhilo akaṅkho.
১০৬৬.
1066.
‘‘ৰিদ্ৰা চ যো 3 ৰেদগূ নরো ইধ, ভৰাভৰে সঙ্গমিমং ৰিসজ্জ।
‘‘Vidvā ca yo 4 vedagū naro idha, bhavābhave saṅgamimaṃ visajja;
সো ৰীততণ্হো অনীঘো নিরাসো, অতারি সো জাতিজরন্তি ব্রূমী’’তি॥
So vītataṇho anīgho nirāso, atāri so jātijaranti brūmī’’ti.
মেত্তগূমাণৰপুচ্ছা চতুত্থী নিট্ঠিতা।
Mettagūmāṇavapucchā catutthī niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ৪. মেত্তগূসুত্তৰণ্ণনা • 4. Mettagūsuttavaṇṇanā
