| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
१०. मारधेय्यसुत्तं
10. Māradheyyasuttaṃ
५९. वुत्तञ्हेतं भगवता, वुत्तमरहताति मे सुतं –
59. Vuttañhetaṃ bhagavatā, vuttamarahatāti me sutaṃ –
‘‘तीहि, भिक्खवे, धम्मेहि समन्नागतो भिक्खु अतिक्कम्म मारधेय्यं आदिच्चोव विरोचति। कतमेहि तीहि? इध, भिक्खवे, भिक्खु असेखेन सीलक्खन्धेन समन्नागतो होति, असेखेन समाधिक्खन्धेन समन्नागतो होति, असेखेन पञ्ञाक्खन्धेन समन्नागतो होति – इमेहि खो, भिक्खवे, तीहि धम्मेहि समन्नागतो भिक्खु अतिक्कम्म मारधेय्यं आदिच्चोव विरोचती’’ति। एतमत्थं भगवा अवोच। तत्थेतं इति वुच्चति –
‘‘Tīhi, bhikkhave, dhammehi samannāgato bhikkhu atikkamma māradheyyaṃ ādiccova virocati. Katamehi tīhi? Idha, bhikkhave, bhikkhu asekhena sīlakkhandhena samannāgato hoti, asekhena samādhikkhandhena samannāgato hoti, asekhena paññākkhandhena samannāgato hoti – imehi kho, bhikkhave, tīhi dhammehi samannāgato bhikkhu atikkamma māradheyyaṃ ādiccova virocatī’’ti. Etamatthaṃ bhagavā avoca. Tatthetaṃ iti vuccati –
‘‘सीलं समाधि पञ्ञा च, यस्स एते सुभाविता।
‘‘Sīlaṃ samādhi paññā ca, yassa ete subhāvitā;
अतिक्कम्म मारधेय्यं, आदिच्चोव विरोचती’’ति॥
Atikkamma māradheyyaṃ, ādiccova virocatī’’ti.
अयम्पि अत्थो वुत्तो भगवता, इति मे सुतन्ति। दसमं।
Ayampi attho vutto bhagavatā, iti me sutanti. Dasamaṃ.
पठमो वग्गो निट्ठितो।
Paṭhamo vaggo niṭṭhito.
तस्सुद्दानं –
Tassuddānaṃ –
मूलधातु अथ वेदना दुवे, एसना च दुवे आसवा दुवे।
Mūladhātu atha vedanā duve, esanā ca duve āsavā duve;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / १०. मारधेय्यसुत्तवण्णना • 10. Māradheyyasuttavaṇṇanā
