| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៧. មណិរតនង្គបញ្ហោ
7. Maṇiratanaṅgapañho
៧. ‘‘ភន្តេ នាគសេន, ‘មណិរតនស្ស តីណិ អង្គានិ គហេតព្ពានី’តិ យំ វទេសិ, កតមានិ តានិ តីណិ អង្គានិ គហេតព្ពានី’’តិ? ‘‘យថា, មហារាជ, មណិរតនំ ឯកន្តបរិសុទ្ធំ, ឯវមេវ ខោ, មហារាជ, យោគិនា យោគាវចរេន ឯកន្តបរិសុទ្ធាជីវេន ភវិតព្ពំ។ ឥទំ, មហារាជ, មណិរតនស្ស បឋមំ អង្គំ គហេតព្ពំ។
7. ‘‘Bhante nāgasena, ‘maṇiratanassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, maṇiratanaṃ ekantaparisuddhaṃ, evameva kho, mahārāja, yoginā yogāvacarena ekantaparisuddhājīvena bhavitabbaṃ. Idaṃ, mahārāja, maṇiratanassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, មណិរតនំ ន កេនចិ សទ្ធិំ មិស្សីយតិ, ឯវមេវ ខោ, មហារាជ, យោគិនា យោគាវចរេន បាបេហិ បាបសហាយេហិ សទ្ធិំ ន មិស្សិតព្ពំ។ ឥទំ, មហារាជ, មណិរតនស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, maṇiratanaṃ na kenaci saddhiṃ missīyati, evameva kho, mahārāja, yoginā yogāvacarena pāpehi pāpasahāyehi saddhiṃ na missitabbaṃ. Idaṃ, mahārāja, maṇiratanassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, មណិរតនំ ជាតិរតនេហិ យោជីយតិ, ឯវមេវ ខោ, មហារាជ, យោគិនា យោគាវចរេន ឧត្តមវរជាតិមន្តេហិ សទ្ធិំ សំវសិតព្ពំ, បដិបន្នកផលដ្ឋសេក្ខផលសមង្គីហិ សោតាបន្នសកទាគាមិអនាគាមិអរហន្តតេវិជ្ជឆឡភិញ្ញសមណមណិរតនេហិ សទ្ធិំ សំវសិតព្ពំ។ ឥទំ, មហារាជ, មណិរតនស្ស តតិយំ អង្គំ គហេតព្ពំ។ ភាសិតម្បេតំ, មហារាជ, ភគវតា ទេវាតិទេវេន សុត្តនិបាតេ –
‘‘Puna caparaṃ, mahārāja, maṇiratanaṃ jātiratanehi yojīyati, evameva kho, mahārāja, yoginā yogāvacarena uttamavarajātimantehi saddhiṃ saṃvasitabbaṃ, paṭipannakaphalaṭṭhasekkhaphalasamaṅgīhi sotāpannasakadāgāmianāgāmiarahantatevijjachaḷabhiññasamaṇamaṇiratanehi saddhiṃ saṃvasitabbaṃ. Idaṃ, mahārāja, maṇiratanassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena suttanipāte –
‘‘‘សុទ្ធា សុទ្ធេហិ សំវាសំ, កប្បយវ្ហោ បតិស្សតា;
‘‘‘Suddhā suddhehi saṃvāsaṃ, kappayavho patissatā;
តតោ សមគ្គា និបកា, ទុក្ខស្សន្តំ ករិស្សថា’’’តិ។
Tato samaggā nipakā, dukkhassantaṃ karissathā’’’ti.
មណិរតនបញ្ហោ សត្តមោ។
Maṇiratanapañho sattamo.
