| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៣៧. មន្ទារវបុប្ផិយវគ្គោ
37. Mandāravapupphiyavaggo
១. មន្ទារវបុប្ផិយត្ថេរអបទានំ
1. Mandāravapupphiyattheraapadānaṃ
១.
1.
‘‘តាវតិំសា ឥធាគន្ត្វា, មង្គលោ នាម មាណវោ;
‘‘Tāvatiṃsā idhāgantvā, maṅgalo nāma māṇavo;
មន្ទារវំ គហេត្វាន, វិបស្សិស្ស មហេសិនោ។
Mandāravaṃ gahetvāna, vipassissa mahesino.
២.
2.
‘‘សមាធិនា និសិន្នស្ស, មត្ថកេ ធារយិំ អហំ;
‘‘Samādhinā nisinnassa, matthake dhārayiṃ ahaṃ;
សត្តាហំ ធារយិត្វាន, ទេវលោកំ បុនាគមិំ។
Sattāhaṃ dhārayitvāna, devalokaṃ punāgamiṃ.
៣.
3.
‘‘ឯកនវុតិតោ កប្បេ, យំ បុប្ផមភិបូជយិំ;
‘‘Ekanavutito kappe, yaṃ pupphamabhipūjayiṃ;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
៤.
4.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា មន្ទារវបុប្ផិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā mandāravapupphiyo thero imā gāthāyo abhāsitthāti.
មន្ទារវបុប្ផិយត្ថេរស្សាបទានំ បឋមំ។
Mandāravapupphiyattherassāpadānaṃ paṭhamaṃ.
