| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៨. មាគវិកង្គបញ្ហោ
8. Māgavikaṅgapañho
៨. ‘‘ភន្តេ នាគសេន, ‘មាគវិកស្ស ចត្តារិ អង្គានិ គហេតព្ពានី’តិ យំ វទេសិ, កតមានិ តានិ ចត្តារិ អង្គានិ គហេតព្ពានី’’តិ? ‘‘យថា, មហារាជ, មាគវិកោ អប្បមិទ្ធោ ហោតិ, ឯវមេវ ខោ, មហារាជ, យោគិនា យោគាវចរេន អប្បមិទ្ធេន ភវិតព្ពំ។ ឥទំ, មហារាជ, មាគវិកស្ស បឋមំ អង្គំ គហេតព្ពំ។
8. ‘‘Bhante nāgasena, ‘māgavikassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, māgaviko appamiddho hoti, evameva kho, mahārāja, yoginā yogāvacarena appamiddhena bhavitabbaṃ. Idaṃ, mahārāja, māgavikassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, មាគវិកោ មិគេសុ យេវ ចិត្តំ ឧបនិពន្ធតិ, ឯវមេវ ខោ, មហារាជ, យោគិនា យោគាវចរេន អារម្មណេសុ យេវ ចិត្តំ ឧបនិពន្ធិតព្ពំ។ ឥទំ, មហារាជ, មាគវិកស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, māgaviko migesu yeva cittaṃ upanibandhati, evameva kho, mahārāja, yoginā yogāvacarena ārammaṇesu yeva cittaṃ upanibandhitabbaṃ. Idaṃ, mahārāja, māgavikassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, មាគវិកោ កាលំ កម្មស្ស ជានាតិ, ឯវមេវ ខោ, មហារាជ, យោគិនា យោគាវចរេន បដិសល្លានស្ស កាលោ ជានិតព្ពោ ‘អយំ កាលោ បដិសល្លានស្ស, អយំ កាលោ និក្ខមនាយា’តិ។ ឥទំ, មហារាជ, មាគវិកស្ស តតិយំ អង្គំ គហេតព្ពំ។
‘‘Puna caparaṃ, mahārāja, māgaviko kālaṃ kammassa jānāti, evameva kho, mahārāja, yoginā yogāvacarena paṭisallānassa kālo jānitabbo ‘ayaṃ kālo paṭisallānassa, ayaṃ kālo nikkhamanāyā’ti. Idaṃ, mahārāja, māgavikassa tatiyaṃ aṅgaṃ gahetabbaṃ.
‘‘បុន ចបរំ, មហារាជ, មាគវិកោ មិគំ ទិស្វា ហាសមភិជនេតិ ‘ឥមំ លច្ឆាមី’តិ, ឯវមេវ ខោ, មហារាជ, យោគិនា យោគាវចរេន អារម្មណេ អភិរមិតព្ពំ, ហាសមភិជនេតព្ពំ ‘ឧត្តរិំ វិសេសមធិគច្ឆិស្សាមី’តិ។ ឥទំ, មហារាជ, មាគវិកស្ស ចតុត្ថំ អង្គំ គហេតព្ពំ។ ភាសិតម្បេតំ មហារាជ ថេរេន មោឃរាជេន –
‘‘Puna caparaṃ, mahārāja, māgaviko migaṃ disvā hāsamabhijaneti ‘imaṃ lacchāmī’ti, evameva kho, mahārāja, yoginā yogāvacarena ārammaṇe abhiramitabbaṃ, hāsamabhijanetabbaṃ ‘uttariṃ visesamadhigacchissāmī’ti. Idaṃ, mahārāja, māgavikassa catutthaṃ aṅgaṃ gahetabbaṃ. Bhāsitampetaṃ mahārāja therena mogharājena –
‘‘‘អារម្មណេ លភិត្វាន, បហិតត្តេន ភិក្ខុនា;
‘‘‘Ārammaṇe labhitvāna, pahitattena bhikkhunā;
ភិយ្យោ ហាសោ ជនេតព្ពោ, អធិគច្ឆិស្សាមិ ឧត្តរិ’’’ន្តិ។
Bhiyyo hāso janetabbo, adhigacchissāmi uttari’’’nti.
មាគវិកង្គបញ្ហោ អដ្ឋមោ។
Māgavikaṅgapañho aṭṭhamo.
