| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၅. မဉ္စပီဌသိက္ခာပဒဝဏ္ဏနာ
5. Mañcapīṭhasikkhāpadavaṇṇanā
အဋ္ဌင္ဂုလပာဒကန္တိ ဘာဝနပုံသကနိဒ္ဒေသော။ ‘‘ဆေဒနကံ ဘေဒနကသဒိသမေဝာ’’တိ ဣမိနာ ‘‘ဆေဒနမေဝ ဆေဒနကံ, တံ အသ္သ အတ္ထီတိ ဆေဒနက’’န္တိ ဣမမတ္ထံ အတိဒိသတိ။
Aṭṭhaṅgulapādakanti bhāvanapuṃsakaniddeso. ‘‘Chedanakaṃ bhedanakasadisamevā’’ti iminā ‘‘chedanameva chedanakaṃ, taṃ assa atthīti chedanaka’’nti imamatthaṃ atidisati.
ယထာ ပမာဏမေဝ ဥပရိ ဒိသ္သတိ, ဧဝံ နိခဏိတ္ဝာ ဝာတိ သစေ ပန န ဆိန္ဒိတုကာမော ဟောတိ, ယထာ ပမာဏမေဝ ဥပရိ ဒိသ္သတိ, ဧဝံ ဘူမိယံ နိခဏိတ္ဝာ ဝာ။ အဋ္ဋကံ ဝာ ဗန္ဓိတ္ဝာတိ ဥက္ခိပိတ္ဝာ တုလာသင္ဃာတေ ဌပေတ္ဝာ အဋ္ဋံ ကတ္ဝာ။
Yathā pamāṇameva upari dissati, evaṃ nikhaṇitvā vāti sace pana na chinditukāmo hoti, yathā pamāṇameva upari dissati, evaṃ bhūmiyaṃ nikhaṇitvā vā. Aṭṭakaṃ vā bandhitvāti ukkhipitvā tulāsaṅghāte ṭhapetvā aṭṭaṃ katvā.
မဉ္စပီဌသိက္ခာပဒဝဏ္ဏနာ နိဋ္ဌိတာ။
Mañcapīṭhasikkhāpadavaṇṇanā niṭṭhitā.
