| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೩೭. ಮನ್ದಾರವಪುಪ್ಫಿಯವಗ್ಗೋ
37. Mandāravapupphiyavaggo
೧. ಮನ್ದಾರವಪುಪ್ಫಿಯತ್ಥೇರಅಪದಾನಂ
1. Mandāravapupphiyattheraapadānaṃ
೧.
1.
‘‘ತಾವತಿಂಸಾ ಇಧಾಗನ್ತ್ವಾ, ಮಙ್ಗಲೋ ನಾಮ ಮಾಣವೋ।
‘‘Tāvatiṃsā idhāgantvā, maṅgalo nāma māṇavo;
ಮನ್ದಾರವಂ ಗಹೇತ್ವಾನ, ವಿಪಸ್ಸಿಸ್ಸ ಮಹೇಸಿನೋ॥
Mandāravaṃ gahetvāna, vipassissa mahesino.
೨.
2.
‘‘ಸಮಾಧಿನಾ ನಿಸಿನ್ನಸ್ಸ, ಮತ್ಥಕೇ ಧಾರಯಿಂ ಅಹಂ।
‘‘Samādhinā nisinnassa, matthake dhārayiṃ ahaṃ;
ಸತ್ತಾಹಂ ಧಾರಯಿತ್ವಾನ, ದೇವಲೋಕಂ ಪುನಾಗಮಿಂ॥
Sattāhaṃ dhārayitvāna, devalokaṃ punāgamiṃ.
೩.
3.
‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ।
‘‘Ekanavutito kappe, yaṃ pupphamabhipūjayiṃ;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ॥
Duggatiṃ nābhijānāmi, buddhapūjāyidaṃ phalaṃ.
೪.
4.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ಮನ್ದಾರವಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।
Itthaṃ sudaṃ āyasmā mandāravapupphiyo thero imā gāthāyo abhāsitthāti.
ಮನ್ದಾರವಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ।
Mandāravapupphiyattherassāpadānaṃ paṭhamaṃ.
